Tonge l’eshikikelo dia tayoshimbamɛ etena kayokomɛ dikongɛ nɛ di’akambo

Keem’edja, Jehowa hatonga la solo dia lotutsha nto otsha le dikongɛ nɛ di’akambo. Ɔtɛmwɛlɔ wa kashi wayolanyema, osanga wa wedja wayɔlɔsha ekambi waki Nzambi ndo Jehowa ayolanya akanga wa kɔlɔ l’Aramangɛdɔna. Akristo wekɔ lo nkonga awui wa diambo asɔ l’asolo walomɔlomɔ.

Koko, aha vwiwui tshɛ yendana la mfɔnu ka woke mbeyaso. Ɛnyɛlɔ, hateye shikaa etena kayototatɛ. Hateye ɛkɔkɔ wayokamba la mandji ya pɔlitikɛ dia nembetshiya lande na kayowɔlɔsha ɔtɛmwɛlɔ. Hateye edja ka ngande kayɔlɔsha wedja ekambi waki Nzambi kana awui wayendana la dui sɔ. Ndo hateye shikaa kɛnɛ kayokamba la Jehowa dia ndanya akanga wa kɔlɔ l’Aramangɛdɔna.

Kɛnɛ kele mɛtɛ ele, Afundelo totɛka awui tshɛ wele la so ohomba dia sho monga l’eshikikelo ndo la dihonga dikambo di’awui wayosalema lo nshi yayaye. Ɛnyɛlɔ, sho mbeyaka dia tekɔ lo nsɛna l’etena k’ekomelo ka “nshi y’ekomelo.” (2Ti 3:1) Sho mbeyaka di’etena kayɔlɔshama ɔtɛmwɛlɔ “[k]ayosusama” diaha ɔtɛmwɛlɔ wa mɛtɛ ndanyema. (Mat 24:22) Sho mbeyaka dia Jehowa ayoshimbɛ ekambi ande. (2Pe 2:9) Ndo sho mbeyaka dia Ɔnɛ lakasɔnama oma le Jehowa dia ndanya akanga wa kɔlɔ, ko nshimbɛ olui a woke oma l’Aramangɛdɔna ekɔ la losembwe ndo la wolo w’efula.​—Ɛny 19:11, 15, 16.

Lo mɛtɛ, awui wayosalema lo nshi yayaye wayokonya anto dia vɔ “[nkɔ] hohakayi l’ɔtɛ wa wɔma.” Koko, naka sho nkana yimba dimɛna lo dikambo dia toho takashimbɛ Jehowa ekambi ande lo nshi yakete ndo kɛnɛ katosholɛnde lo dikambo dia nshi yayaye, kete sho koka ‘nkeketala ndo monga la dihonga,’ tele l’eshikikelo di’etshungwelo kaso kaya nsuke.​—Luk 21:26, 28.