Tokotodja ntondo wɔladi lam’asayɛ la ɔnanyɔ​—Lo nsala na?

Ohokanyiya dia wɛ ekɔ lo mbidjasɛ la Ngalileya lo nshi ya Yeso. Wɛ ambonda lɔkɛndɔ otsha la Jɛrusalɛma dia tosala Fɛtɛ ka Totombotombo. Osomba wambolola l’asekayɛ atɛmɔdi woye oma l’ahole wa tale efula woye dia ndjembola. Wɛ ekɔ lo nanga nambola Jehowa olambo ɔmɔtshi. Ko, wɛ amboya la mbudi kayɛ, wɛ ambotatɛ mbatola mboka kayɛ otsha l’osomba wele l’anto efula otsha lo tɛmpɛlɔ. Etena kamboyokoma, wɛ ambɛna dia anto akina vɔ la wɔ wekɔ lo nanga nambola olambo. L’ekomelo, etena kambokoka ka wɛ mbisha ɛlɔmbɛdi mbudi kayɛ. L’etena kakɔ kaamɛ wɛ ambohɔ dia ɔnanyɔ, lakoka monga lo dihole dimɔtshi l’olui w’anto kana l’osomba, ekɔ la yɛ la dikambo. Yeso ambolembetshiya kɛnɛ kahombayɛ nsala. (Adia Mateo 5:24.) Ngande wakokayɛ mbidja wɔladi la ɔnanyɔ lakayasalɛ kɔlɔ oko wakate Yeso? Lo oseka listɛ tshɛ lele l’ɛse, fatola okadimwelo wele dimɛna.

WƐ POMBAKA . . .

• ntɛkɛta la ɔnanyɔ paka naka wɛ fɔnyaka dia nde aki l’ɔkɔkɔ w’oshika wa nde momala

• nsala la wolo dia nɔngɔsɔla ekanelo ka yimba kaki ɔnanyɔ naka wɛ mɛnaka dia nde ekɔ kanga nyangunyangu kana ekɔ lo komama onongo

• mpokamɛ la solo dia lotutsha tshɛ etena kakɔkɛnɛmɔlɛ ɔnanyɔ ndo oyadi kaanga naka wɛ hashihodia dimɛna dimɛna, lɔmbande edimanyielo l’otema ɔtɔi lo woho wayaokande dia nde ekɔ la lonyangu kana l’ɔtɛ wa etombelo wakoke monga l’etsha ayɛ

ƆNANYƆ POMBAKA . . .

• nyanga osukɔ oma le anto akina wa l’etshumanelo lo mbatɛ woho wosaleyɛ kɔlɔ

• kohangwɛ, nsɛdingola kiambokambo tshɛ yakayosale, ndo nde kotɛ dia wɛ mbetawɔ munga

• monga l’okitshakitsha ndo dihonga dialɔmbama dia ndjasukanya la yɛ ndo kodimanyiya oma k’ɛse otema

Kaanga mbele atɛmɔdi wa lo nshi nyɛ hawoyokimɔ elambo wa nyama, kakɔna kaketsha Yeso lo dikambo dia diɔtɔnganelo diele lam’asa mbidja wɔladi la ɔnanyɔ ndo ɔtɛmwɛlɔ ayɛ mbetawɔma oma le Nzambi?