Onto lakahombe nɔngɔsɔla mboka ambotɔ

Elizabɛtɛ aya suke la mbota. Mariya w’owotɔ ande akatshikala la nde l’edja ka ngɔndɔ shato. Wonya ɔnɛ etena kambokoka ka Mariya nkalola ndo minda lɔkɛndɔ l’otale otsha lo ngelo kande lo nɔrdɛ k’akona wa Judeya la Nazarɛtɛ. L’ɔkɔngɔ wa ngɔndɔ shamalo, Mariya nde lawɔ ayanga mbota.

Keema edja l’ɔkɔngɔ wa Mariya mimɔ oma la lende, Elizabɛtɛ akote. Ande ɔngɛnɔngɛnɔ waki la wɔ lo woho wakotɔ ɔna aha l’okakatanu ndo woho waki Elizabɛtɛ la ɔnakɔ wele l’alemba w’amɛna lee! Etena kakɛnya Elizabɛtɛ asukanyi ndo ewotɔ ande ɔna, vɔ wakangɛnangɛna kaamɛ la nde.

Ɛlɛmbɛ wakasha Nzambi ase Isariyɛlɛ wakataka dia lushi l’enanɛi l’ɔkɔngɔ wa eotwelo, ɔna pami pombaka minyɛma ɔpɔpɔ ndo oma laasɔ mbakawahombaka mbɔlɛ ɔnakɔ lokombo. (Akambo w’ase Lɛwi 12:2, 3) Anto amɔtshi wakataka dia pombaka mbisha Zɛkariya ndoyi. Koko, Elizabɛtɛ akate ate: “Keema, nyowɔlɛ Joani.” (Luka 1:60) Nɛ dia nde akohɔ kɛnɛ kakawotɛ ondjelo Ngabriyɛlɛ dia ɔna pombaka mbɔlamɛ lokombo ɔnɛ Joani.

Asukanyi ndo ewotɔ ande wakatone ɔnɛ: “Ndooko ose nkumbo kanyu ɔtɔi lele la lokombo lɔsɔ.” (Luka 1:61) Lo nkamba la tɔjɛstɛ, vɔ wakambola Zɛkariya lokombo lahombawɔ mbɔlɛ ɔnande. Zɛkariya akalɔmbɛ dibaya ko akafunde ate: “Lokombo lande Joani.”​—Luka 1:63.

Lo mfunda dikambo sɔ, lomi laki Zɛkariya lakashile lo yoho ya dihindo. Wɛ koka mbohɔ dia nde akashisha akoka ande wa ntɛkɛta etena kakinde kombetawɔ kɛnɛ kakawotɛ ondjelo ɔnɛ Elizabɛtɛ ayota ɔna. Koko wonya ɔnɛ, etena kambɔtɛkɛta Zɛkariya, asukanyi ande wambamba ndo wamboyambola ɔnɛ: “Ngande wayoyala ɔna ɔsɔ?” (Luka 1:66) Vɔ wakɛnyi lonya la Nzambi lo woho wakawawɔlɛ lokombo Joani.

Ɔnkɔnɛ, Zɛkariya akalodiama la nyuma k’ekila lo mbuta ɔnɛ: “Jehowa Nzambi k’Isariyɛlɛ atombɔme, nɛ dia nde ambodja anto ande yimba ndo ambowatshungola. Ndo nde ambototondjɛ loseke la panda lo luudu l’okambi ande Davidɛ.” (Luka 1:68, 69) Lo mbuta ɔnɛ “loseke la panda,” nde akatɛkɛtaka dia Nkumadiɔndjɔ Yeso, ɔnɛ laki suke la mbotɔ. Zɛkariya akate dia lo tshimbo y’Onto ɔsɔ, Nzambi “[ayototshungola] oma l’anya w’atunyi aso, nde tosha diɛsɛ dia sho mbokambɛ olimu w’ekila aha la mboka wɔma, la kɔlamelo ndo la losembwe la ntondo kande nshi tshɛ ya lɔsɛnɔ laso.”​—Luka 1:74, 75.

Lo dikambo di’ɔnande ɔsɔ, Zɛkariya akatatshi ate: “Wayokelɛ ɔnɛ omvutshi wa Ɔnɛ-Laheme-Tshɛ, nɛ dia wɛ ayeta la ntondo ka Jehowa dia nɔngɔsɔla mboka yande, dia mbisha anto ande ewo ka panda oma lo edimanyielo ka pɛkato yawɔ, l’ɔtɛ wa kɛtshi k’efula kaki Nzambi. Kɛtshi k’oma l’olongo kɛsɔ kayonga oko osase wa wonya wahɛta la pindju, dia ngamulɛ wanɛ wodjashi lo wodjima ndo wele lo dɛdi dia nyɔi osase, dia nɔmbɔla ekolo aso lo mboka ka wɔladi.” (Luka 1:76-79) Ande prɔfɛsiya kakeketsha kɛsɔ lee!

Lo etena kɛsɔ, Mariya lele mɛtɛ atatshukama, akakome lakawɔ la Nazarɛtɛ. Kakɔna kayowokomɛ etena kayeya anto dia nde aya la diemi?