Yeso l’ambeki ande wambetsha etsho esato la Bɛtaniya, ntatɛ lam’akawakome oma la Jeriko. Kakianɛ la pindju ka pɛɛ, Nisana 10, vɔ wambotshɔ la Jɛrusalɛma. Yeso ekɔ la ndjala. Ɔnkɔnɛ, etena kambondɛna osongo wa fingo, nde ambotshɔ otsha lɛkɔ. Onde vɔ wekɔ la elowa wa fingo?

Tekɔ l’ekomelo ka Ngɔndɔ ka sato, koko eleko ka fingo ekɔ Ngɔndɔ ka samalo. Koko, osongo akɔ waki l’akatshi nɛ dia wakamɔngɛ esadi. Diakɔ diele, Yeso akafɔnya dia elowa wakahombe monga lɔkɔ. Koko, nde kotana kaanga ɔtɔi. Akatshi wakasha osongo ɔsɔ ɛnamelo ka kashi. Ko Yeso akate ate: “Onto halɛki elowa ayɛ nto pondjo.” (Makɔ 11:14) Mbala kakɔ ɔtɔi, osongo wakatatɛ moma ndo kitshimudi ya dikambo sɔ yayoshama la wedi a pindju.

Kombeta edja, Yeso l’ambeki ande wakakome la Jɛrusalɛma. Nde akatshu lo tɛmpɛlɔ kakandasɛdingola la dikɔlɔ di’etshi. Koko ɛlɔ nde hakome tsho lo sɛdingola; nde ambɔsa yɛdikɔ yele oko nyɛ yakandɔshi ambeta ɛnɔnyi esato lo Dambo di’Elekanelo dia lo 30 T.D. (Joani 2:14-16) L’etena kɛnɛ Yeso ambotshanya “wanɛ wakasondjaka ndo wanɛ wakasombaka diangɔ lo tɛmpɛlɔ.” Ndo nto, nde ambosokola “mɛsa w’amengodi wa falanga la ekala wa wanɛ wakasondjaka benga.” (Makɔ 11:15) Nde kombetawɔ dia kaanga onto lakatɛmbaka diangɔ oma lo wedi ɔmɔtshi w’osomba otsha lo wedi okina nkamba la sɛkɛ dia tɛmpɛlɔ oko hiembola.

Lande na kakɔshi Yeso yɛdikɔ ya wolo ya ngasɔ otsha le amengodi wa falanga ndo wanɛ wakasondjaka nyama lo tɛmpɛlɔ? Nde akate ate: “Shi akafundama ɔnɛ: ‘Luudu lami layelamɛ luudu la dɔmbɛlɔ dikambo dia wedja tshɛ’? Koko nyu nyambolietɛ wooko w’apɔtwanyi.” (Makɔ 11:17) Kɛnɛ kakatshutshuya Yeso dia mbelɛ anto asɔ ɔnɛ apɔtwanyi ekɔ nɛ dia vɔ mbidiyɛka wanɛ wakasombaka nyama lo dikambo dia elambo eshinga wolo. Yeso akɛnyi dia kɛnɛ kakawasalaka ekɔ oko mbiva kana mpɔtɔla.

Lo metɛ, ewandji w’ɛlɔmbɛdi, afundji ndo ɛlɔhɛ wa wodja wakoke kɛnɛ kakasale Yeso, ndo wakanyomosala la wolo dia mbodiaka. Koko, vɔ waki l’okakatanu ɔmɔtshi. Vɔ haweye woho wakokawɔ ndjaka Yeso, nɛ dia anto wakayaka efula dia ndjohokamɛ.

Aha tsho ase Juda wa lootɔ koko ndo ase wedja wakɔtɔka l’ɔtɛmwɛlɔ w’ase Juda mbakaye lo Dambo di’Elekanelo. L’atei awɔ mbaki ndo ase Ngirika wakaye dia ndjɔtɛmɔla lo fɛtɛ kɛsɔ. Vɔ wakaye le Filipɛ, ondo l’ɔtɛ wakinde la lokombo la lo Grɛkɛ ndo wakɔlɔmbɛ dia mɛnana la Yeso. Ondo Filipɛ kombeyaka dia ekɔ dimɛna di’anto asɔ mpomana la Yeso, diakɔ diele nde akatɛ Andɛlɛ dikambo sɔ. Vɔ akɔ ahende wakatotɛ Yeso lele ondo ekekɔ paka lo tɛmpɛlɔ dikambo sɔ.

