Rɛferansɛ wa lo Dikatshi dia losanganya la Lɔsɛnɔ ndo olimu aso
NGƆNDƆ KA TANU 3-9
AKAMBO W’OHOMBA W’OMA L’ƆTƐKƐTA WA NZAMBI | WALELO 27-29
“Tokoya Jehowa lele keema la shɔnɔdi”
Tonge la lowando l’efula lo waonga wa Jehowa
14 Esekaseka etanu ɛsɔ, mbuta ate ana wa wamato wa Zɛlɔfɛhadɛ wakatshu le Mɔsɛ ko wakatowombola ɔnɛ: “Ukundi ukuki lukumbu la shesu nshisho uma l’atei a khumbu kandi, ne dia ndi kumbuta ona pami?” Wakɔsɛngasɛnga vate: “Utusha kete ya sangu l’atei w’anangu shesu.” Onde Mɔsɛ akaakadimola lo mbuta ɔnɛ ‘ɔlɛmbɛ wakadje Nzambi lo dikambo sɔ hakoke tshikitanyema?’ Keema, koko nde “akatundja dikambu diako la ntundu ka [Jehowa].” (Wal. 27:2-5) Naa okadimwelo wakandawosha? Jehowa akatɛ Mɔsɛ ate: “Ana wa Zelofehade wambuyinga. Kuwasha kete y’ukito l’ului w’anangu shewo. Kawose kete y’ukito yaki shewo.” Jehowa akasale akambo akina nto. Nde akayosalaka ndo etshikitanu ɛmɔtshi lo ɛlɛmbɛ wakandasha Mɔsɛ lo mbuta ate: “Naka pami kemotshi, laki kumbuta ona pami, ambuvo, on’andi la umuntu ayukita kete yandi y’ukito.” (Wal. 27:6-8; Jas. 17:1-6) Ntatɛ oma l’etena kɛsɔ, ana wa wamato w’ase Isariyɛlɛ tshɛ wakahomanaka l’ekakatanu wa woho ɔsɔ wakakokamɛka.
Tonge la lowando l’efula lo waonga wa Jehowa
15 Shi tshelo shɔ yaki dimɛna ndo mɛnyaka dia shɔnɔdi komonga? Jehowa akasalɛ wamato waki kondekaka mbɔsama la nɛmɔ asɔ akambo la kɛnɛmɔ oko wakandasalɛka ase Isariyɛlɛ akina waki la nsɛnɔ y’amɛna. (Osam. 68:5) Ɔsɔ ekɔ paka ɔkɔndɔ ɔtɔi l’atei w’ɛkɔndɔ efula wɔkɔndwami lo Bible wɛnya mɛtɛ k’ɛtɛkɛta wasalanganya otema ɛnɛ: Jehowa salɛka ekambi ande tshɛ akambo aha la shɔnɔdi.—1 Sam. 16:1-13; Etsha 10:30-35, 44-48.
Tonge la lowando l’efula lo waonga wa Jehowa
16 Ngande wakokaso mbokoya Jehowa lele keema la shɔnɔdi? Tohɔ dia monga aha la shɔnɔdi mendanaka l’akambo ahende. Paka naka sho bu la shɔnɔdi mbakokaso salɛ anto akambo aha la shɔnɔdi. Kɛnɛ kele mɛtɛ ele, onto tshɛ fɔnyaka dia nde mbidjaka anto lo demba ndo nde bu la shɔnɔdi. Koko, sho mbetawɔka di’aha mbala tshɛ mbele dui dia wɔdu di’onto ndjaeya dimɛna. Laasɔ, kakɔna kakokaso nsala dia mbeya ɔnɛ sho keema la shɔnɔdi? Etena kakalange Yeso mbeya kɛnɛ kakataka anto lo dikambo diande, nde akambola ambeki ande ate: “Anto atawɔ lo dikambo dia Ɔna onto?” (Mat. 16:13, 14) Shi sho kokaka mbokoya Yeso lo dui sɔ? Wɛ koka mimbola ɔngɛnyi ayɛ ɔmɔtshi wɛkɛyɛ otema dia nde kotɛ kana wɛ mbeyamaka oko kanga shɔnɔdi. Naka nde ambokotɛ ate mɛnamaka dia wɛ ekɔ la yema ya kɔngɔdi lo kɛnɛ kendana la lokoho la demba, dioho di’anto, kana shɔnɔdi, kakɔna kahombayɛ nsala? Wɛ pombaka nɔmba Jehowa l’otema ɔtɔi lo kɛnɛ kendana la tokanyi tayɛ ndo mbɔlɔmba dia nde kokimanyiya dia ntshikitanya dionga diayɛ l’oyango wa wɛ mɛnya l’akambo tshɛ dia wɛ keema la shɔnɔdi.—Mat. 7:7; Kɔl. 3:10, 11.
Diangɔ di’oshinga wolo dia lo nyuma
it-2-F 850 od. 1
Elambo
Elambo wa lotɛ. Elambo wa lotɛ wakakimɔmaka kaamɛ l’elambo ekina djekoleko l’ɔkɔngɔ w’ase Isariyɛlɛ mbɔtɔ lo Nkɛtɛ ya Daka. (Wal 15:2, 5, 8-10) Elambo ɛsɔ waki wanu (“wanu wadjoya”) wakawatɛka lo elambwelo. (Wal 28:7, 14; Ɛdika Eto 30:9; Wal 15:10.) Ɔpɔstɔlɔ Pɔɔlɔ akafundɛ Akristo wa la Fillipɛ ate: “Oyadi kaanga lekɔ lo tshulwama oko olambo wa lotɛ laadiko dia olambo ndo olimu w’ekila wele mbetawɔ kanyu kakanyɔlɔmbɔla dia nsala, lekɔ la ɔlɔ ndo lekɔ lo ngɛnangɛna kaamɛ la nyu nyu tshɛ.” Lanɛ nde akakambe l’ɛtɛkɛta wa didjidji wa olambo wa lotɛ, dia mɛnya woho wakandayashaka tshɛ lo wahɔ w’asekande Akristo. (Flp 2:17) Yema tshitshɛ la ntondo ka nyɔi kande, nde akafundɛ Timɔte ate: “Dimi lamboshila tshulwama oko olambo wa lotɛ ndo etena ka dimi ntshungɔ kaya suke.”—2Ti 4:6.
