Woho wa tɛmɔla Jehowa kâmɛ lo nkumbo
1 Lo nshi yakafundamaka Bible, ase nkumbo wakasalaka awui efula kâmɛ. Wakasalaka elimu wa lushi la lushi kâmɛ ndo kɛnɛ kakaleke ele, wakatɛmɔlaka Jehowa kâmɛ. (Lew. 10:12-14; Euh. 31:12) Ɛlɔ kɛnɛ, lo ahole efula, ase nkumbo hawoyoleka sala awui efula kâmɛ. Koko, Akristo mɛnaka ohomba wa ase nkumbo ndjasha lo awui amɔtshi kâmɛ, djekoleko dia tɛmɔla Nzambi. Aha la tâmu, Otungi wa nkumbo ngɛnangɛnaka efula etena kɛnande nkumbo yɔtɛmɔla kâmɛ!
2 Nyosambishake kâmɛ: Sambishaka lokumu l’ɔlɔlɔ kâmɛ keketshaka dimama dia nkumbo. Ɔnkɔnɛ, ekumanyi kele la mbekelo ka sambishaka kâmɛ la anto akina wa lo etshumanelo la dia sambishaka nto kâmɛ la wadɛnde la anande mbala la mbala. (1 Tim. 3:4, 5) Kânga mbele emendji weteta wekɔ la awui efula wa sala, vɔ kongɛka nshi ya vɔ sambisha la wadɛwɔ.
3 Ambutshi wasambisha kâmɛ la anawɔ wekɔ l’akoka wa mbakimanyiya dia vɔ pama oko wewɔ esambisha. Ana wayɛna aha tsho ɔngɛnɔngɛnɔ ndo ɔlɔ woka ambutshi l’olimu w’esambishelo, koko ndo ngandji kokawɔ Jehowa ndo wonyawɔ onto. (Euh. 6:5-7) Ohomba w’ambutshi sambishaka kâmɛ la anawɔ hahombe kitakita etena kola ana. Wadi l’omi amɔtshi wele l’ana asato waki l’ɛnɔnyi l’asa 15 la 21 wakatetemala sambisha la wɔ mbala la mbala. Papa akate ate: “Mbala tshɛ, sho mbaetshaka dui dimɔtshi. Sho ndjashikikɛka dia mbeya ɔnɛ dui diakɔ diekɔ dui dia dimɛna ndo diakeketsha.”
4 Nyoyalɔngɔsɔlake kâmɛ: Ase nkumbo mɛnaka ɔlɔlɔ ndjalɔngɔsɔlaka kâmɛ dikambo di’olimu w’esambishelo. Mbala efula, ana ngɛnangɛnaka ovuswelo wasalawɔ la ase nkumbo dia mɛnya woho wa tatɛ sawo kana lo vɔ monga ampokami. Nkumbo mɔtshi mbɔsaka minitɛ ngana lo ekomelo ka wekelo wa lo nkumbo dia sala dui sɔ.
5 Tayoleka monga l’ɔngɛnɔngɛnɔ naka sho ndjasha lo elimu w’ohomba ndo wangɛnyangɛnya ɛsɔ kâmɛ la anto wokaso ngandji. Ekɔ dui di’ɔngɛnɔngɛnɔ efula le ase nkumbo dia vɔ kamba kâmɛ l’esambishelo ka lo luudu la luudu, dia sala waendelo w’eyoyo ndo dia nɔmbɔla wekelo wa Bible! Ɔnkɔnɛ, etena katɛmɔlanyu Jehowa kâmɛ lo nkumbo, nyu kokaka mbuta l’ɔngɛnɔngɛnɔ tshɛ ɔnɛ: “Keli dimi la wa lu luudu lami tayotemolaka [Jehowa].”—Jas. 24:15.