Woho wa nɔngɔsɔla mbɔtwɛlɔ ka woho wa mbisha anto periodikɛ

1. Lande na kele ndeka dimɛna nɔngɔsɔla mbɔtwɛlɔ kaso hita kendana la woho wa mbisha anto periodikɛ lo dihole dia kimɛ tsho kɛmɔtshi k’ɛnyɛlɔ koshawɔ lo Olimu aso wa Diolelo?

¹ Wɛ koka ndjambola wate: ‘Lam’ele wekɔ lo mɛnya woho wa mbisha anto periodikɛ lo numɛlɔ tshɛ ka Olimu aso wa Diolelo, lande na kahombaso nɔngɔsɔlaka mbɔtwɛlɔ yendana la woho wa mbishaka anto periodikɛ?’ Kânga mbɛna anto efula dia mbɔtwɛlɔ shɔ kimanyiyaka efula, ndjalɔngɔsɔla ekɔ paka ohomba. Mbɔtwɛlɔ kele dimɛna l’ɛtshi kɛmɔtshi ka nkɛtɛ mbeyaka monga ko hɔtɔnɛ l’ɛtshi kekina ka nkɛtɛ. Ɔnkɔnɛ, hatami ɔnɛ etena kashaso anto periodikɛ sho la dia ndjelaka bɛnyɛlɔ dia mbɔtwɛlɔ nna lo nna. Kânga naka tambolanga kamba la mbɔtwɛlɔ kɛmɔtshi k’ɛnyɛlɔ, ndeka dimɛna sho nembetshiya kɛnɛ kotami l’ɛtɛkɛta aso hita.

2. Kakɔna kalɔmbama etena kashikikɛyɛ sawo diayoyɔtɛkɛta?

² Sɔna sawo dimɔtshi: L’ɔkɔngɔ wa wɛ mbadia periodikɛ, sɔna sawo dimɔtshi diele ohomba l’ɛtshi kanyu ka nkɛtɛ ndo dialeka kotola yambalo yayɛ. Dietawɔ ndo wangasanu wele layɛ etena kɛnyayɛ onto sawo dimɔtshi koka tshutshuya onto akɔ dia nde ngɛnangɛna diadia nde lawɔ. Kânga mbayoyɔtshiya sawo diɛnayɛ dia diɔ diayɔngɛnyangɛnya anto efula wa l’ɛtshi kanyu ka nkɛtɛ, ekɔ ohomba mbeya ndo asawo akina wa lo periodikɛ kakɔ dimɛna. Kɛsɔ ayokokimanyiya dia wɛ tshikitanya mbɔtwɛlɔ kayɛ naka wɛ ambohomana la onto laleka ndjasha lo sawo dikina.

3. Mbɔtwɛlɔ ka ngande kakamba layɛ dia kondja etombelo woleki amɛna?

³ Oka dimbola dimɔtshi: Oma lâsɔ, lɔngɔsɔla ɛtɛkɛta ayɛ wa mbɔtwɛlɔ dimɛna. Mbɔtwɛlɔ kayɛ kekɔ ohomba efula. Mbeyaka monga ohomba mboka ompokami ayɛ dimbola diatshutshuya onto dia kana yimba dia nomialomia nsaki kande lo sawo diakayasɔnyi dia ndjɔtɛkɛta. Mbala efula ambola walɔmba onto dia mbisha kanyi ndekaka monga la etombelo w’amɛna. Ewɔ dia mboka dimbola diakoka nyangiya ompokami ayɛ kana mbokonya dia nde mamɛ tokanyi tande.