NGƆNDƆ KA TANU 10-16
AKAMBO W’OHOMBA W’OMA L’ƆTƐKƐTA WA NZAMBI | WALELO 30-31
“Kotshaka alɔkɔlɔkɔ ayɛ”
it-2-F 1164
Dɔkɔlɔkɔ
Onto akatshikaka dɔkɔlɔkɔ la lolango, koko nde akahombaka dikotsha. Anto wakatshikaka alɔkɔlɔkɔ la lolango lawɔ. Koko etena kakatshikaka onto dɔkɔlɔkɔ, ɛlɛmbɛ wakɔlɔmbaka dia nde nkotsha dɔkɔlɔkɔ diakɔ. Ɔnkɔnɛ, wakataka dia dɔkɔlɔkɔ aki oko onto “ladjɛ anima ande didjango,” dui sɔ diakendanaka la onto lakimɔ lɔsɛnɔ lande oko osunge l’oyango wa kotshaka ɛtɛkɛta ande. (Wal 30:2; enda ndo Rɔm 1:31, 32.) Lam’ele dui sɔ diakakokaka shishɛ onto lɔsɛnɔ, mbokɛmaka lande na kakalɔmbaka Afundelo dia monga la yewo y’efula la ntondo ka ntshika dɔkɔlɔkɔ ndo nkana yimba dimɛna dimɛna la etombelo wakoka monga la dui sɔ. Ɛlɛmbɛ wakataka ɔnɛ: “Naka wɛ ambotshika dɔkɔlɔkɔ le Jehowa Nzambi kayɛ . . . totshimbatshimbake dia dikotsha, naka aha ngasɔ, kete ɔsɔ ayonga tshondo ya pɛkato le yɛ. Ko naka wɛ hatshiki dɔkɔlɔkɔ, kete wɛ hatonga la onongo wa pɛkato.”—Eoh 23:21, 22.
it-2-F 1164
Dɔkɔlɔkɔ
Ekɔ daka di’ohomba diatshika onto la ntondo ka Nzambi dia nsala awui amɔtshi, nkimɔ olambo kana woshasha ɔmɔtshi, ndjasha l’olimu ɔmɔtshi kana ndjashimba awui amɔtshi wele ɛlɛmbɛ hawoshimbe. Onto akatshikaka dɔkɔlɔkɔ la lolango lande hita l’oyango wa ndamɛ dikotsha. Dɔkɔlɔkɔ ekɔ daka di’ohomba efula dialaka onto ndamɛ la lolango lande. Laasɔ tshika dɔkɔlɔkɔ keema dui diatɔkɛnyɔ oko onto la tshiba ndo lo tena dimɔtshi ditelo dihende sɔ mbɔtɔnɛka lam’asadiɔ lo Bible. (Wal 30:2; Mat 5:33) “Dɔkɔlɔkɔ” ekɔ ɛtɛkɛta watondja onto la lolango lande ndamɛ, koko “etshibelo” ekɔ tshelo ya mɛnya owandji dia kɛnɛ kata onto kekɔ mɛtɛ ndo menda dia kana ɛlɛmbɛ nɔmbaka onto akɔ dia ntshiba. Mbala efula anto wakatshibaka ndo l’ekomelo wakadjaka sheke.—Eta 26:28; 31:44, 53.
Akambo w’ohomba w’oma lo dibuku dia Walelu
30:6-8—Onde Okristo wa pami kokaka tona dɔkɔlɔkɔ diakadje wadɛnde? Lo kɛnɛ kendana la alɔkɔlɔkɔ, Jehowa ambosembɔnɛ kakianɛ l’atɛmɔdi ande l’onto ndo l’onto. Ɛnyɛlɔ, ndjakimɔ le Jehowa ekɔ dɔkɔlɔkɔ di’onto ndamɛ. (Ngalatiya 6:5) Omi bu la lowandji la tona dɔkɔlɔkɔ dia woho ɔsɔ. Womoto hahombe mbidja dɔkɔlɔkɔ diahɔtɔnɛ l’Ɔtɛkɛta wa Nzambi kana diahomba mboshimba di’aha nde kotsha dimɛna ɛkɛndɛ ande otsha le omɛnde.
Diangɔ di’oshinga wolo dia lo nyuma
it-2-F 1203 od. 4
Jafɛta
Lo tena dimɔtshi, wakakokaka nkimɔ anto diatokambɛka Jehowa lo tɛmpɛlɔ. Ambutshi waki la lotshungɔ la nsala dui sɔ. Kɛsɔ mbakasale Hana wa nyango Samuɛlɛ. Hana akalake dia nde ayokimɔ Samuɛlɛ dia tokamba lo tabɛrnaklɛ la ntondo ka nde mbotɔ. Elekana w’omɛki Hana aketawɔ dɔkɔlɔkɔ diakatshike wadɛnde sɔ. Kam’akokidia nyango awɛlɛ, Hana akakimɔ Samuɛlɛ dia tokambaka lo tɛmpɛlɔ. Lo etena kakɔ kaamɛ, Hana akatɔlɛ ndo nyama k’olambo. (1Sa 1:11, 22-28; 2:11) Samisɔna aki ɔna okina lakawakimɔ le Nzambi dia monga oko okidiami.—Emb 13:2-5, 11-14; enda kɛnɛ kata Wal 30:3-5, 16 lo dikambo dia lowandji laki la ombutshi otsha le ɔnande la womoto.
NGƆNDƆ KA TANU 17-23
AKAMBO W’OHOMBA W’OMA L’ƆTƐKƐTA WA NZAMBI | WALELO 32-33
“Nyotshanya anto tshɛ wodjashi lo wodja akɔ”
w10-F 1/8 23
Onde wɛ akeyaka?
“Ahole wa la diko” waleka tɛkɛtama lo Afundelo wa lo Hɛbɛru aakiwɔ?
Lam’aki ase Isariyɛlɛ nsuke la mbɔtɔ lo Nkɛtɛ ya Daka, Jehowa akawatɛ dia ndanya ahole tshɛ w’ɔtɛmwɛlɔ w’ase Kanana wakawadjasɛka lɛkɔ. Nzambi akawadjangɛ ɔnɛ: “Nyu pombaka . . . ndanya ave awɔ wa lɔkɔlɔnga tshɛ, ndo mpingu yawɔ tshɛ ya mbolo ndo nyu pombaka ndanya ahole awɔ tshɛ w’ɔtɛmwɛlɔ.” (Wal 33:52) Ahole w’ɔtɛmwɛlɔ wakashi asɔ waki ondo ahole wa hwe wa la diko wakakokaka anto tshɛ mɛna lo tɔsɔdi t’akona kana ahole wa la diko wakawake l’ahole akina, ɛnyɛlɔ, l’atshina w’esongo kana l’esomba. (1Ku 14:23; 2Ku 17:29; Ɛzk 6:3) Ahole asɔ wakakokaka monga la dilambwelo, dimɛta dia l’esongo kana esongo, mpingu, dilambwelo dia tshɔ ndo diangɔ dikina diendana l’ɔtɛmwɛlɔ.
