Nzambi nangaka dia sho nsɛna pondjo pondjo lo wɔladi ndo la ɔngɛnɔngɛnɔ lo paradiso ka lanɛ la nkɛtɛ!

Koko, wɛ mbeyaka ndjambola ɔnɛ: ‘Ngande wakoka dikambo sɔ salema?’ Bible mbutaka dia Diolelo diaki Nzambi diayosala dikambo sɔ ndo ɔnɛ Nzambi nangaka dia weho w’anto tshɛ mbeka awui wendana la Diolelo sɔ ndo la sangwelo diande lo dikambo diaso.​—Osambu 37:11, 29; Isaya 9:7.

Nzambi nangaka dia sho nkondja wahɔ.

Oko watokombolɛka ombutshi wa pami w’ɔlɔlɔ anande kɛnɛ koleki ɔlɔlɔ, mbele ndo Shɛso lele l’olongo kombolaka dia sho monga la ɔngɛnɔngɛnɔ wa pondjo. (Isaya 48:17, 18) Nde akalake di’onto tshɛ ‘lasala lolango laki Nzambi mbayotshikala pondjo pondjo.’​—1 Joani 2:17.

Nzambi nangaka dia sho nkɛndakɛnda lo mboka yande.

Bible mbutaka dia Otungi aso nangaka ‘tetsha mboka yande’ dia sho ‘nkɛndakɛnda lo mboka yakɔ.’ (Isaya 2:2, 3) Nde akasɔnɛ “antu amotshi . . . dia lukumbu landi,” woho wa vɔ mbewoya anto lolango lande lo nkɛtɛ k’otondo.​—Etsha 15:14.

Nzambi nangaka dia sho monga kâmɛ l’ɔtɛmwɛlɔ ande.

Ɔtɛmwɛlɔ wa pudipudi waki Jehowa hawodje diatɔnelo lam’asa anto, koko vɔ salaka di’anto monga kâmɛ ndo mbokana ngandji ka mɛtɛ. (Joani 13:35) Ɛlɔ kɛnɛ waa na wetsha apami la wamato wa l’ahole tshɛ dia kambɛ Nzambi lo kâmɛ? Tambokɔlɔmba dia wɛ mbeya anto asɔ l’ekimanyielo ka biukubuku nyɛ.

Onde wɛ mbeyaka Ɛmɛnyi wa Jehowa ɛmɔtshi? Mbeyaka monga ko amɔtshi l’atei aso wekɔ asukanyi ayɛ, asekayɛ wa l’olimu kana wa la kalasa. Kana mbala mɔtshi tambosawolaka la yɛ awui wa lo Bible. Waa na mɛtɛ weso, ndo lande na kewoyaso anto dietawɔ diaso lo sɛkɛ?

Sho tekɔ anto k’anto. Sho ndja oma l’ahole wotshikitanyi ndo tekɔ la nsɛnɔ yotshikitanyi. Amɔtshi l’atei aso waki l’ɛtɛmwɛlɔ wotshikitanyi ndo komonga la mbetawɔ le Nzambi. Koko, la ntondo ka sho ndjokoma Ɛmɛnyi wa Jehowa, sho tshɛ takayatshungwɛ etena ka nsɛdingola la yambalo tshɛ wetshelo wa lo Bible. (Etsha 17:11) Taketawɔ kɛnɛ kakawatetsha ndo oma lâsɔ, shamɛ takɔshi yɛdikɔ ya ntɛmɔla Jehowa Nzambi.

Tekɔ lo nkondja wahɔ oma lo wekelo wa Bible. Oko anto akina tshɛ, sho lawɔ pombaka ndɔshana l’ekakatanu ndo la wɛɔdu aso hita. Koko, lo nsala la wolo dia nkamba l’atɔndɔ wa lo Bible lo lɔsɛnɔ laso la lushi la lushi, tambɛna woho wambolowanyema nsɛnɔ yaso. (Osambu 128:1, 2) Ɔsɔ ekɔ ɔkɔkɔ ɔmɔtshi wɛnya lande na kasambishaso anto akina awui w’amɛna wamboteka oma lo Bible.