4. Wahɔ akɔna wayotokondja naka sho mbadiɛ ompokami divɛsa dimɔtshi naka kokaka?

⁴ Adia divɛsa dimɔtshi: L’ekomelo, sɔna divɛsa dimɔ dia mbadia naka ompokami ayɛ ekɔ la diaaso, ondo di’oma lo sawo diayoyɔtɛkɛta. Mbadia divɛsa dimɔ ayokimanyiya ompokami dia nde mɛna dia losango laso mbɔsama oma lo Ɔtɛkɛta wa Nzambi. (1 Tes. 2:13) Ndo divɛsa sɔ diayowosambisha oyadi nde kotonaka nongola periodikɛ. Anto amɔtshi wakemula nsaki ka ampokami awɔ lo mbadia divɛsa dimɔ la ntondo ka mboka dimbola. Wɛ koka mbɔtshiya divɛsa lo mbuta wate: “Lekɔ lo nanga mbeya kanyi yayɛ lo kɛnɛ kotami lo divɛsa dia lo Bible nɛ.” Oma lâsɔ, kotola yambalo y’onto lo dui dimɔtshi diɔtɔnɛ la divɛsa sɔ diele lo periodikɛ ndo sha kɔmatɛrɛ ka mondo dia ndeka nomialomia nsaki kande la ntondo ka mboshatɔ.

5. Awui akɔna wahombayɛ mbohɔka etena kayalɔngɔsɔlayɛ dia tosha anto periodikɛ?

⁵ Ndoko ɔlɛmbɛ w’ɔnɛ paka onto tshɛ ndjela lo kɛnɛ ka mbuta etena kashaso anto periodikɛ. Koko ndeka dimɛna wɛ kamba la mbɔtwɛlɔ ka wɔdu ndo ka mondo. Kamba la mbɔtwɛlɔ kele dimɛna le yɛ ndo kele la etombelo w’ɛlɔlɔ. Ɛnya nɛmɔ di’efula diele la periodikɛ ndo onga la wangasanu. Naka wɛ ndjalɔngɔsɔla dimɛna, kete wɛ ayoleka monga la akoka wa mbisha Tshoto y’Etangelo la Réveillez-vous! le wanɛ ‘wakoka nongola lɔsɛnɔ la pondjo.’​—⁠Etsha 13:⁠48.

Woho wa mbisha anto periodikɛ

Tshoto y’Etangelo Ngɔ. ka 11, 15

“Lam’ele awui wa kɔlɔ wamboleka efula l’andja ɔnɛ, anto amɔ ndjambolaka ɔnɛ: ‘Lande na kahombami mbidja welo efula dia salaka awui la losembwe na?’ Onde wɛ atayambolaka dimbola sɔ ndoko lushi? [Tshikande akadimole.] Tende ɛtɛkɛta ɛnɛ wakeketsha. [Adia Tukedi 2:​21, 22.] Periodikɛ kɛnɛ nembetshiyaka ɔkɔkɔ woleki woke wahombaso monga la losembwe.”

Réveillez-vous! Ngɔ. ka 11

“Anto amɔ fɔnyaka dia Nzambi mbele l’onongo w’akambo tshɛ watomba. Etena katomba mpokoso kɛmɔtshi, vɔ mbutaka ɔnɛ Nzambi ekɔ la ɔkɔkɔ w’oshika wetawende dia mpokoso kakɔ tomba. Wɛ akanayɛ lo dikambo sɔ? [Tshikande akadimole. Oma lâsɔ adia Jakoba 1:13.] Periodikɛ kɛnɛ mɛnyaka kɛnɛ kata Bible lo dikambo dia kiɔkɔ y’asui ndo kɛnɛ kasala Nzambi dia mbashidiya.”

Tshoto y’Etangelo Ngɔ. ka 12, 1

“Onde wɛ fɔnyaka dia prɔfɛsiya kɛnɛ ka lo Bible kekɔ lo kotshama nshi nyɛ? [Adia Mateu 24:11. Oma lâsɔ tshikande akadimole.] Periodikɛ kɛnɛ tɛkɛtaka dia wetshelo ɛmɔtshi wambeyama le anto efula. Tɔ tɛnyaka nto woho wakokaso mbewɔ diaha kesama oma le embetsha wa kashi.”

Réveillez-vous! Ngɔ. ka 12

“Akokayɛ sɔna oko onto loleki woke lo tena tshɛ? [Tshikande akadimole.] Anto efula mbɔsaka Yeso oko onto loleki woke. Tende kɛnɛ kayondosala lo dikambo dia nkɛtɛ oko wende Omboledi wa Diolelo dia Nzambi. [Ɛnyande osato wele lo lɛkɛ 8-9, ndo adia divɛsa ɔtɔi lo wanɛ woshilami.] Periodikɛ kɛnɛ mɛnyaka woho akɔna ndo ngande wayokotsha Yeso akambo anɛ.”