Tokondja wetshelo oma lo munga yakasale ase Isariyɛlɛ
Ɛlɔ kɛnɛ, sho pomanaka la ehemba wafɔna la wɛnɛ wakahomana la ase Isariyɛlɛ. Lo tshunda dia nshi nyɛ ekɔ diangɔ ndo anto efula wɔsama oko tozambizambi. L’atei wa diangɔ ndo anto wɔsama oko tozambizambi mbele ndo falanga, amembi wa kembo, akɛnyi wa tɔkɛnyɔ, ase pɔlitikɛ, ewandji ɛmɔtshi w’ɛtɛmwɛlɔ ndo kânga ase nkumbo amɔtshi. Ɛngɔ kana onto ɔmɔtshi l’atei awɔ kokaka ndjoleka monga ohomba lo lɔsɛnɔ laso. Mbɔtɔ lɔngɛnyi la ma ma la wanɛ wahoke Jehowa ngandji kokaka ndanya diɔtɔnganelo diasaso la Nde.
Lo ɔtɛmwɛlɔ wa Baala, anto wakayashaka efula lo dieyanelo dia mindo, dui sɔ mbakakotola ndo mbakakɔsha ase Isariyɛlɛ efula. Ekambi waki Nzambi ɛmɔtshi tetemalaka mundama oma lo tolonga ta woho akɔ wâmɛ. Ɛnyɛlɔ, onto lele l’omposa mposa wa mbeya oseka dui tshɛ ndo lele kema la yewo mbeyaka ndanya nkum’otema kande ka pudipudi lo menda awui wa mindo wa dieyanelo lo Ɛtɛrnɛtɛ lo woshɛshɛ lo luudu lande. Ayonga mɛtɛ dui dia lonyangu dia Okristo mundama lo djonga ya menda awui wa mindo wa dieyanelo lo Ɛtɛrnɛtɛ!
it-1-F 392 od. 4
Kanana
La lomba tshɛ, Jashua “kotshika kaanga dui 1 oma lo kɛnɛ tshɛ kakadjangɛ Jehowa Mɔsɛ” lo kɛnɛ kendana la ndanya ase Kanana. (Jas 11:15) Koko wodja w’ase Isariyɛlɛ kondjela ɛnyɛlɔ kande ka dimɛna ndo vɔ kondanya ɛngɔ tshɛ kakakokaka mbidja wodja ɔsɔ mindo. Woho wakatetemala ase Kanana monga l’atei w’ase Isariyɛlɛ, dui sɔ diakayokonya ase Isariyɛlɛ dia ndjela lɔkɛwɔ lawɔ la kɔlɔ ndo oma laasɔ, dui sɔ diakayokonya di’anto mvɔ efula (aha la mbidja lofulo la wanɛ wakavu oma l’awui wa ngala, awui wa mindo wa dieyanelo ndo ɔtɛmwɛlɔ wa dikishi) oleki lofulo l’ase Kanana wotovɔ otondonga ase Isariyɛlɛ wakakitanyiya la kɔlamelo tshɛ didjango diakawawasha dia ndanya ase Kanana tshɛ. (Wal 33:55, 56; Emb 2:1-3, 11-23; Os 106:34-43) Jehowa akashile mbewola ase Isariyɛlɛ dia losembwe ndo dombo diande keema la shɔnɔdi ndo ɔnɛ naka vɔ ntetemala monga la diɔtɔnganelo l’ase Kanana, ko tshukana lawɔ, sanganya ɔtɛmwɛlɔ awɔ la ɔtɛmwɛlɔ wa Jehowa ndo mbokoya mbekelo y’ɛtɛmwɛlɔ y’ase Kanana, aha la taamu dui sɔ diotoyakonya dia vɔ ndanyema tshɛ ndo ‘wodja wotoyaatowɔ.’—Eto 23:32, 33; 34:12-17; Lɛw 18:26-30; Eoh 7:2-5, 25, 26.
Diangɔ di’oshinga wolo dia lo nyuma
it-1-F 933 od. 6
Olelo
L’ɔkɔngɔ w’owale nshikikɛ dihole diahomba dioho dimɔtshi ntshɔ, aki ohomba nto mbeya woke woke wa ɛtshi ka nkɛtɛ kakahombe dioho la dioho mbɔsa. “Nyu pombaka nkahana bɛtshi dia nkɛtɛ lo eokelo k’owale lo ndjela nkumbo yanyu. Wanɛ wele efula, nyu pombaka mbafudiɛ etenyi kawɔ k’okitɔ ndo wanɛ wele yema tshitshɛ, nyu pombaka mbakitshɛkitshɛ etenyi kawɔ k’okitɔ. Onto tshɛ ayokondja etenyi kande k’okitɔ lɛnɛ akɔ owale ande.” (Wal 33:54) Kɛnɛ kakashikikɛka owale lo kɛnɛ kendana la dihole diaki suke suke kotshikitanyemaka, koko wakakokaka ntshikitanya woke woke wa etenyi k’okitɔ. Etena kakɛnama dia ɛtshi ka nkɛtɛ kakawasha ase Juda kakaleke woke, wakɔshi etenyi kɛmɔtshi ko kikotshɛ dioho dia Simɛyɔna.—Jas 19:9.
NGƆNDƆ KA TANU 24-30
AKAMBO W’OHOMBA W’OMA L’ƆTƐKƐTA WA NZAMBI | WALELO 34-36
“Yanga eshamelo le Jehowa”
Onde wɛ nyangaka eshamelo le Jehowa?
4 Ko kakɔna kakasalemaka naka ose Isariyɛlɛ ambodiaka onto aha l’okonda? Oyadi nde akadiake onto aha l’okonda, nde aki l’onongo wa nyɔi k’onto laha l’onongo. (Eta. 9:5) Kaanga l’etena kɛsɔ, Jehowa akate dia vɔ kokaka mbooka kɛtshi. Ɔnɛ lakadiake onto aha l’okonda akakokaka ndawɔ ɔsɔmbɔyishi wa dikila ko ntshɔ lo osomba ɔmɔtshi l’esomba esamalo w’eshamelo. Kamakawetawɔka dia nde mbidjasɛ l’osomba ɔsɔ, nde akakokamɛka. Koko nde akahombaka mbidjasɛ l’osomba w’eshamelo ɔsɔ polo lam’ayovɔ ɔlɔmbɛdi a laadiko.—Wal. 35:15, 28.
Onde wɛ nyangaka eshamelo le Jehowa?
