KIOMBO YA WETSHELO 10C
Ekimanyielo dia nyomokondja wolo
SHO koka keketshama lo kanaka yimba lo wetshelo w’oma l’ɛnɛlɔ kɛnɛ ka diambo kele lo Ɛzɛkiyɛlɛ 37:1-14, wetshelo wakokaso nkamba la wɔ lo akambo wahomana la so. Naa wetshelo akɔ?
Lo tena dimɔtshi, sho mbeyaka ndjaoka oko tɔsɛngiya ndo ehemba wa lo lɔsɛnɔ laso wambotɔlɛndja ndo hatoyeya kɛnɛ ka nsala, koko tekɔ lo ntetemala la ndɔshana la wɔ. Lo tena dia ngasɔ, sho koka keketshama naka sho nkana yimba l’awui wa diambo wele l’ɛnɛlɔ k’okaloyelo kakɛnyi Ɛzɛkiyɛlɛ. Lande na? Sho koka mbeka oma lo prɔfɛsiya kɛnɛ dia Nzambi lele la wolo wa mbisha weka wakavu lɔsɛnɔ koka mɛtɛ tosha wolo wele la so ohomba dia mbekola wekamu oyadi wɛnɛ wele lo kanyi y’anto, hatokoke mbaekola.—Adia Osambo 18:29; Flpɛ. 4:13.
Vɔ koka tohola dia ɛnɔnyi nkama la ntondo ka nshi ya Ɛzɛkiyɛlɛ, omvutshi Mɔsɛ akate dia Jehowa bu tsho la wolo, koko ekɔ ndo la nsaki ka nkamba la wolo ande lo wahɔ w’ekambi ande. Mɔsɛ akafunde ɔnɛ: “Nzambi ekɔ eshamelo oma ko nshi y’edjedja, anya ande wa pondjo wekɔ l’ɛse kayɛ.” (Eoh. 33:27) Eelo, sho koka monga l’eshikikelo dia naka sho mendɛ le Nzambi kaso lo tena dia paa, Jehowa ayokamba l’anya ande w’ekokelo dia tokimanyiya, ayotonyiya la ngandji tshɛ ndo ayotokimanyiya dia sho nyomokondja wolo.—Ɛzk. 37:10.