Woho wa tatɛ mbeka l’anto lo ekimanyielo ka dibuku Bible etshatɔ

Efula l’atei aso wayɔngɛnangɛna nɔmbɔla wekelo wa Bible paka naka vɔ mbeya woho wa tatɛ wekelo akɔ. Dibuku nɛ di’oyoyo Bible etshatɔ mɛtɛ? kokaka tokimanyiya. Mbɔtwɛlɔ kele lo lɛkɛ 3-7 akasalema dia kotola yambalo y’ompokami lo sawo dia lo Bible lo ekimanyielo ka dibuku nɛ. Oyadi wanɛ wahatahokɔ akambo dimɛna lo esambishelo wayokoka kamba latɔ dia tatɛ wekelo.

◼ Wɛ mbeyaka pemba mbɔtwɛlɔ kɛnɛ lo kamba la lɛkɛ 3:

L’ɔkɔngɔ wa wɛ mbuta dui dimɔtshi diakiyanya anto wa lo ɛtshi kanyu ka nkɛtɛ, kotola yambalo y’ompokami ayɛ lo ambola wele lo lɛkɛ 3 wofundami la alɛta woleki edima ndo lɔmbande dia nde mbisha kanyi yande. Oma lâsɔ fola lo lɛkɛ 4-5.

◼ Kana wɛ mbeyaka kombola tatɛ tɛkɛta awui wele lo lɛkɛ 4-5:

Wɛ kokaka mbuta ɔnɛ: “Shi ayonga dimɛna efula dia etshikitanu wɛnayɛ lo ndjɛkɛ nyɛ salema?” Kana wɛ mbeyaka mumbola ɔnɛ: “Daka diakɔna lo alaka wele lânɛ diayoyolanga mɛna ekotshamelo kadiɔ?” Hokamɛ la yambalo tshɛ okadimwelo.

Naka ompokami ambɛnya nsaki ka lânde lo divɛsa dimɔtshi, kete ɛnyande kɛnɛ ketsha Bible lo dui diakɔ lo sɛdingola edingɔ wa lo dibuku watɛkɛta dia divɛsa diakɔ. (Enda kiombo yele lo dikatshi di’okotsha nɛ.) Sɛdingola awui akɔ lo woho wâmɛ wayoyâsɛdingola lo wekelo wa Bible. Dui sɔ kokaka salema lo edja ka minitɛ tshanu kana dikumi mbala ka ntondo kahomanayɛ l’onto kânga ka soko di’onto.

◼ Mbɔtwɛlɔ kekina ele nɔmba onto dia nde mbisha kanyi yande lo kamba la lɛkɛ 6:

Kotola yambalo y’ompokami lo ambola wele l’ɛse ka dikatshi ndo mbolande ɔnɛ: “Onde wɛ ambokanaka yimba lo kɛnɛ kendana la ambola anɛ?” Naka nde ambɛnya nsaki lo dimbola dimɔtshi, kete fola edingɔ wa lo dibuku wakadimola dimbola diakɔ. (Enda kiombo yele lo dikatshi di’okotsha nɛ.) Etena kasɛdingolanyu awui akɔ kâmɛ, ekɔ tshondo ya wekelo wa Bible mbalɔmbɔlayɛ.

◼ Lɛkɛ 7 mbeyaka kambema dia sala wɛnyɛlɔ ɔmɔtshi wa woho wa mbeka l’onto Bible:

Adia ditelo sato dia ntondo dia lo lɛkɛ lɔnɛ ndo oma lâsɔ, fola lo tshapita 3, ndo sala wɛnyɛlɔ ɔmɔtshi wa woho wa mbeka l’onto lo kamba la odingɔ 1-3. Talɔngɔsɔdi la ntondo dia kalola dia ndjɔkɛtshanya ekadimwelo lo ambola wele lo odingɔ 3.

◼ Woho wa ndjalɔngɔsɔla dia kalola tenda onto:

Etena kashidiyanyu lo wendelo wa ntondo, yalɔngɔsɔla la ntondo dia ndjotetemala sawo. Wɛ mbeyaka mbuta tsho ɔnɛ: “Lo minitɛ ngana tsho, tambeka kɛnɛ ketsha Bible lo dikambo dimɔtshi di’ohomba efula. Lushi lokina, sho kokaka ndjɔkɛtshanya [tshika dimbola diayonyoyɔsɛdingola]. Onde dimi mbeyaka ndja dia sho ndjosawola dui nɛ lomingu layaye lo wonya akɔ wâmɛ?”