6 Naka ose Isariyɛlɛ ambodiaka onto aha l’okonda, nde akahombaka ndawɔ l’osomba w’eshamelo ndo “mbutɛ dikumanyi dia [la soko di]’osomba . . . dikambo diande.” Dikumanyi wakahombaka mbolongola. (Jas. 20:4) L’ɔkɔngɔ w’etena kɛmɔtshi, vɔ wakahombaka mbokaloya dia tolomboshama le dikumanyi dia l’osomba wakadiakema onto. (Adia Walelo 35:24, 25.) Naka dikumanyi sɔ wambotota dia nde akadiake onto aha l’okonda, ko vɔ ndjokaloya onto lakalawɔ l’osomba w’eshamelo.
Onde wɛ nyangaka eshamelo le Jehowa?
13 Etena kakinde l’etei k’osomba w’eshamelo, onto lakalawɔ aki l’ekokelo. Jehowa akate lo dikambo di’esomba ɛsɔ ate: “Vɔ wayonga eshamelo le nyu.” (Jas. 20:2, 3) Jehowa kɔnɔmbaka di’onto lakalawɔ nyomolomboshama nto l’ɔtɛ wa dui diakɔ diaamɛ. Ndo nto, ɔsɔmbɔyishi wa dikila komonga la lotshungɔ la mbɔtɔ l’osomba ɔsɔ dia todiaka. Etena kaki onto lakalawɔ l’etei k’osomba ɔsɔ, nde aki l’ekokelo ka Jehowa. Nde komonga lo lokanu. Nde akakokaka nkamba olimu, nkimanyiya anto akina ndo kambɛ Jehowa lo wɔladi. Lo mɛtɛ, nde akakoke monga la lɔsɛnɔ l’ɔngɛnɔngɛnɔ ndo la dimɛna!
Diangɔ di’oshinga wolo dia lo nyuma
w91-F 15/2 13 od. 13
Oshinga w’etshungwelo wɛdimi lo dikambo di’anto tshɛ
13 Oyadi Adama kana Eva, vɔ ahende ndooko onto layohomba nkondja wahɔ oma l’oshinga w’etshungwelo. Ɛlɛmbɛ wa Mɔsɛ waki la tɔndɔ nɛ ɔnɛ: “Hanyohombe nongola oshinga w’etshungwelo dia ntshungola lɔsɛnɔ l’ondjakanyi wahomba mvɔ.” (Wal 35:31) Adama kokesama, koko nde akasale pɛkato l’okonda ndo la lolango lande. (1 Ti 2:14) Ekɔ oko wate kana nde akadiake tokanula tande, nɛ dia vɔ wakahowɔ eongelo kele keema kokele, ndo wakalongola dilanya dia nyɔi. Mbokɛmaka hwe dia, Adama akasungana ndjakema, nɛ dia oko wakinde kokele, nde akasɔnɛ la lolango lande tshɛ dia mpindola ɔlɛmbɛ wakawodjangɛ Nzambi. Otondonga Jehowa aketawɔ dia mbodimanyiya ndo Adama nkondja wahɔ w’oshinga w’etshungwelo, tshike dui sɔ totodiɔtɔnɛ la losembwe lande. Otondo mfuta pɛkato kakasale Adama, tshike totondɔsɛkɛ tokanula ta Adama nyɔi! (Rɔm 5:16) Lo kɛnɛ kendana la ɛlɛmbɛ, wolo wa ndanya wele la pɛkato wakahombaka nshidiyama oma lo kiɔkɔ yatɔ. Ɔnɛ lakakimɔ oshinga w’etshungwelo ‘akalɛtɛ nyɔi dikambo di’onto tshɛ,’ ndo akakikɛ etombelo wa pɛkato kakasambiyɛ Adama anande tshɛ.—Hɛb 2:9; 2 Kɔ 5:21; 1Pe 2:24.
NGƆNDƆ KA TANU 31–NGƆNDƆ KA SAMALO 6
AKAMBO W’OHOMBA W’OMA L’ƆTƐKƐTA WA NZAMBI | EOHWELO K’ƐLƐMBƐ 1-2
“Kilombo kekɔ kaki Nzambi”
w96-F 15/3 23 od. 1
Jehowa nangaka losembwe ndo sambo k’ɔlɔlɔ
Dikumanyi diakasɔnama l’etshumanelo wekɔ la lotshungɔ la nombosha lo dikambo dia pɛkato kɛmɔtshi ka woke. (1 Kɔ 5:12, 13) Woho akɔ waamɛ mbele, vɔ pombaka mbohɔ dia nyanga losembwe la Nzambi ntondo naka kokaka ndo monga la kɛtshi. Tena dimɔtshi, tokomaka ko otshi wa pɛkato hɛnya ndjatshumoya kahombande mbokama kɛtshi. Koko dikumanyi hawohombe mbitshanya otshi wa kɔlɔ ɔsɔ lo nyanga dia nsɔmbɔya. Vɔ mongaka l’elongamelo k’ɔnɛ dilanya diamondolongola diayowokonya dia nde nkana yimba ndo nkalola lo mboka ka dimɛna. (Ɛdika la Ɛzk 18:23.) L’ɛlɔmbwɛlɔ ka Kristo, dikumanyi salaka la wolo dia nombosha la losembwe ndo dui sɔ mbalɔmbaka dia vɔ monga “oko dihole di’ekokelo oma lo mvula ngembe.” (Isa 32:1, 2) Vɔ hawohombe monga la shɔnɔdi ndo vɔ pombaka monga la ekanelo ka dimɛna.—Eoh 1:16, 17.
Tokitanyiya lowandji laki Jehowa la kɔlamelo tshɛ
4 Koko lâdiko dia mbeya Ɛlɛmbɛ, ekɔ akambo efula wakalɔmbamaka di’onto monga shushi. Oko wakiwɔ komonga kokele, dikumanyi di’apami sɔ wakahombaka sala la wolo di’aha monga fumbe ya nsaki yawɔ hita, ɛnyɛlɔ lokaki, shɔnɔdi, ndo lohehe di’aha mɛnganya kilombo. Mɔsɛ akawatɛ ate: ‘Tanyoyalake la shɔnɔdi y’anto l’elombwelo; kanyokelake onto la tshitshɛ oko onto la woke. Tanyokake elongi k’onto wɔma, nɛ dia elombwelo kele kaki Nzambi.’ Eelo, toshushi ta l’Isariyɛlɛ wakalomboshaka lo lokombo la Nzambi. Vɔ waki mɛtɛ la diɛsɛ dia woke!—Euhwelu k’Elembe 1:16, 17.
