‘Tɔkɛndɛkɛndɛ la mbetawɔ, koko aha la lɛɛnɔ’

Yema tshitshɛ la ntondo ka Jɛrusalɛma dingama ndo ndanyema, ɔpɔstɔlɔ Pɔɔlɔ akafunde ɔnɛ lam’ele Akristo wekɔ asɔlayi w’eshika waki Kristo, vɔ pombaka nongamɛ ekakatanu wa wolo ndo vɔ hawohombe mbetsha ɛngɛnɔngɛnɔ awɔ lo dihole dia ntondo. (2 Tim. 2:3, 4) Lo kɛnɛ kendana la mpokoso kayanga komɛ andja wa kɔlɔ ɔnɛ, sho pombaka monga la mbetawɔ ka wolo dia sho ndeka mbidja yimba lo akambo wa lo nyuma. (2 Kɔr. 4:18; 5:7) Enda vidɛo nyɛ yele l’ɔtɛ a dui ɔnɛ: ‘Tɔkɛndɛkɛndɛ la mbetawɔ, koko aha la lɛɛnɔ,’ lo Falase. (Tshɔka lo jw.org, l’ɛse ka lanɛ wofundjiwɔ ɔnɛ PUBLICATIONS >VIDEOS.) Lembetɛ woho wele ndeka ndjasha lo lomombo la l’emunyi akayonga tshondo ya djonga ya nyɔi le Nahama nde la Abitalɛ. Oma laasɔ, nyovusole ambola wayela ɛnɛ.

1) Aaki ‘ɛngɔ ka wɔnɔnyi kakemala lo dihole di’ekila’ lo ntambe ka ntondo ndo naa yɛdikɔ ya wolo yakahombe mbɔsa Akristo wakasɛnaka la Jɛrusalɛma? (Mat. 24:15, 16) 2) Lande na kele ndawɔ oma l’osomba akalɔmbaka di’onto monga la mbetawɔ? 3) Diangɔ diakɔna diakahombe ndjahombia wanɛ wakahombe ntomba oma l’osomba? 4) Lande na kakatshimbatshimbaka Nahama nde la Abitalɛ? (Mat. 24:17, 18) 5) Naa ohemba okina wa mbetawɔ wakahomana la Rashɛlɛ etena kakandayatombaka oma la Jɛrusalɛma? (Mat. 10:34-37; Makɔ 10:29, 30) 6) Ngande wakatotshikɛ Etana ɛnyɛlɔ kadimɛna ka mbetawɔ ndo k’onto lakayaɛkɛka le Jehowa? 7) Naa ekakatanu wa wolo wakahomana l’Akristo la Pela? 8) Ngande wakayɔɔlaka mbetawɔ kaki Nahama nde la Abitalɛ yema yema? 9) Ngande wakakokɛ Jehowa Akristo wakasɛnaka la Pela? (Mat. 6:33; 1 Tim. 6:6-8) 10) Ngande wakokaso mbokoya mbetawɔ k’Abrahama ndo ka Sara oko wasɛnaso lo ekomelo ka dikongɛ nɛ di’akambo? (Hɛb. 11:8-10) 11) Ngande wakayaetawoya Nahama nde la Abitalɛ vɔamɛ dia vɔ nkalola la Jerusalɛma, ndo lande na kele ekanelo kawɔ kaki kɔlɔ? (Luka 21:21) 12) Ngande waki lɔsɛnɔ la Jɛrusalɛma etena kakakalola Nahama nde la Abitalɛ? 13) Lande na kahombaso nkeketsha mbetawɔ kaso ɛlɔ kɛnɛ, la ntondo ka ekomelo ka dikongɛ nɛ di’akambo ndja?—Luka 17:31, 32; 21:34-36.

Nkɛndakɛnda la mbetawɔ nembetshiyaka 1) ndjaɛkɛ lo ɛlɔmbwɛlɔ ka Jehowa, 2) tshika dia ɛlɔmbwɛlɔ kande nɔmbɔla ekolo aso, ndo 3) mɛnya dia sho mbɔsaka akambo wa lo nyuma la nɛmɔ dioleki akambo wa lo demba. Nyɛsɔ toleke ndjashikikɛ dia nkɛndakɛnda lo mbetawɔ, teya dia “andja ɔnɛ la nsaki yawɔ wekɔ lo tete, koko ɔnɛ lasala lolango la Nzambi tshikalaka pondjo.”—1 Jni. 2:17.