Yeso Kristo mbele Mɛsiya wakalakema

DIA tokimanyiya woho wa sho mbeya Mɛsiya, Jehowa Nzambi akasha amvutshi efula wa lo Bible nyuma kande k’ekila dia vɔ mfunda awui wendana l’eotwelo, olimu ndo nyɔi kaki Otshungodi wakalakema. Alaka asɔ tshɛ wa lo Bible wakakotshama le Yeso Kristo. Vɔ wekɔ mɛtɛ shikaa ndo kɔndɔlaka akambo tshɛ lo yoho ya diambo efula. Ɛnyɛlɔ, tɔsɛdingole alaka angana ato wakatɛkɛta awui wendana l’eotwelo ka Mɛsiya ndo awui wakahombe salema lo dikɛnda diande.

Omvutshi Izaya akatatshi dia Mɛsiya ayonga kanula ya nkumekanga Davidɛ. (Izaya 9:7) Lo mɛtɛ, Yeso akotɔ l’ɔlɔndji wa dioho dia Davidɛ.​—Mateo 1:1, 6-17.

Mika, omvutshi okina waki Nzambi akatatshi dia ɔnɔsɔ ayoyokoma ɔnɔmbɔdi ndo ɔnɛ nde ayotɔ la “Betelehema Efarata.” (Mika 5:2) Lo nshi yakotɔ Yeso, aki esomba ehende lo Isariyɛlɛ wakawelɛka Bɛtɛlɛhɛma. Ɔmɔtshi waki suke la Nazarɛtɛ lo lɛkɛ la nɔrdɛ la wodja ndo okina waki suke la Jɛrusalɛma la Juda. Bɛtɛlɛhɛma kaki suke la Jɛrusalɛma mbakawelɛka ntondo ɔnɛ Efarata. Yeso akotɔ l’osomba ɔsɔ paka oko wakadiatama.​—Mateo 2:1.

Daka dikina dia lo Bible diakatatshi di’Ɔna Nzambi ayelamɛ “oma l’Edjibito.” Lam’aki Yeso eke dikɛnda, ambutshi ande wakatshu la nde l’Edjibito. Vɔ wakakalola la nde oma lɛkɔ l’ɔkɔngɔ wa nyɔi ka Hɛrɔdɛ ndo dikambo sɔ diakakotsha daka sɔ.​—Hɔsɛa 11:1; Mateo 2:15.

Lo tablo kele l’ɔtɛ a dui ɔnɛ “Alaka wendana la Mɛsiya,” avɛsa woshilami l’ɛse k’ɔtɛ a dui wata ɔnɛ: “Daka” wekɔ l’awui wendana la Mɛsiya. Lam’alangɛ, ɛdika awui asɔ l’awui wele lo avɛsa woshilami l’ɛse k’ɔtɛ a dui wata ɔnɛ: “Okotshamelo.” Naka wɛ nsala ngasɔ, kete dui sɔ diayokeketsha mbetawɔ kayɛ lo mɛtɛ k’Ɔtɛkɛta wa Nzambi.

Etena kasɛdingolayɛ avɛsa anɛ, tohɛke di’alaka asɔ wakafundama ɛnɔnyi nkama la ntondo k’eotwelo ka Yeso. Yeso akate ate: “Akambo tshɛ wakafundama lo Ɛlɛmbɛ wa Mɔsɛ, lo efundelo w’amvutshi ndo lo Esambo lo dikambo diami pombaka kotshama.” (Luka 24:44) Oko wakokayɛ nshikikɛ awui akɔ lo Bible kayɛ hita, oseka kiambokambo tshɛ yendana l’alaka asɔ yakakotshama!