Diangɔ di’oshinga wolo dia lo nyuma
Waohwelo wa Jehowa wekɔ amɛna
9 L’edja k’ɛnɔnyi 40 wakekekɔ ase Isariyɛlɛ ‘l’oswe wa shɛnga wa woke ndo wa wɔma,’ Jehowa kombasha elembetshielo wa shikaa wendana la woho wakandahombe mbalɔmbɔla, mbakokɛ ndo mbakotshɛ ehomba awɔ. Koko nde akawatɛka mbala la mbala dia vɔ pombaka ndjaɛkɛ le nde ndo l’ɛlɔmbwɛlɔ kande. Lo nkamba la dinge la yanyi ndo ɛkɔhɔ ka dja l’otsho dia mbalɔmbɔla, Jehowa akɛnya ase Isariyɛlɛ dia nde akaasukɛka etena kakawatandaka lɔkɛndɔ la paa efula lɔsɔ. (Euh. 1:19; Etum. 40:36-38) Nde akaakotshɛka nto ehomba awɔ wa l’emunyi. Bible mbutaka ɔnɛ: “Ahondo awo kundjala emusu; ekulu awo kumvuda.” Ndo nto, “vo kumpumba nduku engo.”—Neh. 9:19-21.
NGƆNDƆ KA SAMALO 7-13
AKAMBO W’OHOMBA W’OMA L’ƆTƐKƐTA WA NZAMBI | EOHWELO K’ƐLƐMBƐ 3-4
“Ɛlɛmbɛ wa Jehowa wekɔ lomba ndo losembwe”
it-1-F 1199 od. 2
Lomba
Onto leka ndo lakamba l’Ɔtɛkɛta wa Nzambi la etete ndo lakitanyiya wadjango ande kokaka monga la lomba efula oleki embetsha ande ndo ayonga la lomba efula ndeka kaanga epalanga. (Os 119:99, 100, 130; ɛdika la Luk 2:46, 47.) Dui sɔ salemaka nɛ dia lomba ndo yimba pikamaka lo wadjango wa pudipudi waki Nzambi ndo tɛdikɔ tande ta dombo ta losembwe, diakɔ diele otondonga ase Isariyɛlɛ wakakitanyiya wadjango asɔ tshike wedja wakaadinge wotowaɔsa oko “anto wele la lomba ndo la yimba.” (Eoh 4:5-8; Os 111:7, 8, 10; ɛdika la 1Ku 2:3.) Onto lele la lomba mbeyaka etombelo wa kɔlɔ waya lo ntona nkitanyiya Ɔtɛkɛta wa Nzambi, diakɔ diele nde kombolaka mbɔtɔnganyiya yoho yande ya lɔsɛnɔ la ɔtɛkɛta, la wadjango wa Nzambi ndo nde nɔmbaka Nzambi dia nde mbokimanyiya. (Os 119:169) Nde tshikaka dia Ɔtɛkɛta wa Nzambi mbɔtɔ polo l’etei k’otema ande (Mat 13:19-23), ndo nde mbofundaka l’ehase k’otema ande (Tok 3:3-6; 7:1-4), ndo nde petshaka “mboka tshɛ ka kashi” (Os 119:104). Etena kakinde la nkɛtɛ, Ɔna Nzambi akɛnya lomba la woho ɔsɔ lo ntona mbewɔ kaanga nyɔi kakandahombe mvɔ l’otamba, nɛ dia Afundelo wakalɔmbaka dia nde mvɔ lo yoho shɔ.—Mat 26:51-54.
w99 11/1 20 od. 6-7, lo angɛlɛ
Anto efula nangaka nkaha
Nkumekanga ka womoto ka Shɛba akaambe awui wakandoke ndo wakandɛnyi, diakɔ diele l’okitshakitsha tshɛ nde akate ate: “Diɛsɛ le anto ayɛ ndo diɛsɛ le ekambi ayɛ wemala la ntondo kayɛ wonya tshɛ dia pokamɛka lomba layɛ!” (1Ku 10:4-8) Nde kombuta dia ekambi waki Sɔlɔmɔna waki la diɛsɛ l’ɔtɛ wakawadingama la ɔngɔnyi waki la Sɔlɔmɔna. Koko, ekambi waki Sɔlɔmɔna wakatshɔkɔma l’ɔtɛ wakawatetemalaka mpokamɛ ɛtɛkɛta wa lomba wakasha Nzambi Sɔlɔmɔna. Ande ɛnyɛlɔ ka dimɛna kakatshikɛ nkumekanga ka womoto ka Shɛba ekambi waki Jehowa ɛlɔ kɛnɛ, wanɛ wayaɛkɛ lo lomba lele la Otungi ndamɛ ndo laki ɔnande Yeso Kristo lee!
Lembetɛ nto kɛnɛ kakate nkumekanga ka womoto kɛsɔ lo dikambo dia Sɔlɔmɔna ate: “Jehowa Nzambi kayɛ atombɔme.” (1Ku 10:9) Mbokɛmaka hwe dia nde akɛnyi lonya la Jehowa lo lomba laki la Sɔlɔmɔna ndo ɔngɔnyi waki la nde. Dui sɔ mbɔtɔnɛka la kɛnɛ kakalake Jehowa ase Isariyɛlɛ ntondo. Nde akawatɛ ate: ‘Nyotetemale ndjela wadjango ami,’ “nɛ dia kɛsɔ ayɛnya dia nyekɔ la lomba ndo la yimba la ntondo k’anto wayoka wadjango asɔ tshɛ, ko vɔ wayota vate: ‘Wodja wa woke ɔnɛ wekɔ mɛtɛ anto wele la lomba ndo la yimba.’”—Eoh 4:5-7.
Onde ‘wɛ ekɔ ɔngɔnyi le Nzambi’?
13 Etena katshɔkɔla Jehowa ekambi ande, mbala tshɛ nde mbashaka kɛnɛ koleki dimɛna. (Jakoba 1:17) Ɛnyɛlɔ, etena kakasha Jehowa ase Isariyɛlɛ nkɛtɛ ya vɔ mbidjasɛ, nde akawasha nkɛtɛ “yuludi l’awele la usanga.” Kânga mbakawataka dia nkɛtɛ y’Edjibito yaki nkɛtɛ yakalole l’awɛlɛ la osanga, nkɛtɛ yakasha Jehowa ase Isariyɛlɛ yakatshikitana la y’Edjibito lo dui dimɔtshi di’ohomba efula. Mɔsɛ akatɛ ase Isariyɛlɛ ate: “Yo yeli kete yatulamaka [Jehowa,] Nzambi kanyu ololo.” L’ɛtɛkɛta ekina, vɔ wakahombe ngɔna nɛ dia Jehowa akâkokɛka. L’edja tshɛ kaki ase Isariyɛlɛ la kɔlamelo le Jehowa, nde akâtshɔkɔlaka efula ndo wakasɛnaka yoho ya lɔsɛnɔ yakɛnamaka hwe dia yakaleke yoho yakasɛnaka wedja tshɛ wakasukana la wɔ. Eelo mɛtɛ, ɔtshɔkɔ wa Jehowa “mbatongonyaka”!—Walelu 16:13; Euhwelu k’Elembe 4:5-8; 11:8-15.
