Yema y’ashi yambokoma ɔkɛdi wa woke efula!

Ɔkɛdi wela ɛtshɔkɔ

NSHI Y’EDJEDJA: Etena kakakalola wanɛ waki lo lɔhɔmbɔ lo wodja awɔ wa lootɔ, vɔ wakatshɔkwama efula etena kakawasha lonya l’okaloyelo w’ɔtɛmwɛlɔ wa pudipudi lo tɛmpɛlɔ

NSHI YASO NYƐ: Ɔtɛmwɛlɔ wa pudipudi wakakaloyama lo 1919 ndo dui sɔ diakadiholɛ ekambi wa Nzambi wa kɔlamelo lokuke lo ɛtshɔkɔ wa lo nyuma lo yoho yahatasalemaka

NSHI YAYAYE: L’ɔkɔngɔ wa Aramangɛdɔna, Jehowa ayotɔtshɔkɔla lo toho efula, ɛnyɛlɔ, lo tokimanyiya dia sho nkoma kokele ndo tetsha akambo wa mɛtɛ w’eyoyo

Ashi washa lɔsɛnɔ

NSHI Y’EDJEDJA: Jehowa akatshɔkɔla ekambi ande waki l’okitanyiya kaanga lam’akatafulaka lofulo lawɔ lo nsala dia vɔ mpama lo nyuma

NSHI YASO NYƐ: Lo paradiso ka lo nyuma katahame, lofulo l’anto latahame tsho wakakondja wahɔ oma lo akambo wa mɛtɛ wa lo Bible ndo wakeke akambo wendana la Jehowa, ndo wakɔtɔ l’ɔnɔngɔ wa wanɛ wɔɔtɛmɔla lo yoho yetawɔnde

NSHI YAYAYE: Miliyɔ y’anto efula wayolɔ wayɔtɔ l’ɔnɔngɔ wa wanɛ wayohandɔ lo Aramangɛdɔna ndo vɔ tshɛ wayokondja ɛtshɔkɔ efula oma le Jehowa

Esongo dikambo dia mbo ya ndɛ ndo ɛkɔnwɛlɔ

NSHI Y’EDJEDJA: Lo yoho ya lo nyuma, Jehowa ekɔ lo mbetsha ekambi ande akambo wa mɛtɛ wa lo nyuma ndo ekɔ lo nsala dia vɔ mbɔtɛmɔla lo yoho yetawɔnde lo wodja awɔ wambokaloyama. Nde akaakimanyiya nto dia vɔ ntshika ntɛmɔla dikishi kana nsala dui tshɛ diɔtɔnɛ l’ɔtɛmwɛlɔ wa kashi

NSHI YASO NYƐ: Elembetshielo efula wendana l’akambo wa mɛtɛ wa lo Bible wekɔ lo nkimanyiya ekambi wa Nzambi dia vɔ ntshikala la kɔlamelo le nde ndo ntona tokanyi tshɛ ta kɔlɔ t’anto wa l’andja ɔnɛ

NSHI YAYAYE: Kristo nde l’anto 144 000 wayolɛ la nde wayokimanyiya anto tshɛ wele l’okitanyiya dia vɔ koma kokele ndo monga l’alemba w’amɛna ndo la wolo wa nsɛna pondjo pondjo!