Ngande wayokohɔ Jehowa?

‘NZAMBI kami le, ombohɔ.’ Nehemiya akasɛngasɛngaka Nzambi ngasɔ mbala efula. (Nehemiya 5:19; 13:14, 31) Sunganaka mɛtɛ di’anto mbawɛ Nzambi lo mbɔsɛngasɛngaka woho ɔsɔ etena kewɔ lo pâ ka mamba.

Ko anto atowokanyiyaka wonya walɔmbawɔ Nzambi dia nde mbaohɔ na? Lo mɛtɛ, vɔ hawolongamɛ dia Nzambi mbohɔ nkombo yawɔ tsho ko pe. Vɔ mɛtɛ nongamɛka woho wakalongamɛka elengalenga kɛmɔtshi kakadiakema kâmɛ la Yeso. Otshikitanyi la onyande, onto ɔsɔ akasɛngasɛnga Yeso ate: “Kumbuho lam’ayuyukuma lu diulelu diaye.” Nde akalangaka dia Yeso mbosalɛ dui dimɔtshi, mbut’ate mbôlola, koko aha paka mbohɔ tsho ɔnɛ nde aki kapanda kana shishadjɛndɛ.​—Luka 23:42.

Mbala tshɛ, Bible mɛnyaka ɔnɛ le Nzambi, ‘mbohɔ onto’ kɛdikɛdi mbosalɛ dui dimɔtshi di’ɔlɔlɔ. Ɛnyɛlɔ, l’ɔkɔngɔ wa nkɛtɛ ndola l’ashi wa mvula k’elola edja ka nshi 150, “[Nzambi] akuho Noa, . . . Okone [Nzambi] akapepia lopepe la kete, ku ashi wakakitakita.” (Etatelu 8:1) L’ɔkɔngɔ w’ɛnɔnyi nkama efula, Samisɔna, lam’akawôle ase Filistiya washo ndo mbokeleka mɔlɔla, nde akalɔmbɛ Nzambi ate: “Umbuho, we [Nzambi], umbisha wulu etena kene ketu.” Jehowa akohɔ Samisɔna lo mbosha wolo woleki wɔnɛ watongaka l’onto ko nde akasɔmbɔya atunyi wa Nzambi. (Embadi 16:28-30) Lo dikambo dia Nehemiya, Jehowa akatshɔkɔla wolo wakandadjaka ko ɔtɛmwɛlɔ wa mɛtɛ wakayolɔ la Jerusalɛma.

Ɔpɔstɔlɔ Paulo akafunde ate: “Akambu tshe wakawafundi ntundu wakafundama dia ntulakanya dia shu ndjala la elungamelu uma lu etetemalu la uma lu ekikitshelu ka lu afundelu.” (Romo 15:4) Endaka sho mbohɔ Jehowa lo nyangaka dia ntsha lolango lande, oko ekambi ande wa kɔlamelo wa lo nshi y’edjedja, kete tayokoka monga l’eshikikelo ɔnɛ Jehowa ayotohɔ: nde ayotokimanyiya dia sho kondja kɛnɛ kahombaso lushi la lushi, ayotokeketsha lam’eso l’ehemba, ndo ayototshungola lam’ayondolanya anto wa kɔlɔ.​—Mateu 6:33; 2 Petero 2:9.

Wɛ nangaka onto ndjokenda?

Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible anto lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “Les Témoins de Jéhovah” mukanda lo B.P. 634 Limete, Kinshasa, République démocratique du Congo.