Diangɔ di’oshinga wolo dia lo nyuma
Akambo w’ohomba w’oma lo dibuku di’Euhwelu k’Elembe
4:15-20, 23, 24—Onde oshimbelo waha sɛla dikishi nembetshiyaka di’ekɔ kɔlɔ sala disɛlasɛla kana esato l’oyango wa nɛnga luudu? Ndooko. Oshimbelo ɔsɔ aki waha sɛla esato dia tɛmɔla mbut’ate ‘mbodikusɛ adwe ndo ditɛmɔla.’ Afundelo hawoshimbe dia sɛla ɛsɛlasɛla l’oyango wa nɛnga luudu.—1 Khumi ya Dikanga 7:18, 25.
NGƆNDƆ KA SAMALO 14-20
AKAMBO W’OHOMBA W’OMA L’ƆTƐKƐTA WA NZAMBI | EOHWELO K’ƐLƐMBƐ 5-6
“Etsha anayɛ dia vɔ mboka Jehowa ngandji”
Ambutshi, nyokotsha ehomba wa nkumbo kanyu
11 Lo dikambo sɔ, ndoko divɛsa dikina dia lo Bible dioshidiwɔ mbala efula oleki Euhwelu k’Elembe 6:5-7. Lam’alanganyu nyofole Bible yanyu lo avɛsa asɔ. Tolembete dia ntondotondo, ambutshi keketshamaka dia vɔamɛ keketsha lonyuma lawɔ hita: vɔ pombaka nanga Nzambi ndo mbidja ɛtɛkɛta ande lo etema awɔ. Eelo, nyu pombaka monga ambeki w’etete wa Ɔtɛkɛta wa Nzambi, nyu pombaka mbadiaka Bible mbala la mbala ndo kanaka yimba lo awui wele lɔkɔ dia monga la eokelo ka mɛtɛ ndo nanga mboka, atɔndɔ ndo ɛlɛmbɛ wa Jehowa. Lo sala ngasɔ, etema anyu wayolola la akambo wa mɛtɛ wa diambo wele lo Bible wayonyosha ɔngɛnɔngɛnɔ ndo nyotshutshuya dia monga la dilɛmiɛlɔ otsha le Jehowa ndo mboka ngandji. Lo ekomelo nyayonga la akambo efula w’ɛlɔlɔ wa kɔkɔmiya lo etema wa ananyu.—Luka 6:45.
w07-F 15/5 15-16
Ngande wakokami mbisha anami wetshelo wa dimɛna?
Awui walongamɛyɛ, wakanyiyayɛ, wɔsayɛ la nɛmɔ, ndo awui walekayɛ ndjasha lɔkɔ hawɛnyama tsho oma lo ɛtɛkɛta ayɛ, koko ndo oma lo kɛnɛ kasalayɛ. (Rɔm 2:21, 22) Oma ko akɛnda awɔ, ana mbekaka awui amɔtshi oma lo nsɛdingola la yambalo tshɛ kɛnɛ kasala ambutshi awɔ. Ana ndekaka mbidja yimba lo kɛnɛ koleki ohomba kasala ambutshi awɔ ndo awui asɔ mbayolekaka monga ohomba etena kakomawɔ tomangase. Naka wɛ mbokaka mɛtɛ Jehowa ngandji, kete anayɛ wayoshihodia dui sɔ. Ɛnyɛlɔ, vɔ wayɛna dia wɛ mbɔsaka wadielo wa Bible ndo wekelo wa Bible la nɛmɔ. Vɔ wayoshihodia dia wɛ mbetshaka wahɔ wa Diolelo lo dihole dia ntondo lo lɔsɛnɔ layɛ. (Mat 6:33) Woho wayashayɛ mbala la mbala l’etete lo nsanganya y’Akrito ndo wayashayɛ l’olimu w’esambishelo, dui sɔ diayowakimanyiya dia vɔ mɛna woho wɔsayɛ olimu wa Jehowa w’ekila la nɛmɔ.—Mat 28:19, 20; Hɛb 10:24, 25.
Ambutshi, nyokotsha ehomba wa nkumbo kanyu
14 Oko wɛnya Euhwelu k’Elembe 6:7, ekɔ waaso efula wakokanyu, nyu ambutshi sawola la ananyu awui wa lo nyuma. Oyadi etena katanyɛngɔla, kasalanyu elimu wa la ngelo, kana kasutshasutshanyu demba kâmɛ la wɔ, nyu koka kondja waaso wa kotsha ehomba wa lo nyuma wa ananyu. Lo mɛtɛ, aha wonya tshɛ tshɛ mbahombanyu ‘sawolaka’ la ananyu akambo wa mɛtɛ wa lo Bible. Koko, nyosale la wolo dia asawo wa lo nkumbo mongaka asawo wakeketsha ndo wa lo nyuma. Réveillez-vous! mongaka la asawo efula watɛkɛta awui wotshikitanyi. Nyu koka kamba la asawo asɔ dia sawola la ana dikambo dia nyama yakatonge Jehowa, ahole w’elangala wa la nkɛtɛ ndo dia mbekelo la toho ta lɔsɛnɔ totshikitanyi tele la anto. Asawo wa ngasɔ mbeyaka tshutshuya ana w’akɛnda dia vɔ mbadiaka ekanda ekina watosha olui wa ɔhɔmbɔ wa kɔlamelo ndo wa kɛsɔ.—Mateu 24:45-47.
Diangɔ di’oshinga wolo dia lo nyuma
Ngandji ndo losembwe lo Isariyɛlɛ w’edjedja
11 Wetshelo: Jehowa mɛnaka aha tsho kɛnɛ kɛnama lo washo w’anto. Nde mɛnaka kɛnɛ kele mɛtɛ l’etei kaso, mbuta ate l’otema aso. (1 Sa. 16:7) Ndooko tokanyi, nsaki kana awui amɔtshi wakoka mbishɛma le nde. Nde nyangaka awui w’ɛlɔlɔ wele le so ndo tokeketshaka. Koko nde nangaka dia sho mbeya ndo mbahemɛ tokanyi ta kɔlɔ la ntondo ka tɔ ndjokoma etsha wa kɔlɔ.—2 Ɛk. 16:9; Mat. 5:27-30.
