WEKELO 58

Tshikala la kɔlamelo le Jehowa

Okanda wa l'akatshi

Akristo wa mɛtɛ wamboyashikikɛ diaha mbetawɔ pondjo di’ɛngɔ kana onto ɔmɔtshi mbashimba dia ntɛmɔla Jehowa. Aha la taamu, sho mbeyaka dia ngasɔ mbayaokayɛ. Jehowa mbɔsaka kɔlamelo yayɛ la nɛmɔ. (Adia 1 Ɛkɔndɔ 28:9.) Awui akɔna wakoka mbidja kɔlamelo yayɛ l’ohemba, ndo ngande wakokayɛ ndɔshana l’awui akɔ?

1. Ngande wakoka anto akina mbidja kɔlamelo yaso l’ohemba?

Anto amɔtshi wayohemba toshimba dia kambɛ Jehowa. Waa na wakoka nsala dui dia kɔlɔ sɔ? Anto amɔtshi wakatshike akambo wa mɛtɛ mbutaka awui wa kashi lo dikambo di’okongamelo wa Nzambi dia ndanya mbetawɔ kaso. Vɔ mbelamɛka ɔnɛ waa apɔsta. Ndo nto, ewandji ɛmɔtshi w’ɛtɛmwɛlɔ dianganyaka awui wa kashi lo dikambo diaso l’oyango wa nkonya wanɛ wele bu la yewo dia ntshika akambo wa mɛtɛ. Ekɔ waale le so naka sho nsawola l’andɔshi tshɛ, mbadia abuku awɔ, ntshɔ lo sitɛ yawɔ y’Ɛtɛrnɛtɛ kana menda tovidɛo tawɔ. Lo kɛnɛ kendana l’anto watɛwɔla anto akina diaha vɔ ntetemala kambɛ Jehowa la kɔlamelo, Yeso akate ate: “Nyaatshike. Ɛnɔmbɔdi wa totshungu mbewɔ. Naka kanga tshungu ayɔlɔmbɔla kanga tshungu, kete vɔ akɔ 2 wayɔkɔ lo difuku.”—Mateo 15:14.

2. Naa tɛdikɔ tendana l’onto ndamɛ takoka mbidja kɔlamelo yaso le Jehowa l’ohemba?

Ngandji kokaso Jehowa kayototshutshuya dia mbewɔ ɛngɔ tshɛ kele la losambi l’ɔtɛmwɛlɔ wa kashi. Olimu wakambaso, atshunda weso kana dui dikina tshɛ diasalaso hawohombe monga la losambi l’ɔtɛmwɛlɔ wa kashi. Jehowa tewolaka ɔnɛ: ‘Anto ami, nyotombe oma lo Babilɔna ka woke.’—Ɛnyɛlɔ 18:2, 4.

NYOMOTSHIMOLA

Eka woho wakokayɛ mbewɔ diaha onto ɔmɔtshi ntɛwɔla kɔlamelo yayɛ le Jehowa. Eka woho wakokayɛ mɛnya kɔlamelo yayɛ lo ntomba oma lo Babilɔna ka Woke.

3. Ewɔ embetsha wa kashi

Kakɔna kahombaso nsala naka tamboka awui wa kɔlɔ lo dikambo di’okongamelo wa Jehowa? Nyadia Tokedi 14:15, ndo oma laasɔ, nyɔkɛtshanya dimbola nɛ:

Lande na kahatahombe mbetawɔ oseka dikambo tshɛ diokaso?

Nyadia 2 Joani 9-11, ndo oma laasɔ, nyɔkɛtshanya ambola anɛ:

Ngande wahombaso mbɔsa waa apɔsta?
Oyadi hatɔtɛkɛtshi mbala kakɔ ɔtɔi la waa apɔsta, ngande wakokaso ndjokoma lo ndjela wetshelo awɔ?
Ngande wafɔnyayɛ wayoyaoka Jehowa naka sho mbidja yimba l’ɛtɛkɛta wa kɔlɔ wata anto lo dikambo diande ndo di’okongamelo ande?

4. Tshikala la kɔlamelo le Jehowa etena kasala ɔnangɛso ɔmɔtshi pɛkato

Naka tambeya di’onto ɔmɔtshi la l’etshumanelo ambosala pɛkato ka woke, kakɔna kahombaso nsala. Tɔsɛdingole tɔndɔ dimɔtshi di’oma l’ɛlɛmbɛ waki Nzambi wakandasha Isariyɛlɛ w’edjedja. Nyadia Akambo w’ase Lɛwi 5:1.

Naka tambeya di’onto ɔmɔtshi ambosala pɛkato ka woke, sho pombaka mbutɛ dikumanyi kɛnɛ keyaso. Koko la ntondo ka nsala dui sɔ, ayonga dui di’ɔlɔlɔ nkeketsha onto losadi kɔlɔ dia ndamɛ ntshɔ le dikumanyi ndo toshola pɛkato kande. Naka nde hasadi dui sɔ, kete kɔlamelo yaso le Jehowa pombaka totshutshuya dia mbutɛ dikumanyi kɛnɛ keyaso. Ngande wele yoho ya nsala akambo shɔ mɛnyaka ngandji kokaso . . .

Jehowa Nzambi?
onto losadi pɛkato?
anto akina wa l’etshumanelo?

