WEKELO 38

Ngɛnangɛna la woshasha wa lɔsɛnɔ

Okanda wa l'akatshi

Lɔsɛnɔ kokaka ndola l’awui efula w’amɛna. Kaanga etena kalɔshanaso l’ekakatanu, sho kokaka mbala efula ngɛnangɛna l’awui amɔtshi wa lo lɔsɛnɔ. Ngande wakokaso mɛnya dia sho mbɔsaka woshasha wa lɔsɛnɔ la nɛmɔ? Ndo naa ɔkɔkɔ woleki ohomba watotshutshuya dia nsala dui sɔ?

1. Lande na kahombaso ngɛnangɛna la lɔsɛnɔ?

Sho pombaka ngɛnangɛna la lɔsɛnɔ nɛ dia lɔ lekɔ woshasha w’oma le Shɛso ka ngandji, Jehowa. Nde mbele “kiɔkɔ ya lɔsɛnɔ,” mbuta ate nde mbakatonge diangɔ tshɛ diasɛna. (Osambo 36:9) “Ndamɛ kasha anto tshɛ lɔsɛnɔ, lomu ndo diangɔ tshɛ.” (Etsha 17:25, 28) Jehowa toshaka kɛnɛ keso l’ohomba dia ntshikala la lɔsɛnɔ. Kɛnɛ koleki ele, nde sukɛka lɔsɛnɔ laso lo yoho yatokimanyiya dia sho ngɛnangɛna la lɔ.—Adia Etsha 14:17.

2. Ngande wakokaso mɛnya Jehowa dia sho ngɛnangɛnaka la woshasha wa lɔsɛnɔ?

Jehowa akakokokɛ oma k’etena kakiyɛ l’otema wa mama kayɛ. L’ɛlɔmbwɛlɔ ka nyuma ka Nzambi, ɔtɛmɔdi ɔmɔtshi waki Nzambi, Davidɛ akate lo dikambo dia Nzambi ate: “Washo ayɛ wakamɛnyi kaanga lam’akimi eholoko.” (Osambo 139:16) Jehowa mbɔsaka lɔsɛnɔ layɛ la nɛmɔ di’efula. (Adia Mateo 10:29-31.) Nde mongaka la paa efula l’asolo etena kadiaka onto ɔmɔtshi onto okina l’okonda tshɛ kana kayadiakande ndamɛ.a (Etombelo 20:13) Jehowa ayonyanga nto efula, naka sho mbidja lɔsɛnɔ laso lo waale tshanana kana naka hatɔshi yɛdikɔ ya nkokɛ nsɛnɔ y’anto akina. Etena kakokɛso lɔsɛnɔ laso ndo kalɛmiyaso nsɛnɔ y’anto akina, sho mɛnyaka dia sho mbɔsaka woshasha wa diambo wa lɔsɛnɔ la nɛmɔ.

NYOMOTSHIMOLA

Enda toho tɔmɔtshi takokayɛ mɛnya dia wɛ ngɛnangɛnaka woshasha wa lɔsɛnɔ.

3. Kokɛka yoonge yayɛ ya demba

Akristo wakayakimɔ kambaka la lɔsɛnɔ lawɔ tshɛ dia kambɛ Jehowa. Ekɔ oko vɔ kimɔka alemba awɔ oko olambo le Nzambi. Nyadia Rɔmɔ 12:1, 2, ndo oma laasɔ, nyɔkɛtshanya ambola anɛ:

Kakɔna kahomba kotshutshuya dia nkokɛ yoonge yayɛ ya demba?
Naa toho tɔmɔtshi takokayɛ nsala dui sɔ?

Womoto ɔmɔtshi lele diemi asawola la dɔkɔtɛlɛ diande.

4. Ɔsa tɛdikɔ taha mpomuya kana ndjaka onto

Bible tokeketshaka dia mbewɔ totshelo tele waale. Nyende VIDƐO dia mbeya akambo amɔtshi wakokayɛ nsala dia ndjakokɛ.

VIDƐO: Kokɛka lɔsɛnɔ layɛ (8:34)

Nyadia Tokedi 22:3, ndo oma laasɔ, nyɔkɛtshanya woho wakokayɛ wɛ l’anto akina ndjakokɛ . . .

lo nkumbo kayɛ.
lo dihole diayɛ di’olimu.
etena kakɔkɔlayɛ demba.
etena katayakɛndjakɛndja mutuka, mututu kana dikalo.

Pami kɛmɔtshi lo mutuka ande oya wa lo kɔsa.

5. Ɔsa lɔsɛnɔ l’ɔna lahatotɔ la nɛmɔ

Womoto ɔmɔtshi lele diemi akimɛ dikundju diande.

L’ɛtɛkɛta wa lɔlɛnga, Davidɛ akatɛkɛta dia woho wayasha Jehowa lo lɔsɛnɔ ndo lo dikambo di’ohamelo w’ɔna lahatotɔ. Nyadia Osambo 139:13-17, ndo oma laasɔ, nyɔkɛtshanya dimbola nɛ:

Lo washo wa Jehowa, onde lɔsɛnɔ l’onto tatɛka kam’atshɔ nyango diemi ko kana lam’otɔ ɔna?