NGƆNDƆ KA SAMALO 21-27
AKAMBO W’OHOMBA W’OMA L’ƆTƐKƐTA WA NZAMBI | EOHWELO K’ƐLƐMBƐ 7-8
“Tanyodjake sheke ya tshukanaka lawɔ”
w12-F 1/7 29 od. 2
Lande na kakalɔmbaka Nzambi atɛmɔdi ande dia tshukanaka paka l’asekawɔ ambetawudi?
Lo wedi ɔmɔtshi, Jehowa akeyaka dia Satana akakombolaka mbetawoya ekambi ande dia vɔ ntɛmɔla tozambizambi ta kashi. Diakɔ diele Nzambi akahɛmɔla ase Isariyɛlɛ dia atɛmɔdi wakashi “wayokadimola ana[wɔ] oma le mi dia vɔ ntshika ndjelami ko vɔ kambɛ nzambi nkina.” Efula waki lo waale. Otondongaka ase Isariyɛlɛ wakayokoma lo ntɛmɔla tozambizambi tokina, tshike Nzambi totondowaetawɔ ndo totondaakokɛ ndo vɔ wotondama esadi eto oma le atunyi awɔ. Ko otowosala ngasɔ, ngande wotoyokoka wodja ɔsɔ ndjotondja Mɛsiya wakalakema? Mbokɛmaka hwe lande na kakatshutshuya Satana ase Isariyɛlɛ dia vɔ ndjotshukana l’anto waki komonga atɛmɔdi.
Nyotshukane “paka lo Nkumadiɔndjɔ”—Onde tɔndɔ sɔ diekekɔ ohomba?
Lo Ɔtɛkɛta ande, Jehowa tɛnyaka dia sho tshukana paka lo Nkumadiɔndjɔ. Lande na? Nɛ dia nde mbeyaka kɛnɛ kele ɔlɔlɔ le ekambi ande. Nde hakombola tsho kokɛ ekambi ande oma lo paa kaya l’ɔtɛ wa yɛdikɔ ya kɔlɔ, koko nde kombolaka nto dia vɔ monga la ɔngɛnɔngɛnɔ. Lo nshi ya Nɛhɛmiya, etena kakatshukanaka ase Juda l’ase wedja waki kɔtɛmɔlaka Jehowa, Nɛhɛmiya akawaɛnyaka ɛnyɛlɔ ka kɔlɔ kaki Sɔlɔmɔna. Kaanga mbele ‘Nzambi akokaka Sɔlɔmɔna ngandji, . . . wadiɛnde w’ase wedja ekina wakookonya dia nde nsala pɛkato.’ (Neh. 13:23-26) Nzambi pɛmɔlaka ekambi ande dia vɔ ntshukana paka l’atɛmɔdi wa mɛtɛ nɛ dia dui sɔ diekɔ lo wahɔ awɔ. (Osam. 19:7-10; Is. 48:17, 18) Akristo wa mɛtɛ wekɔ la lowando lo ekokelo ka la ngandji kaki Nzambi ndo vɔ ndjaɛkɛka lo ɛlɔmbwɛlɔ kande. Lo ndjakitshakitsha le nde oko wende ɔnɔmbɔdi awɔ, vɔ mbetawɔka dia nde ekɔ Owandji wa l’andja w’otondo.—Tuk. 1:5.
Enda lɔngɛnyi layɛ ɔlɔlɔ lo nshi y’ekomelo nyɛ
12 Akristo walanga ntshukana pombaka monga la yewo y’efula lo kɛnɛ kendana la wanɛ walangawɔ nsɔna dia membwana la wɔ. Ɔtɛkɛta wa Nzambi tɔhɛmɔlaka ɔnɛ: “Tanyongake la diɔtɔnganelo dia ma ma la wanɛ wele bu ambetawudi. Nɛ dia diɔtɔnganelo diakɔna diele lam’asa akambo w’ɛlɔlɔ la akambo wa kɔlɔ? Kana losambi lakɔna lele lam’asa osase la wodjima?” (2 Kɔrɛtɔ 6:14) Bible mbutɛka ekambi wa Nzambi dia ntshukana “paka lo nkumadiɔndjɔ,” mbuta ate ntshukana paka la onto lamboyakimɔka, lambobatizamaka ndo lasɛna lo ndjela atɔndɔ wa Jehowa. (1 Kɔrɛtɔ 7:39) Lam’atshukanayɛ l’onto looka Jehowa ngandji, wɛ ayonga l’olonganyi wayokokimanyiya dia ntshikala la kɔlamelo le Nzambi.
Diangɔ di’oshinga wolo dia lo nyuma
Jehowa kotshaka ehomba aso wa lushi la lushi
4 Woho walɔmbaso mbo ya ndɛ ya l’emunyi ya lushi la lushi pombaka toholaka ohomba wele laso wa mbo ya ndɛ ya lo nyuma ya lushi la lushi. Kânga mbakinde la ndjala efula l’ɔkɔngɔ w’etena k’otale, Yeso akashike tanga l’ohemba waki Satana wa kadimola ave mapa, lo mbuta ate: “Untu hayala la lumu ne dia ma tu, Keli ayuyala la lo ne dia aui tshe watumba uma l’unyo wa [Nzambi].” (Mateu 4:4) Yeso akashile ɛtɛkɛta w’omvutshi Mɔsɛ, lakatɛ ase Isariyɛlɛ ate: “[Jehowa] akanyukitshakitsha, akanyuvusha ndjala, ku akayunyulesha mana yakinyu kunimbitela ndu yaki washenyu kumbeya, dia nyetsha ati: Untu hayala la lumu ne dia ma tu, keli ndi mbeyaka ndjala la lo, ne dia aui tshe watumba uma l’unyo a [Jehowa].” (Euhwelu k’Elembe 8:3) Woho wakasha Jehowa ase Isariyɛlɛ mana akawasha aha paka mbo ya ndɛ ya l’emunyi tsho koko ndo wetshelo efula wa lo nyuma. Wetshelo ɔmɔtshi wa lo nyuma wakawakondja ele vɔ wakahombaka ‘onto l’onto tɔngɔna paka yɛdikɔ ya nde ndɛ lushi ɔtɔi.’ Naka vɔ tɔngɔna yɛdikɔ yoleki nyɛ ya ndɛ lo lushi, kete mana yakɔ yakahɔndaka ndo yakɔtɔka kusu. (Etumbelu 16:4, 20) Koko, dikambo dia ngasɔ kosalemaka lushi la samalo lakawahombaka tɔngɔna yɛdikɔ yatowɔtɔngɔnaka lushi la lushi mbala hiende dia vɔ ndɛ lushi la Sabato. (Etumbelu 16:5, 23, 24) Ɔnkɔnɛ, mana yakâtshutshuyaka dia vɔ mbohɔka dia wakahombe monga la dilɛmiɛlɔ ndo mbeya ɔnɛ nsɛnɔ yawɔ konemanɛka tsho la mbo ya ndɛ koko l’“awui tshe watumba uma l’unyo a [Jehowa].”