Esato womamatanyi: Ɔnangɛso ɔmɔtshi akimanyiya ɔnangɛso okina lakasale dui dimɔtshi dia kɔlɔ. 1. Ɔnangɛso ambonyanga l’ɔtɛ wa kɛnɛ kɛnyinde lo telefɔnɛ kande. 2. Ɔnangɛso akɔ ambɛnya ɔnangɛso okina telefɔnɛ kande, koko ɔnangɛso akɔ ambotona. 3. Ɔnangɛso ɔsɔ ambɛnya dikumanyi dihende telefɔnɛ kande ndo osawola la wɔ. — Naka osekayɛ ombetawudi ekɔ l’okakatanu, kimanyiyande!

5. Kakitɔna la Babilɔna ka Woke

Nyende VIDƐO.

VIDƐO: Tomba oma lo Babilɔna ka Woke! (5:06)

Osato w’oma lo vidɛo yata ɔnɛ: ‘Tomba oma lo Babilɔna ka Woke!’ Ombeki ɔmɔtshi wa Bible ayamɔ oma la le ondjashi Nzambi l’ɔkɔngɔ wa nde mbotɛ dia nde hatoya nto l’olimu wa l’ɔtɛmwɛlɔ.

Nyadia Luka 4:8 ndo Ɛnyɛlɔ 18:4, 5, ndo oma laasɔ, nyokadimole ambola anɛ:

Onde lokombo lami lakatetemala ntshikala l’abuku w’ɔtɛmwɛlɔ ɔmɔtshi wa kashi?
Onde lekɔ lo tshunda dimɔtshi diele la losambi l’ɔtɛmwɛlɔ okina?
Onde olimu ami sukɛka ɔtɛmwɛlɔ wa kashi lo yoho mɔtshi?
Onde ekɔ akambo amɔtshi wa lo lɔsɛnɔ lami wahombami ndjanganya l’ɔtɛmwɛlɔ wa kashi?
Naka lakakadimudi nte eelo lo dimbola dimɔtshi l’atei wa ambola anɛ, etshikitanu akɔna wahombami nsala?

Lo weho akɔ tshɛ, ɔsa yɛdikɔ yayokokimanyiya dia ntshikala la nkum’otema ka pudipudi ndo yayɛnya kɔlamelo yayɛ le Jehowa.

Kadiyɛso kɛmɔtshi nde l’ɔnande la pami wayatombe oma lo makashinyi. Vɔ wekɔ lo tete lale mama kɛmɔtshi kalɔmba weshasha wa kɛtshi wa l’ɔtɛmwɛlɔ. — Kakɔna kayoyosala naka wambokɔlɔmba dia nkimɔ weshasha ɛmɔtshi wa kɛtshi wa l’ɔtɛmwɛlɔ?

ANTO AMƆTSHI MBUTAKA ƆNƐ: “Lekɔ lo nanga mbeya kɛnɛ kata waa apɔsta lo dikambo di’Ɛmɛnyi wa Jehowa dia dimi monga l’akoka wa mamɛ akambo wa mɛtɛ.”

Onde ɔsɔ ayonga dui dia lomba? Lande na?

LO TSHENA PE

Dia ntshikala la kɔlamelo le Jehowa, sho pombaka mbewɔ dia mbekesanɛ la wanɛ wayanga dia tonganyiya.

Ovuswelo

Lande na kahatahombe menda filmɛ, mbadia awui kana mpokamɛ tokanyi ta waa apɔsta?
Naka tambeya diʼɔnangɛso ɔmɔtshi ambosala pɛkato ka woke, kakɔna kahombaso nsala?
Ngande wakokaso ndjela ɔhɛmwɛlɔ watotɛ dia ntomba oma l’ɔtɛmwɛlɔ wa kashi?

Datɛ diamboshila wekelo:

Oyango

Naka wɛ ekɔ la losambi l’ɔtɛmwɛlɔ wa kashi lo yoho mɔtshi, kete ɔsa yɛdikɔ ya ndjakakitola la wɔ.

Oyango okina:

Your other goal

SALA EYANGELO

Enda kɛnɛ kahombayɛ nsala etena kadianganya anto akina awui wa kashi lo dikambo di’Ɛmɛnyi wa Jehowa.

“Onde wɛ ambɔsɛdingola dia awui akɔ wekɔ mɛtɛ?” (Tshoto y’Etangelo, Ngɔndɔ k’enanɛi 2018)

Ngande wakokayɛ mbeya atshunda kana elimu wasukɛ Babilɔna ka Woke?

“Totetemale monga l’akambo efula wa nsala lo etena k’ekomelo ka ‘nshi y’ekomelo’” (Tshoto y’Etangelo, Ngɔndɔ ka dikumi 2019, odingɔ 16-18)

Kakɔna kasala andɔshi aso amɔtshi dia tɔtɛwɔla lo mbetawɔ?

Tetawɔke dia kesama (9:32)

L’ɔkɔndɔ wata ɔnɛ: “Lakatayangaka Nzambi oma ko dikɛnda diami,” adia awui wendana l’ɔlɔmbɛdi ɔmɔtshi wa l’ɔtɛmwɛlɔ wa Shinto wakahembola losambi l’ɔtɛmwɛlɔ wa kashi.

“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka dikumi 1, 2011)