Etena kayasukanyaso la Jehowa lo etena kakashikikɛma, nde tetemalaka tɔlɔngɔsɔla dikambo di’olimu wele laso. (Mat. 28:​19, 20; 2 Tim. 3:17) Nyɛsɔ tokambe dimɛna la ehomɔ kaso k’oyoyo ka diambo kɛnɛ dia tatɛ mbeka l’anto Bible.

Woho wa mbisha anto dibuku Bible etshatɔ

Dikatshi di’okotsha nɛ diekɔ la mbɔtwɛlɔ yotshikitanyi ya woho wa mbisha anto dibuku Bible etshatɔ. Dia ndeka kondja etombelo w’ɔlɔlɔ, wɛ pombaka kamba la mbɔtwɛlɔ yakɔ lo ɛtɛkɛta ayɛ hita, ndjiɔtɔnganyiya la anto wa lo ɛtshi kayɛ ka nkɛtɛ ndo ndjiekesanyiya la awui shikaa wele lo dibuku diakambaso ladiɔ dia mbeka l’anto Bible. Nyu mbeyaka kamba la mbɔtwɛlɔ nkina y’amɛna yɔtɔnɛ la ɛtshi kanyu ka nkɛtɛ.​—⁠Enda Olimu aso wa Diolelo wa Ngɔndɔ ka ntondo 2005, lɛkɛ 8.

Aramangɛdɔna

◼ “Etena koka anto tshɛkɛta ‘Aramangɛdɔna,’ efula fɔnyaka dia ekɔ lomanu l’anto. Onde wɛ ayamba dia mbeya ɔnɛ Aramangɛdɔna ekɔ dikambo dimɔtshi dia nongamɛ la ɔngɛnɔngɛnɔ? [Tshikande akadimole. Oma lâsɔ, adia Enyelo 16:​14, 16.] Enda kɔmatɛrɛ kɛnɛ kɛnya woho wayonga lɔsɛnɔ l’ɔkɔngɔ wa Aramangɛdɔna.” Fola lo lɛkɛ 82-84, ndo adia odingɔ 21.

Bible

◼ “Anto mbutaka mbala efula dia Bible ekɔ Ɔtɛkɛta wa Nzambi. Onde wɛ atayambolaka woho akɔna wele dibuku diakafundama oma le anto kokaka mbelamɛ ɔnɛ Ɔtɛkɛta wa Nzambi? [Tshikande akadimole. Oma lâsɔ adia 2 Petero 1:21 ndo odingɔ 5 wele lo lɛkɛ 19-20.] Dibuku nɛ mbishaka ekadimwelo w’oma lo Bible lo ambola asɔ.” Ɛnya ambola wele lo lɛkɛ 6.

◼ “Ɛlɔ kɛnɛ anto weya awui efula oleki woho wakinde ntondo. Koko lende afɔnyayɛ akokaso tana alako w’amɛna wakoka tokimanyiya dia monga la lɔsɛnɔ l’ɔngɛnɔngɛnɔ ndo la dimɛna? [Tshikande akadimole. Oma lâsɔ, adia 2 Timote 3:​16, 17 ndo odingɔ 12 lo lɛkɛ 22-23.] Dibuku nɛ nembetshiyaka woho wakokaso nsɛna lo yoho yangɛnyangɛnya Nzambi ndo yayotokondjiyɛ wahɔ.” Ɛnya kiombo ndo osato wele lo lɛkɛ 122-123.

Dɔmbɛlɔ

◼ “Onde wɛ amboyambolaka woho wakadimola Nzambi alɔmbɛlɔ? [Tshikande akadimole. Oma lâsɔ adia 1 Joani 5:​14, 15 ndo odingɔ 16-18 lo lɛkɛ 170-172.] Tshapita nyɛ nembetshiyaka nto lande na kahombaso nɔmbaka Nzambi ndo kɛnɛ kahombaso sala dia nde tohokamɛ.”