Sho sɛnaka lo yoho yɔtɔnɛ l’ɛlɛmbɛ waki Nzambi. Oko wadietsha Bible, ɛlɛmbɛ ɛsɔ tokimanyiyaka dia sho monga l’ɔngɛnɔngɛnɔ, nɛmiya anto akina ndo monga la waonga wele oko, losembwe la kɛtshi. Vɔ tokimanyiyaka nto dia monga l’alemba w’amɛna ndo anto w’eshika lo tshunda. Vɔ kimanyiyaka ase nkumbo dia monga kâmɛ ndo la lɔkɛwɔ l’ɔlɔlɔ. Oko weso l’eshikikelo dia ‘Nzambi kema la shɔnɔdi,’ tekɔ lo ndjaoka dia taya lo nkumbo ka lo nyuma k’onto l’ɔnango ka l’andja w’otondo, lɛnɛ ele diatɔnelo dioye oma lo nkoho y’alemba ndo awui wa pɔlitikɛ diaya bu. Kânga mbeso anto k’anto, tekɔ lo nkenga wodja wa lânde.​—Etsha 4:13; 10:34, 35.

• Awui akɔna wafɔna Ɛmɛnyi wa Jehowa l’anto akina?

• Ɛlɛmbɛ akɔna wambeka Ɛmɛnyi wa Jehowa oma lo wekelo wa Bible?

Anto efula fɔnyaka dia lokombo Ɛmɛnyi wa Jehowa ekɔ lokombo l’ɔtɛmwɛlɔ w’oyoyo. Koko, ambeta ɛnɔnyi ndekana 2 700 wakelamɛka ekambi waki Nzambi ɔtɔi ka mɛtɛ ɔnɛ “emenyi” ande. (Isaya 43:10-12) Polo ndo lo 1931, wakatelɛka ɔnɛ: Ambeki wa Bible. Ko lande na kakatayɔsaka lokombo la Ɛmɛnyi wa Jehowa?

Lokombo laso mɛnyaka ɔnɛ lele Nzambi kaso. Lo ndjela efundelo w’edjedja wakafundama l’anya, lokombo laki Nzambi, Jehowa, lakatanemaka mbala nunu lo Bible. Lo dikadimwelo efula dia Bible, wakahɛnya lokombo lɔsɔ la titrɛ yele oko Nkumadiɔndjɔ kana Nzambi. Koko, Nzambi ka mɛtɛ akayaeyanya le Mɔsɛ lo lokombo lande hita, Jehowa, lo mbuta ɔnɛ: “Oso eli lukumbu lami la pundju.” (Etumbelu 3:15) Lo nsala ngasɔ, nde akayatshikitanya la tozambizambi ta kashi tshɛ. Tekɔ lo ndjaɔsa la nɛmɔ lo woho welamɛso lo lokombo l’ekila laki Nzambi.

Lokombo laso mɛnyaka ɔkɛndɛ wele la so. Lo nshi y’edjedja, anto efula, ntatɛ oma le Abɛlɛ onto ɔlɔlɔ, wakelamɛ ɔnɛ ɛmɛnyi l’ɔtɛ wa mbetawɔ kaki la wɔ le Jehowa. L’edja ka ntambe efula, Nɔa, Abrahama, Sara, Mɔsɛ, Davidi ndo anto akina wakakenge “ului a wuki w’emenyi.” (Heberu 11:4–12:1) Oko wakoka onto ɔmɔtshi monga ɔmɛnyi la ntondo ka tuminadi dia swɛlɛ onto lele bu l’onongo, mbele tamboyashikikɛ dia mbeyanya akambo wa mɛtɛ wendana la Nzambi kaso.

Sho mbokoyaka Yeso. Bible mbêlɛka ɔnɛ: ‘Ɔmɛnyi wa kɔlamelo ndo wa mɛtɛ.’ (Enyelo 3:14) Yeso ndamɛ mbutaka dia nde ‘akeyanya lokombo laki Nzambi’ ndo akatetemala ‘nsambisha akambo wa mɛtɛ’ wendana la Nzambi. (Joani 17:26; 18:37) Ɔnkɔnɛ, ambeki wa mɛtɛ waki Kristo pombaka mbelamɛ lokombo la Jehowa ndo lieyanya. Kɛsɔ mbayatshutshuya Ɛmɛnyi wa Jehowa dia nsala.

• Lande na kakɔshi Ambeki wa Bible lokombo la Ɛmɛnyi wa Jehowa?

• Edja ka ngande kambonga Jehowa la ɛmɛnyi lanɛ la nkɛtɛ?

• Onto akɔna ele Ɔmɛnyi wa Jehowa woleki woke?