Ekadimwelo lo ambola anyu

◼ Kakɔna kahomba ana mbetshama dia vɔ mpama lo nyuma?

Ambutshi w’Akristo pombaka nsala awui efula dia mbodia anawɔ “lo ohokwelo ndo lo alako wa Jehowa.” (Ɛf. 6:4) Ɛnyɛlɔ, ambutshi wakɛnyi dia ekɔ ohomba sɛdingolaka divɛsa dia lushi la lushi kaamɛ l’anawɔ pindju tshɛ. Etena kasalawɔ ɔtɛmwɛlɔ wa lo nkumbo ndo lo waaso akina, ase nkumbo mbeyaka menda ndo nkɛtshanya awui wa lo vidɛo mɔtshi kaamɛ, nkɛtshanya awui amɔtshi wa laande w’oma lo asawo wata ɔnɛ Les jeunes s’interrogent, nsala kɛnyɔ y’awui wa l’ɔkɔndɔ ɔmɔtshi wa lo Bible kana nkamba l’awui akina. Koko, dia ana “monga anto wambotshunda,” ambutshi pombaka mbaetsha nto akambo wa mɛtɛ wa lo Bible lo yoho ya lotshimola.—Hɛb. 6:1.

Tende yema awui wetshaso anto wahomana la so l’ɛtshi kaso ka nkɛtɛ. Mbala ka ntondo kasambishaso onto kana lo wembwelo wayela, mbala efula sho totatɛka mbeka l’onto Bible lo nkamba la dibuku Bible etshatɔ mɛtɛ? L’ɔkɔngɔ wa sho nshidiya dibuku sɔ, sho kambaka la dibuku “Nyotshikale lo ngandji ka Nzambi.” Lande na? Nɛ dia dibuku Bible etshatɔ mbishaka ambeki ewo ka wetshelo w’etatelo wa l’Afundelo. Dibuku “Ngandji ka Nzambi” mbaetshaka woho wa nkamba l’atɔndɔ wa lo Bible lo lɔsɛnɔ la lushi la lushi. Mbeka abuku asɔ tshɛ kimanyiyaka eyoyo dia mbika “edio” le Kristo ndo ‘nshikimala lo mbetawɔ.’ (Kɔl. 2:6, 7) Shi ndo anaso koka nkondja wahɔ oma l’abuku asɔ? Vɔ lawɔ wekɔ l’ohomba wa mbetshama awui wendana la olambo w’etshungwelo, Diolelo ndo eongelo k’anto wakavu. Ana wekɔ nto l’ohomba wa mbeya lande na katshika Nzambi asui ndo kɛnɛ kashikikɛ dia tekɔ lo nsɛna lo nshi y’ekomelo ka dikongɛ nɛ di’akambo. Vɔ pombaka nshikikɛ dia Ɛmɛnyi wa Jehowa mbetshaka akambo wa mɛtɛ. Ɛlɔngɔlɔngɔ wekɔ nto l’ohomba wa nshihodia atɔndɔ wa lo Bible ndo woho wakokawɔ mbekiya “akoka awɔ w’ekanelo ka yimba.” (Hɛb. 5:14) Lo mɛtɛ, ambutshi pombaka menda ɛnɔnyi ndo akoka wele l’anawɔ dia nshihodia akambo. Koko, ana efula wekɔ l’akoka wa ntatɛ mbeka akambo wa mɛtɛ wa lo Bible lo yoho ya lotshimola oyadi weke tɔkɛndakɛnda.—Luka 2:42, 46, 47.

Dia nkimanyiya ambutshi dia nsala dui sɔ, asawo wa wekelo wɔsami lo dibuku Bible etshatɔ wayotanemaka lo jw.org. Ase nkumbo koka ntana asawo asɔ lo sitɛ kaso k’Ɛtɛrnɛtɛ lo mbɔtɔ lam’ofundjiwɔ WETSHELO WA LO BIBLE oma laasɔ ƐLƆNGƆLƆNGƆ. Lo nshi yayaye, wayɔlɔngɔsɔla asawo akina wa wekelo wɔsami oma lo dibuku “Ngandji ka Nzambi.” Lo mɛtɛ, sho koka nkamba ndo la abuku wakashile tondjama. Ambutshi koka nshikikɛ dia kana vɔ koka nkamba la asawo asɔ l’etenyi kɛmɔtshi k’Ɔtɛmwɛlɔ wa lo nkumbo wa la dikɔlɔ, etena ketshawɔ ɔna l’ɔna kana etena kalowanyawɔ ɔna dia nde salaka wekelo w’onto ndaamɛ.