Jehowa Nzambi

◼ “Anto efula wele la mbetawɔ le Nzambi kombolaka ndjasukanya la nde. Onde wɛ mbeyaka dia Bible tɔlɔmbaka dia sho ndjasukanya la nde? [Tshikande akadimole. Oma lâsɔ adia Jakoba 4:8a ndo odingɔ 20 lo lɛkɛ 16.] Dibuku nɛ diakasalema dia kimanyiya anto dia vɔ mbeka awui efula lo kɛnɛ kendana la Nzambi lo kamba la Bible yawɔ hita.” Ɛnyande ambola wa mbɔtwɛlɔ wele lo lɛkɛ 8.

◼ “Anto efula nɔmbaka dia lokombo la Nzambi kidiama. Onde wɛ amboyambolaka naa lokombo lakɔ? [Tshikande akadimole. Oma lâsɔ, adia Osambu 83:18 ndo odingɔ 2-3 lo lɛkɛ 195.] Dibuku nɛ nembetshiyaka kɛnɛ ketsha mɛtɛ Bible lo dikambo dia Jehowa Nzambi ndo sangwelo diande lo dikambo di’anto.”

Lɔsɛnɔ la pondjo

◼ “Anto efula kombolaka monga la yônge ya demba ya dimɛna ndo nsɛna edja. Ko onde wɛ ayolanga dia nsɛna pondjo pondjo naka kokaka? [Tshikande akadimole. Oma lâsɔ, adia Enyelo 21:​3, 4 ndo odingɔ 17 lo lɛkɛ 53-54.] Dibuku nɛ tɛkɛtaka dia woho wakokaso kondja lɔsɛnɔ la pondjo ndo woho wayonga lɔsɛnɔ etena kayokotshama daka nɛ.”

Mpokoso/asui

◼ “Etena katomba mpokoso kɛmɔtshi, anto efula ndjambolaka kana Nzambi mɛtɛ ndjakiyanyaka dikambo di’anto ndo dia kana nde mɛnaka asui awɔ. Onde wɛ amboyambolaka dikambo sɔ? [Tshikande akadimole. Oma lâsɔ adia 1 Petero 5:7 ndo odingɔ 11 lo lɛkɛ 11.] Dibuku nɛ nembetshiyaka woho wayonya Nzambi asui w’anto lo pondjo.” Ɛnyande ambola wa mbɔtwɛlɔ wele lo lɛkɛ 106.

Mvudu

◼ “Lo ahole efula, tana luudu la dimɛna lele oshinga l’ɛse aya dikambo dia wolo efula. Onde wɛ fɔnyaka dia lushi lɔmɔtshi onto l’onto okonga la luudu la nde hita la dimɛna? [Tshikande akadimole. Oma lâsɔ, adia Isaya 65:​21, 22 ndo odingɔ 20 lo lɛkɛ 34.] Dibuku nɛ nembetshiyaka woho wayokotshama daka nɛ diaki Nzambi.”

Nkumbo

◼ “Sho tshɛ ndjakiyanyaka dia monga la lɔsɛnɔ la nkumbo l’ɔngɛnɔngɛnɔ. Shi wɛ mbetawɔka dui sɔ? [Tshikande akadimole.] Bible tɛkɛtaka dia dikambo dimɔtshi diakoka onto tshɛ la lo nkumbo sala dia nkumbo monga l’ɔngɛnɔngɛnɔ mbuta ate mbokoya Nzambi lo mbokana ngandji.” Adia Efeso 5:​1, 2 ndo odingɔ 4 lo lɛkɛ 135.

Nyɔi/eolwelo

◼ “Anto efula mumbolaka woho wayalaso etena kavɔso. Onde wɛ fɔnyaka dia sho kokaka mbeya dikambo sɔ? [Tshikande akadimole. Oma lâsɔ, adia Undaki 9:5 ndo odingɔ 5-6 lo lɛkɛ 58-59.] Dibuku nɛ nembetshiyaka nto kɛnɛ kayolembetshiya daka dia lo Bible dia eolwelo le wanɛ wambovɔ.” Ɛnyande osato wele lo lɛkɛ 75.

