‘Tewoya Ɔtɛkɛta wa Nzambi aha la mboka wɔma’
1 Onde tena dimɔtshi wɛ mengengaka dia mbewoya anto dietawɔ diayɛ etena kakondjayɛ diaaso la kalasa kana l’olimu? Onde ekɔ tshondo y’okakatanu le yɛ dia sambisha ewotɔ ayɛ ndo asukanyi ayɛ kana anto wahayeye lo tshakitudi? Kakɔna kayokimanyiya onto tshɛ la l’atei aso dia kamba la waaso w’ɛlɔlɔ wakondjaso dia ‘mbewoya Ɔtɛkɛta wa Nzambi aha la mboka wɔma’?—Fil. 1:14.
2 Tatengengake: Onde wɛ ayengenga mamɛ ɔngɛnyi ayɛ kana owotɔ ayɛ ɔmɔtshi lakawasɔngwɛ awui wa kashi? Lo edja k’ɔkɔndɔ w’anto, anto mbutaka awui wa kashi lo lokombo la Jehowa lele ɔngɛnyi aso woleki tshɛ. Tekɔ mɛtɛ la diɛsɛ dia lânde dia sambisha akambo wendana la Nzambi kaso ka woke! (Is. 43:10-12) Ngandji k’efula kokaso Jehowa koka tokimanyiya diaha sho mboka wɔma ndo tɔ koka totshutshuya diaha sho mengenga dia sambisha akambo wa mɛtɛ la dihonga tshɛ.—Etsha 4:26, 29, 31.
3 Tohɔ dia losango laso lekɔ lokumu l’ɔlɔlɔ. Anto walihokamɛ wayokondja ɛtshɔkɔ wa pondjo. Mbika washo l’ohomba wele l’olimu w’esambishelo lo dihole di’elimu aso kana atunyi aso ayotokimanyiya dia sambisha la dihonga.
4 Bɛnyɛlɔ di’anto akina: Sho koka kondja wolo oma lo lɔkɛwɔ la kɔlamelo l’anto akina wakewoya Ɔtɛkɛta wa Nzambi aha la mboka wɔma. Ɛnyɛlɔ, la dihonga tshɛ Ɛnɔka akewoya atshi wa kɔlɔ elombwelo kaki Jehowa. (Jude 14, 15) La kɔlamelo tshɛ, Nɔa akasambisha anto waki la wendjodi. (Mat. 24:37-39) Akristo wa lo ntambe ka ntondo waki “haweyi mukanda [ndo] antu k’antu” wakatetemala sambisha l’atei w’ɔlɔshamelo wa wolo. (Etsha 4:13, 18-20) Tena efula ekanda aso mongaka la ɛkɔndɔ w’anto wa nshi nyɛ wele diɛsɛ oma lo mbetawɔ kele lawɔ le Jehowa, vɔ minyaka wɔma w’onto ndo komaka esambisha w’ohetoheto.
5 Sho koka monga la dihonga lo sɛdingola lɔkɛwɔ laki la ekambi waki Nzambi wa kɔlamelo waki lo nshi y’edjedja wakahomana la ekakatanu wa wolo. (1 Khum. 19:2, 3; Mako 14:66-71) Vɔ ‘wakakondja dihonga oma le Nzambi kaso’ ndo wakasambisha aha la mboka wɔma. Ngasɔ mbakokaso sala!—1 Tes. 2:2.