Ɛlɛmbɛ wakasha Jehowa Isariyɛlɛ w’edjedja wakakokɛka ambutshi wa wamato ndo anawɔ weke l’otema. Nyadia Etombelo 21:22, 23, ndo oma laasɔ, nyɔkɛtshanya ambola anɛ:

Naa kanyi yaki Jehowa lo dikambo di’onto ladiaka ɔna lahatotɔ aha l’okonda?
Ngande wayaokande etena kasala onto dui sɔ l’okonda?b
Ngande wɔsayɛ kanyi yaki Nzambi shɔ?

Nyende VIDƐO.

VIDƐO: Tɔsake lɔsɛnɔ la nɛmɔ woho waliɔsa Nzambi (5:00)

Kaanga mama kɔsa lɔsɛnɔ la nɛmɔ mbeyaka mɛna dia paka ntondja diemi mbele dui ɔtɔi diakokande nsala. Nyadia Isaya 41:10, ndo oma laasɔ, nyɔkɛtshanya ambola anɛ:

Naka mama kɛmɔtshi wekɔ lo mbotshutshuya dia ntondja diemi, le onto akɔna ahombande nyanga ekimanyielo? Lande na?

ANTO AMƆTSHI MBUTAKA ƆNƐ: “Womoto ekɔ la lotshungɔ la nsɔna kana nde kokaka ntondja diemi nɛ dia ɔsɔ ekɔ diemi diande.”

Kakɔna kaketawoya dia Jehowa mbɔsaka lɔsɛnɔ la mama ndo l’ɔna lahatotɔ la nɛmɔ?

LO TSHENA PE

Bible tetshaka dia nanga, nɛmiya ndo nkokɛ woshasha wa Jehowa wa lɔsɛnɔ. Dui sɔ mendanaka la lɔsɛnɔ laso ndo la nsɛnɔ y’anto akina.

Ovuswelo

Lande na kele lɔsɛnɔ l’onto lekɔ la nɛmɔ le Jehowa?
Ngande wayaoka Jehowa etena kadiaka onto ɔmɔtshi onto okina l’okonda?
Kakɔna kakɔngɛnyangɛnya lo kɛnɛ kendana la woshasha wa lɔsɛnɔ?

Datɛ diamboshila wekelo:

Oyango

Enda yoho mɔtshi yakokayɛ nkokɛ lɔsɛnɔ layɛ.

Oyango okina:

Your other goal

SALA EYANGELO

Ngande wakokaso mbisha Jehowa losaka lo dikambo dia woshasha wa lɔsɛnɔ?

Osambo 141—Dihindo dia lɔsɛnɔ (2:41)

Ntana okadimwelo lo dimbola diata ɔnɛ: Onde Nzambi ayodimanyiya womoto lakatondja diemi?

“Kakɔna kata Bible lo dikambo di’otondjelo wa diemi?” (Sawo dia l’Ɛtɛrnɛtɛ)

Eka dia mbeya woho wahomba kanyi yaki Nzambi lo dikambo dia lɔsɛnɔ monga la shɛngiya l’ɔsɔnwɛlɔ aso wa tɔkɛnyɔ.

“Onde wɛ pombaka nkɛnya ‘tɔkɛnyɔ toleki waale’?” (Emɔ!, Ngɔndɔ ka dikumi 8, 2000)

Ko kayotota naka onto ɔmɔtshi ekɔ la tokanyi ta ndjadiaka? Enda woho wakoka kokimanyiya Bible.

“Dimi nangaka mvɔ—Onde Bible koka kimanyiyami etena kemi la kanyi ya ndjadiaka?” (Sawo dia l’Ɛtɛrnɛtɛ)

a Jehowa ndjakiyanyaka efula lo dikambo di’anto wele l’etema wambatɛ. (Osambo 34:18) Nde shihodiaka okiyanu wa wolo wakoka nkonya onto dia monga la tokanyi ta ndjadiaka, ndo nde nangaka mbookimanyiya. Dia mɛna woho wele ekimanyielo kande koka mbisha onto wolo, adia sawo diele l’ɔtɛ a dui ɔnɛ: “Dimi nangaka mvɔ—Onde Bible koka kimanyiyami etena kemi la tokanyi ta ndjadiaka?” Sawo sɔ tanemaka l’etenyi ka wekelo ɔnɛ kata ɔnɛ: Sala eyangelo.

b Wanɛ wakatondja waemi hawohombe ndjaɛndja onongo lo yoho yambotamba olelo, nɛ dia Jehowa kokaka mbadimanyiya. Dia mbeya awui akina, enda sawo diata ɔnɛ: “Kakɔna kata Bible lo dikambo di’otondjelo wa diemi?” diele lo wekelo ɔnɛ l’etenyi kata ɔnɛ: Sala eyangelo.