◼ “Etena kavɔ lakiso ɔmɔtshi la ngandji, bu kɔlɔ dia sho kombola mbɛna nto. Shi wɛ mbetawɔka dikambo sɔ? [Tshikande akadimole.] Anto efula wakakondja esambelo lo daka dia lo Bible dia eolwelo. [Adia Joani 5:​28, 29 ndo odingɔ 16-17 lo lɛkɛ 72.] Tshapita nyɛ kadimolaka nto lo ambola asɔ.” Ɛnyande ambola wa mbɔtwɛlɔ wele lo lɛkɛ 66.

Ɔtɛmwɛlɔ

◼ “Anto efula wambotatɛ mɛna dia ɛtɛmwɛlɔ wa l’andja ɔnɛ mbele lo kiɔkɔ y’ekakatanu wele l’anto lo dihole dia vɔ shidiya ekakatanu akɔ. Onde wɛ fɔnyaka dia ɔtɛmwɛlɔ ekɔ lo tɔla anto otsha lo mboka ka dimɛna? [Tshikande akadimole. Oma lâsɔ adia Mateu 7:​13, 14 ndo odingɔ 5 lo lɛkɛ 145-146.] Tshapita nyɛ sɛdingolaka awui asamalo wɛnya woho w’ɔtɛmwɛlɔ wetawɔma le Nzambi.” Ɛnyande listɛ lele lo lɛkɛ 147.

Ta/wɔladi

◼ “Anto wa lo ahole tshɛ nongamɛka wɔladi. Onde wɛ fɔnyaka dia elongamelo ka wɔladi lo andja ɔnɛ ekɔ tsho dɔ? [Tshikande akadimole. Oma lâsɔ adia Osambu 46:​8, 9.] Dibuku nɛ mɛnyaka woho wayokotsha Nzambi daka diande ndo woho wayondela wɔladi lo andja w’otondo.” Ɛnyande osato wele lo lɛkɛ 35, ndo nyɔsɛdingole odingɔ 17-21 wele lo lɛkɛ 34-36.

Yeso Kristo

◼ “Anto wa lo nkɛtɛ k’otondo wamboshilaka mboka akambo wendana la Yeso Kristo. Anto amɔtshi mbutaka dia nde aki tsho onto la diambo. Akina mbɔtɛmɔlaka oko Nzambi Kanga-Wolo-Tshɛ. Onde wɛ fɔnyaka dia kɛnɛ ketawɔso lo dikambo dia Yeso Kristo kekɔ ohomba?” Tshikande akadimole. Oma lâsɔ adia Joani 17:3 ndo odingɔ 3 lo lɛkɛ 37-38. Kotola yambalo yande lo ambola wa mbɔtwɛlɔ wele l’ɛse ka ɔtɛ a dui wa tshapita.

[Kiombo ya lo lɛkɛ 5]

Toho ta mbutɛ onto yɛdikɔ yendana la woshasha

“Naka wɛ nangaka mbidja yema ya woshasha ya tshitshɛ ɛlɔ dikambo di’olimu aso wasalema lo andja w’otondo, kete layetawɔ woshasha akɔ l’ɔngɛnɔngɛnɔ.”

“Kânga mbele ekanda aso mbishamaka woshasha, sho mbetawɔka weshasha washama la lolango dia sukɛ olimu aso wasalema lo andja w’otondo.”

“Ondo wɛ ndjambolaka woho wakotshama olimu ɔnɛ. Olimu ɔnɛ kotshamaka nɛ dia olimu aso wasalema lo andja w’otondo wekɔ lo sukamɛ oma lo weshasha wa la lolango. Naka wɛ nangaka mbidja yema ya woshasha ɛlɔ, kete layoyietawɔ la ɔngɛnɔngɛnɔ tshɛ.”

1) Dimbola, 2) divɛsa, ndo 3) tshapita

Yoho ya wɔdu ya mbisha anto dibuku Bible etshatɔ mɛtɛ? yɔ nyɛ 1) oka dimbola dimɔtshi dialɔmba di’onto mbisha kanyi yande, 2) adia divɛsa diahombama, ndo 3) kotola yambalo y’ompokami lo tshapita ya lo dibuku yatɛkɛta dui diakɔ lo mbadia ambola wa mbɔtwɛlɔ wele l’ɛse k’ɔtɛ a dui wa tshapita. Naka ompokami ambɛnya nsaki, kete wɛ kokaka mbɛnya woho wekaso l’anto Bible lo kamba la odingɔ wa ntondo wa tshapita yakɔ. Sho kokaka kamba la yoho shɔ dia tatɛ mbeka l’onto lo wendelo wa ntondo kana etena kasalaso wendelo w’oyoyo.