NGƆNDƆ KA SAMALO 28–NGƆNDƆ K’ESAMBELE 4
AKAMBO W’OHOMBA W’OMA L’ƆTƐKƐTA WA NZAMBI | EOHWELO K’ƐLƐMBƐ 9-10
“Kakɔna kakɔlɔmba Jehowa Nzambi kayɛ?”
w09-F 1/10 10 od. 3-4
Kakɔna katɔlɔmba Jehowa?
Kakɔna kakoka totshutshuya dia sho nkitanyiya Nzambi? Mɔsɛ toshaka okadimwelo ɔmɔtshi lo mbuta ɔnɛ: “[Nyoke] Jehowa Nzambi kanyu wɔma.” (Divɛsa 12) Ɔsɔ bu wɔma waha nongola dilanya, koko wɔma wolodi la dilɛmiyɛlɔ otsha le Nzambi ndo atɔndɔ ande. Naka sho monga la dilɛmiyɛlɔ di’efula otsha le Nzambi kete tayewɔ nsala awui watonande.
Ko oyango akɔna wa ntondo watotshutshuya dia nkitanyiya Nzambi? Mɔsɛ mbutaka ɔnɛ: ‘Oka Jehowa ngandji ndo . . . kambɛnde l’otema ayɛ tshɛ ndo la anima ayɛ tshɛ.’ (Divɛsa 12) Mboka Nzambi ngandji halembetshiya monga la nsaki k’efula otsha le nde. Dibuku dimɔtshi mbutaka ɔnɛ: “Lo Hɛbɛru, vɛrbɛ nsaki halange nembetshiya tsho nsaki ko nsaki, koko awui waya oma lo nsaki kakɔ.” Dibuku diakɔ diɔamɛ mbutaka dia mboka Nzambi ngandji nembetshiyaka “mbosalɛ akambo la ngandji.” L’ɛtɛkɛta ekina naka sho mboka Nzambi ngandji ka mɛtɛ kete tayosala akambo weyaso dia wayowɔngɛnyangɛnya.—Tok 27:11.
w09-F 1/10 10 od. 6)
Kakɔna katɔlɔmba Jehowa?
Naka sho nkitanyiya Nzambi la lolango laso, kete dui sɔ diayotela ɛtshɔkɔ. Mɔsɛ akafunde ate: “Nkitanyiya ɛlɛmbɛ la wadjango . . . wamomokodjangɛ ɛlɔ dikambo di’ɔlɔlɔ ayɛ.” (Divɛsa 13) Eelo, wadjango tshɛ wa Jehowa, mbuta ate kɛnɛ tshɛ katɔlɔmbande dia nsala kekɔ lo dikambo dia ɔlɔlɔ aso. Ko ngande wahomba dui dui sɔ monga paka ngasɔ? Bible mbutaka ɔnɛ: “Nzambi ekɔ ngandji.” (1Jn 4:8) Ɔnkɔnɛ, nde akatosha wadjango asɔ paka dia sho ndjokondja lɔsɛnɔ la pondjo lo nshi yayaye. (Isa 48:17) Naka sho nsala kɛnɛ tshɛ katɔlɔmba Jehowa dia nsala, kete tayohandɔ oma l’ekiyanu wa nshi nyɛ ndo dui sɔ diayotokonya dia sho ndjokondja ɛtshɔkɔ wahakomɛki l’ɛse k’ɛlɔmbwɛlɔ ka Diolelo diande.
Onde wɛ koka mɛtɛ ‘ndjasukanya la Nzambi’
2 Abarahama aki onto ɔmɔtshi la lo nshi y’edjedja lele Jehowa akawete ate: “Ongenyi ami.” (Isaya 41:8) Eelo, Jehowa akɔsaka Abarahama oko ɔngɛnyi ande hita. Abarahama akonge la lɔngɛnyi la ngasɔ nɛ dia nde ‘aki la mbetawɔ le Jehowa.’ (Jakoba 2:23) Ndo ɛlɔ kɛnɛ, Jehowa nyangaka waaso wa ‘kakatana’ la wanɛ wôkambɛ oma lo ngandji kele lawɔ. (Euhwelu k’Elembe 10:15) Ɔtɛkɛta ande tɔlɔmbaka ɔnɛ: “Nyoyasukanya la Nzambi ko nde ayosukana la nyu.” (Jakoba 4:8, NW) Lo ɛtɛkɛta ɛsɔ, sho tanaka leeta ndo daka.
Diangɔ di’oshinga wolo dia lo nyuma
it-1-F 115
Anakima
Weho w’anto waki etale efula, wakadjasɛka l’akona wa lo wodja wa Kanana ndo wakadjasɛka suke suke l’asɛnga amɔtshi wa lo ndjale, djekoleko lo Sidɛ. Etena kɛmɔtshi, ana wa Anakima asato wakeyamaka efula, mbuta ate Ahimana, Sheshai ndo Talamai wakadjasɛka la Hɛbɛrɔna. (Wal 13:22) Lɛkɔ mbakatɛna atɔpi 12 w’ase Hɛbɛru ana wa Anakima mbala kawɔ ka ntondo. Atɔpi 10 l’atei awɔ wakayoshaka alapɔlɔ wa kɔlɔ lo woho wakawatɛna apami asɔ lo mfɔnya ɔnɛ vɔ wekɔ tokanula ta Nefilimɛ waki la ntondo ka Mvula k’elola ndo etena kakawayaɛdika la wɔ, ase Hɛbɛru wakɛnama oko “akata” la ntondo kawɔ. (Wal 13:28-33; Eoh 1:28) Woho waki ana wa Anakima ahonga, wakayotatɛka mbowawɛdika la apami wakawelɛka Emimɛ la Rɛfayima waki ndo vɔ la wɔ nto akokongote. Ondo wolo waki la wɔ wakayokonyaka anto dia ntondja ɛtɛkɛta wa yokedi wata ɔnɛ: “Akoka memala la ntondo k’ana wa Anaka?”—Eoh 2:10, 11, 20, 21; 9:1-3.