Alaka wendana la Diolelo​—Mbetɛ diangɔ tshɛ eyoyo

OHƆSA dia wɛ ambomba olowa ɔmɔtshi wa dimɛna efula wambɛla. Wɛ ambɔngɛnangɛna opumɔ awɔ ndo ambowodja lo kisaka. Wɛ ambokamba olimu l’edja ka wenya efula, koko wɛ akayaoke dia wɛ eke la wolo wa ntetemala nkamba. Mama kayɛ nde lawɔ ekɔ lo mimba elowa l’ɔngɛnɔngɛnɔ tshɛ suke la yɛ, atasawola l’ase nkumbo akina ndo l’asekanyu akina wakaye dia ndjonyokimanyiya. Wɛ ambohɔ woho waki mama kayɛ eke osekaseka etena kakiyɛ eke dikɛnda. Wɛ ekɔ l’okakatanu dia mbetawɔ woho wakandayokoma opalanga l’andja w’edjedja. Wɛ ambohɔ etena kakooheke hemɔ, kakayookimɛ lo lonya etena kakandakitshiya ndo kakanyatshu dia tookundɛ. Koko kakianɛ, nde aya la lɔsɛnɔ ndo la yoonge ya dimɛna oko anto akina.

Sho mbeyaka dia nshi yayosalema akambo asɔ yekɔ lo ndjaye. Sho mbetawɔka dui sɔ, nɛ dia alaka waki Nzambi hawetaka pa. Lo etenyi kɛnɛ, tayɔsɛdingola woho wayokotshama alaka waki Nzambi lo nshi yayaye ndo wayoya ta dia Aramangɛdɔna. Tayɔsɛdingola nto alaka amɔtshi wa diambo wayokotsha Diolelo lo nshi yayaye. Ande ɔngɛnɔngɛnɔ wayonga la so dia mɛna etena kayolɛ Diolelo diaki Nzambi lo nkɛtɛ k’otondo ndo mbetɛ diangɔ tshɛ eyoyo lee!