◼ “Onde wɛ fɔnyaka dia anto k’anto kokaka mbeya Otungi aso kanga-wolo-tshɛ oko wotamidiɔ lo Bible lo avɛsa anɛ?” Adia Etsha 17:​26, 27, ndo tshikande akadimole. Oma lâsɔ ɛnyande tshapita 1.

◼ “Lo menda ekakatanu wadiɛnɛso lawɔ nshi nyɛ, onde wɛ fɔnyaka dia onto kokaka kondja esambelo ndo elongamelo kɔkɔndwami lanɛ?” Adia Romo 15:​4, ndo tshikande akadimole. Oma lâsɔ ɛnyande tshapita 2.

◼ “Naka wɛ ekɔ la wolo wa sala ngasɔ, onde wɛ hosala etshikitanu ɛnɛ?” Adia Enyelo 21:​4, ndo tshikande akadimole. Oma lâsɔ ɛnyande tshapita 3.

◼ “Onde wɛ fɔnyaka dia anaso wayokoka monga la yoho ya lɔsɛnɔ yɔkɔndwami lo osambo w’edjedja ɔnɛ?” Adia Osambu 37:​10, 11, ndo tshikande akadimole. Oma lâsɔ ɛnyande tshapita 3.

◼ “Onde wɛ fɔnyaka dia ɛtɛkɛta ɛnɛ wayokotshama lushi lɔmɔtshi?” Adia Isaya 33:​24, ndo tshikande akadimole. Oma lâsɔ ɛnyande tshapita 3.

◼ “Onde wɛ amboyambolaka dia mbeya kana wanɛ wambovɔ mbeyaka kɛnɛ kasala wanɛ wele la lɔsɛnɔ?” Tshikande akadimole. Oma lâsɔ, adia Undaki 9:​5, ndo ɛnyande tshapita 6.

◼ “Onde wɛ fɔnyaka dia lushi lɔmɔtshi tokɛna wakiso wa ngandji wambovɔ oko wakate Yeso lo avɛsa anɛ?” Adia Joani 5:​28, 29, ndo tshikande akadimole. Oma lâsɔ ɛnyande tshapita 7.

◼ “Lo kanyi yayɛ, ngande wayokoka lolango la Nzambi salema la nkɛtɛ oko watshamalɔ l’olongo oko wɛnyamidiɔ lo dɔmbɛlɔ dia diambo nɛ?” Adia Mateu 6:​9, 10, ndo tshikande akadimole. Oma lâsɔ ɛnyande tshapita 8.

◼ “Onde wɛ fɔnyaka dia tekɔ lo nsɛna lo nshi yɔkɔndwami lo prɔfɛsiya kɛnɛ?” Adia 2 Timote 3:​1-4, ndo tshikande akadimole. Oma lâsɔ ɛnyande tshapita 9.

◼ “Anto efula ndjambolaka lande na kele akambo w’anto mɛnamaka dia wekɔ lo taleke monga kɔlɔ. Onde wɛ ambɔsaka elembetshiyelo woshami lo divɛsa nɛ oko ɔkɔkɔ ɔmɔtshi?” Adia Enyelo 12:​9, ndo tshikande akadimole. Oma lâsɔ ɛnyande tshapita 10.

◼ “Onde wɛ kombolaka mbeya okadimwelo wa dimbola dia woho ɔnɛ?” Adia Jobo 21:​7, ndo tshikande akadimole. Oma lâsɔ ɛnyande tshapita 11.

◼ “Onde wɛ fɔnyaka dia naka onto kamba la dako nɛ dia lo Bible ayowokimanyiya dia nde monga la lɔsɛnɔ la nkumbo la dimɛna?” Adia Efeso 5:​33, ndo tshikande akadimole. Oma lâsɔ ɛnyande tshapita 14.

Onto kokaka mbadiema ombeki wa Bible, naka tambeka la nde mbala hiende l’ɔkɔngɔ wa sho mɛnya woho wekaso l’anto Bible ndo naka sho mɛnaka dia wekelo wayotetemala.