Onde kɛnɛ mbakasangoya Nzambi?

NAKA wɛ mbadia oseka jurnalɛ tshɛ, menda lo televiziɔ kana mpokamɛ aradiyo, kete wɛ ayɛna kana ayoka akambo efula wendana l’awui wa diakatanelo, w’ata kana wa dengalenga. Ohokanyiya dikambo dia ekakatanu wele layɛ. Ondo hemɔ kana nyɔi ka lakiyɛ la ngandji ekɔ lo kosha ɔkɛi w’efula. Ondo wɛ mbeyaka ndjaoka oko wakayaoke Jɔbɔ laki onto ɔlɔlɔ, lakate ate: “Lambomenama l’atei w’asui!”—Jɔbɔ 10:15.

Yambola wate:

Onde kɛnɛ mbakasangoya Nzambi dikambo diami ndo dia anto akina?
Lende akokami ntana ekimanyielo dia nkandola ekakatanu ami?
Onde elongamelo kɛmɔtshi kekɔ ka tayonga ki lushi lɔmɔtshi la nkɛtɛ?

Bible mbishaka ekadimwelo w’eshika lo ambola asɔ.

BIBLE MBETSHAKA DIA AWUI ANƐ MBAYOSALA NZAMBI LA NKƐTƐ.

Nde ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto.”—Ɛnyɛlɔ 21:4

“Akanga a tshumbi wayulimbolimbo uku peli.”—Izaya 35:6

“Ashu w’akanga a tutshungu wayosena.”—Izaya 35:5

“Wanɛ tshɛ wele lo waombo wohɔma wayoka dui diande ko wayotomba.”—Joani 5:28, 29

‘Ndoko onto lodjashi lɛkɔ layota ate: Lekɔ la hemɔ.’—Izaya 33:24

‘Ntɔngɔ yayoyala tshavutshavu la nkɛtɛ.’—Osambo 72:16

Nkɛtɛ kambokadimɔ oko wakasangoya Nzambi: Esombe waya akɛnda, akanga wa hemɔ ndo wa totshungu wambɔkɔnɔ, wanɛ wakavu wambolwama, mbo ya ndɛ yaya tshavutshavu

KONDJA WAHƆ OMA LO KƐNƐ KETSHA BIBLE

Totake esadi eto wate awui wɛnyishawɔ lo ndjɛkɛ y’etatelo nyɛ wekɔ tsho awui wakombola anto koko hawotokotshama. Nzambi mbakalake dia nsala awui akɔ ndo Bible nembetshiyaka woho wayondâsala.

Pami kɛmɔtshi etsha pami kekina Bible lo nkamba la dibuku Bible etshatɔ

Bible hakomɛ tsho lo mbisha elembetshielo ɛsɔ. Tɔ tokimanyiyaka dia monga la lɔsɛnɔ la ɔngɛnɔngɛnɔ kânga nshi nyɛ. Ohokanyiya yema dikambo dia ekiyanu wele la yɛ ndo dia akambo wakotshindja wɔɔngɔ. Mbeyaka monga ohomba wa falanga, ekakatanu wa lo nkumbo, hemɔ, kana nyɔi ka lakiyɛ la ngandji. Bible koka kokimanyiya dia nkandola ekakatanu wa nshi nyɛ, ndo tɔ koka kokeketsha etena kakadimolatɔ ambola anɛ:

Lande na kasowaso?
Ngande wakokaso ndɔshana la ekiyanu wa lo lɔsɛnɔ?
Akokaso nsala dia nkumbo kaso ndeka monga la lɔsɛnɔ la ɔngɛnɔngɛnɔ?
Ngande wayalaso etena kavɔso?
Onde tokɛna wakiso wa ngandji wakavu nto?
Ngande wakokaso nshikikɛ dia Nzambi ayokotsha alaka ande wendana la nshi yayaye?

Woho weyɛ lo mbadia dibuku nɛ mɛnyaka dia wɛ nangaka mbeya kɛnɛ ketsha Bible. Dibuku nɛ diayokokimanyiya. Edingɔ wa lɔkɔ wekɔ la ambola wɔtɔnɛ la wɔ l’ɛse ka dikatshi. Miliyɔ y’anto ngɛnangɛnaka shambo ya mboka dimbola ko nyanga okadimwelo etena kasawolawɔ awui wa lo Bible vɔ la Ɛmɛnyi wa Jehowa. Sho nongamɛka dia wɛ lawɔ ayɔngɛnangɛna shambo shɔ. Nzambi akɔtshɔkɔlɛ etena kɛnɛ kotshayɛ nsala dikambo dia wangasanu ndo dia ɔngɛnɔngɛnɔ dia mbeka kɛnɛ ketsha Bible mɛtɛ!