ETENYI 5
Kalola le ‘Olami w’ɛkɔkɔ ndo Omendji w’anima ayɛ’
Onde wɛ kokaka mbuta okakatanu ɔtɔi kana efula wɔtɛkɛtami lo biukubuku nyɛ? Naka eelo, kete wɛ ekɔ l’atei w’anto w’ɛlɔlɔ. Ekambi efula waki Nzambi wa kɔlamelo wa lo nshi yakafundamaka Bible ndo wa nshi nyɛ wakadiɛnɛ kana wekɔ lo diɛnɛ l’ekakatanu akɔ waamɛ. Oko wakawakondja ekimanyielo oma le Jehowa dia nkandola ekakatanu ɛsɔ, mbakokayɛ ndo wɛ lawɔ nkondja.
Jehowa ayokokimanyiya naka wɛ nkalola le nde
ONGA l’eshikikelo dia Jehowa ayokokimanyiya naka wɛ nkalola le nde. Nde ayokokimanyiya dia wɛ ndɔshana la ekiyanu, dia minya lonyangu layɛ ndo dia wɛ monga la ki ka lo yimba ndo ka l’otema kaya lo monga la nkum’otema ka pudipudi. Oma laasɔ, wɛ mbeyaka ndjotshutshuyama nto dia kambɛ Jehowa kaamɛ la asekayɛ atɛmɔdi. Dikambo diayɛ koka mfɔna la nɛ diaki l’Akristo amɔtshi wa lo ntambe ka ntondo wele ɔpɔstɔlɔ Petero akaafundɛ ɔnɛ: “Nyu nyaki oko ɛkɔkɔ wakatanganɛka, koko kakianɛ nyu nyambokalola oya le olami w’ɛkɔkɔ ndo omendji w’anima anyu.”—1 Petero 2:25.
Kalola le Jehowa ekɔ dikambo dioleki ohomba diakokayɛ nsala. Lande na? Nɛ dia wɛ ayɔngɛnyangɛnya otema wa Jehowa. (Tukedi 27:11) Oko wadieyayɛ, Jehowa ekɔ la nsaki, diakɔ diele etsha aso mongaka la shɛngiya le nde. Lo mɛtɛ, Jehowa hatotshutshuya la wolo dia mbooka ngandji ndo mbookambɛ. (Euhwelu k’Elembe 30:19, 20) Nomb’ewo kɛmɔtshi k’awui wa lo Bible akate ɔnɛ: “Ndooko onto lakoka ndjihola otema ayɛ. Wɛmɛ mbahomba nsala dui sɔ.” Naka sho ntɛmɔla Jehowa l’otema woludi la ngandji, kete tambɔsɔna dia ndjihola otema aso. Etena kasalaso ngasɔ, sho mboshaka woshasha wa nɛmɔ, mbuta ate kɔlamelo yaso ndo ngɛnyangɛnyaka otema ande efula. Lo mɛtɛ, ndooko ɔngɛnɔngɛnɔ wakokaso nkondja ko ndeka wɔnɛ waya lo ntɛmɔla Jehowa, nɛ dia nde kahombaso ntɛmɔla.—Etsha 20:35; Ɛnyɛlɔ 4:11.
Naka wɛ nkalola l’etshumanelo, kete ehomba ayɛ wa lo nyuma wayokotshama. (Mateo 5:3) Lo ngande? Efula k’anto wa l’andja ɔnɛ ndjambolaka ɔnɛ: ‘Lande na keso l’andja ɔnɛ?’ Vɔ wekɔ la nsaki k’efula ka nkondja ekadimwelo lo ambola wendana la oyango wa lɔsɛnɔ. Anto wekɔ la ohomba ɔsɔ, nɛ dia Jehowa akaatonge la wɔ. Nde akatɔsɔnɛ dia ndjotokotshɛ ohomba ɔsɔ etena kookambɛso. Ndooko ɔngɛnɔngɛnɔ woleki wɔnɛ waya lo mbeya ɔnɛ tekɔ lo ntɛmɔla Jehowa oma lo ngandji kawokaso.—Osambu 63:1-5.
Lam’alangayɛ, eya dia Jehowa nangaka dia wɛ nkalola le nde. Ngande wakokayɛ nshikikɛ dikambo sɔ? Eya dia: L’ɔkɔngɔ wa nsala alɔmbɛlɔ efula, biukubuku nyɛ yakalɔngɔswama l’ɔkɔmi tshɛ. Ondo ekumanyi kɛmɔtshi ka l’etshumanelo kana osekayɛ ombetawudi okina mbakakutola yambalo yayɛ oya lɔkɔ. Oma laasɔ, wɛ akayotshutshuyama dia ndjiada ndo mbetawɔ losango la lɔkɔ. Awui asɔ tshɛ mɛnyaka dia Jehowa hakohɛ. Koko la ngandji tshɛ, nde ekɔ lo kokutola oya le nde.—Joani 6:44.
Sho keketshamaka lo mbeya ɔnɛ Jehowa hohɛki pondjo ekambi ande wakashishɔ. Kɛsɔ mbakashihodia kadiyɛso Donna. Nde akate ate: “Lakatatshikaka akambo wa mɛtɛ yema yema, koko mbala efula dimi kanaka yimba l’ɛtɛkɛta wele lo Osambu 139:23, 24 wata ɔnɛ: ‘Nzambi le, onshishime ndo eye otema ami. Ɔnsɛdingole ndo eye tokanyi tankiyanya. Enda kana mboka kɛmɔtshi ka kɔlɔ kekɔ le mi, ndo ɔnɔmbɔlɛ lo mboka ka pondjo.’ Lakeyaka ɔnɛ dimi keema ose andja ɔnɛ ndo hakoke pondjo ndjaɔtɔnganyiya la wɔ ndo lakeyaka nto ɔnɛ l’okongamelo wa Jehowa mbahombami monga. Lakatatɛ mɛna dia Jehowa kokalɛmi, koko laki tsho l’ohomba wa ntana woho wa dimi nkalola le nde. Ndo lekɔ l’ɔngɛnɔngɔ wa mamba nɛ dia dui sɔ mbakamasale!”
“Lakatatɛ mɛna dia Jehowa kokalɛmi, koko laki tsho l’ohomba wa ntana woho wa dimi nkalola le nde”
Tekɔ lo kɔlɔmbɛ l’otema ɔtɔi dia ndo wɛ lawɔ nyomonga la ‘ɔngɛnɔngɛnɔ wa Jehowa.’ (Nehemiya 8:10) Wɛ hanyangaki pondjo naka wɛ nkalola le Jehowa.