Ekadimwelo lo ambola anyu

◼ Kakɔna kahombaso nama lo yimba naka sho kombolaka dia okongamelo waki Jehowa ndjɔsa diangɔ diaso dimɔtshi kana tshɛ l’ɔkɔngɔ wa nyɔi kaso?

Etena kavɔ anto, vɔ hawonge nto l’akoka wa nama diangɔ diaki la wɔ. (Und. 9:5, 6) Diakɔ diele la ntondo ka vɔ mvɔ, anto efula fundaka tɛstama kɛnya woho wahomba diangɔ diawɔ ndjokahanyema. (2 Khum. 20:1) Tɛstama kɛsɔ mɛnyaka nto onto lahomba ndjokahanya diangɔ sɔ. L’ahole efula, naka tɛstama kɛsɔ bu, kete lɛɛta mbayɔsa yɛdikɔ ya kahanya diangɔ diaki onto lambovɔ. Oma lɔkɔ, naka tekɔ la kɛnɛ kakombolaso lo yoho ya lânde, ɛnyɛlɔ di’okongamelo waki Jehowa ndjɔsa diangɔ diaso dimɔtshi kana tshɛ l’ɔkɔngɔ wa nyɔi kaso, kete ekɔ ohomba sho mfunda tɛstama kɛnya dikambo sɔ ndo kɛnya onto lahomba ndjokahanya diangɔ diakɔ.

Onto lahomba kahanya diangɔ di’onto lambovɔ ekɔ la ɔkɛndɛ wa woke. Lo ndjela lofulo la falanga kana la diangɔ diotshiki onto lambovɔ, otshumanyelo ndo okahanyelo adiɔ kokaka nɔmba awui efula ndo kokaka mbɔsa nshi efula. Ndo nto, mbala efula lɛɛta mɛnyaka kɛnɛ kahomba salema. Aha onto tshɛ la l’etshumanelo mbakoka monga okahi wa dimɛna wa diangɔ sɔ. Sho pombaka nsɔna onto leyaso dia nde ekɔ l’akoka, onto lakokaso mbɛkɛ otema le nde ndo layonga suke dia ndjoyela kɛnɛ kakatafunde.—Nyende sawo diele l’ɔtɛ a dui ɔnɛ: “Nɔngɔsɔla woho wayoyokahanyema diangɔ diaso ekɔ dui dia lomba,” dia lo Réveillez-vous ! wa Ngɔndɔ ka dikumi l’ahende 8, 1998 lo Falase.

Kɛnɛ kahombayɛ nsala naka wambokɔsɔna oko onto layokahanya diangɔ: Naka onto ɔmɔtshi ambokɔlɔmba dia wɛ ndjɔlɔmbɔla okahanyelo wa diangɔ diande l’ɔkɔngɔ wa nyɔi kande, kete ntondotondo takanyi yimba ndo nshikikɛ lo dɔmbɛlɔ kana wɛ ayonga l’akoka wa nkotsha ɔkɛndɛ ɔsɔ. (Luka 14:28-32) L’ɔkɔngɔ w’onto akɔ mvɔ, wɛ pombaka nsawola la wanɛ wele la lotshungɔ la nkondja yangɔ mɔtshi. Naka wɛ ambokondja lotshungɔ la nsala dui sɔ, kete wɛ mbele l’ɔkɔndɛ wa kahanya diangɔ lo ndjela ɛlɛmbɛ wa lɛɛta ndo lo ndjela tshɛ kofundami lo tɛstama. Onto lakahanya diangɔ pombaka mbeya dia oyadi diangɔ diekɔ efula kana yema tshitshɛ, nde pombaka ndjela kɛnɛ kofundami lo tɛstama. Teye dia weshasha tshɛ wakimɔma dikambo dia tshunda dimɔtshi dieyama le lɛɛta diakamba la Ɛmɛnyi wa Jehowa ekɔ weshasha waki okongamelo waki Jehowa.—Luka 16:10; 21:1-4.