Etshungwelo ka lo nshi yayaye​—Tosha Nzambi ndo Kristo losaka

Ekakatanu akɔna wa lushi la lushi walɔshana la yɛ? Onde wɛ ekɔ ɔtɛ wa nkumbo wele l’awui efula wa nsala dia nkokɛ nkumbo kayɛ? Onde wɛ ekɔ ombutshi wodia anayɛ wɛmɛ ndo ekɔ lo nsala la wolo tshɛ dia nkokɛ nkumbo kayɛ? Onde wɛ ekɔ ɔlɔngɔlɔngɔ wɔtɔ kalasa ndo ekɔ lo mpomana l’ɛhɛnyɔhɛnyɔ oma le asekayɛ? Onde wɛ ekɔ lo ndɔshana la yoonge ya kɔlɔ kana l’etombelo w’oma lo lotshundu? Onto tshɛ ekɔ lo ndɔshana la dui dimɔtshi. Akristo efula wekɔ lo ndɔshana l’ehemba wotshikitanyi l’etena kakɔ kaamɛ. Koko, sho mbeyaka dia keema edja tayanga la ntshungɔ oma l’ehemba ɛsɔ.​—2Kɔ 4:16-18.

Polo l’etena kɛnɛ, sho sambemaka lo mbeya dia Jehowa shihodiaka ekakatanu walɔshana la so, nde ngɛnangɛnaka kɔlamelo yaso ndo ekikelo kaso ndo ambotombɛ ɛtshɔkɔ efula lo nshi yayaye. (Jɛr 29:11, 12) Yeso ndjakiyanyaka efula lo dikambo diaso. Etena kakotshaso ɛkɛndɛ aso w’Okristo, Jehowa toshikikɛka ɔnɛ: “Dimi lekɔ la nyu nshi tshɛ.” (Mat 28:20) Etena kemalaso ndo kakanaso yimba la etshungwelo kaso ka lo nshi yayaye l’ɛse k’ɛlɔmbwɛlɔ ka Diolelo diaki Nzambi, sho keketshaka elongamelo kaso ndo yɛdikɔ yaso ya mbikikɛ ehemba wahomana la so nshi nyɛ.​—Rɔm 8:19-21.

NYENDE VIDƐO YELE L’ƆTƐ A DUI ƆNƐ: LAM’ELE MVULA NGEMBE KEKƆ LO NDJASUKANA, TOKE WASHO LE YESO!​—ƐTSHƆKƆ WA LO NSHI YAYAYE WAYOTELA DIOLELO NDO OMA LAASƆ, NYOKADIMOLE LO AMBOLA WAYELA ANƐ:

• Ngande wakaangana anto oma le Nzambi ndo etombelo akɔna wambonga la dui sɔ?

• Awui akɔna wakongɛ wanɛ wele la kɔlamelo le Jehowa lo nshi yayaye?

• Ngande wayokotshama awui wa diambo wa lo nshi yayaye asɔ?

• Ɛtshɔkɔ akɔna wambowotolaka l’andja w’oyoyo wakombolayɛ dia ndjakondja?