Yeso akeyaka dia nde ayodiakema l’ɔkɔngɔ wa nshi ngana, diakɔ diele ɔsɔ komonga etena ka ngɛnyangɛnya anto lo nsaki yawɔ kana nyanga lokumu. Nde akakadimola apɔstɔlɔ ahende asɔ lo mbasha ɛnyɛlɔ ate: “Wonya ambokoka wa Ɔna onto tombɔma. Lo mɛtɛ kanyotɛmi nte, naka lɔsɛkɛ l’eponga halɔkwɛ lo nkɛtɛ ko lɔ mvɔ, lɔ layotshikalaka paka lɔsɛkɛ 1, ko naka lɔ mvɔ, kete lɔ layotondja nsɛkɛ efula.”​—Joani 12:23, 24.

Lɔsɛkɛ ɔtɔi l’eponga koka mɛnama dia bu ohomba efula. Koko, naka lɔ monɛma ndo “mvɔ” oko woho, lɔ koka ntomba ndo l’edjadja ka wonya mbola ko ndjokoma lɔlɛngɛsɛ lele la washa efula. Woho akɔ waamɛ mbele, Yeso ekɔ onto ɔtɔi la kokele. Koko, lo monga la kɔlamelo le Nzambi polo ndo lo nyɔi, nde ayonga ehomɔ kasha lɔsɛnɔ la pondjo le anto efula wayonga la yimba yakɔ yaamɛ ya ndjahombia. Ɔnkɔnɛ, Yeso akate ate: “Onto tshɛ lalanga lɔsɛnɔ lande ayolishisha, koko onto tshɛ lahetsha lɔsɛnɔ lande l’andja ɔnɛ ayolikokɛ dia nkondja lɔsɛnɔ la pondjo.”​—Joani 12:25.

Yeso kokanyiyaka tsho dikambo diande ndamɛ, diakɔ diakandate ate: “Naka onto alanga kambɛmi olimu, nde andjele, ndo lɛnɛ ayomonga kayonga ndo onto lankambɛ olimu. Naka onto alanga kambɛmi olimu, Papa ayowosha kɛnɛmɔ.” (Joani 12:26) Ɔsɔ mɛtɛ ekɔ difuto dia dimɛna! Anto wayoshama kɛnɛmɔ oma le She wayonga kaamɛ la Kristo lo Diolelo.

Lo mbɔhɔ asui wa wolo ndo nyɔi ka kɔlɔ kakokongɛka, Yeso akate ate: “Dimi lambohandjɔ wɔɔngɔ. Ayomota nto? Papa, onshimbe lo wonya ɔnɛ.” Koko Yeso kotona dia lolango laki Nzambi salema. Nde akakotsha ate: “Koko dia dikambo diakɔ mbakamaye la nkɛtɛ.” (Joani 12:27) Yeso aketawɔka kɛnɛ tshɛ kakakongɛ Nzambi mbidja ndo nyɔi kande k’olambo.

Lo tɛmpɛlɔ Lushi l’ɔtɔi lo Nisana 10, Yeso ekɔ lo ntɛkɛta dikambo dia nyɔi kande. Lo ndjakiyanya lo shɛngiya yayonga la lokumu lele la Nzambi, Yeso akate ate: “Papa, otombole lokombo layɛ.” Dui dia wolo diakokɛma oma l’olongo diakakadimola ɔnɛ: “Dimi lakalitombola ndo layolitombola nto.”​—Joani 12:27, 28.

Anto waki suke wakɔtɔ l’okandokando. Amɔtshi wakɔshi dia wakoki dikungola dia mvula. Akina wakate vate: “Ondjelo mbɔtɛkɛtshi la nde.” (Joani 12:29) Koko, ekɔ Jehowa mbakiwɔ oma la mpokamɛ! Ɔsɔ bu mbala ka ntondo kakoke anto dui dia Nzambi lo kɛnɛ kendana la Yeso.

Ɛnɔnyi esato l’etenyi la ntondo, lo batisimu ka Yeso, Joani Obatizanyi akoke Nzambi ata dia Yeso ate: “Ɔnɛ ele Ɔnami, lokami ngandji, ɔnɛ lamometawɔ.” Ndo nto, l’ɔkɔngɔ wa Dambo di’Elekanelo dia lo 32 T.D., Yeso akahilɔ la ntondo ka Jakɔba, Joani ndo Petero. Apami asato asɔ wakoke Nzambi ata ate: “Ɔnɛ ele Ɔnami la ngandji, ɔnɛ lamometawɔ. Nyoohokamee.” (Mateo 3:17; 17:5) Koko wonya ɔnɛ, mbala kɛnɛ ka sato, Jehowa ambɔtɛkɛta woho wakoka anto efula mboka!

Yeso akate ate: “Dui sɔ hadiokɛmi dikambo diami, koko dikambo dianyu.” (Joani 12:30) Dui sɔ ekɔ mɛtɛ djembetelo yɛnya dia nde ekɔ Ɔna Nzambi, Mɛsiya wakalakema.

Ndo nto, woho wakatshikala Yeso la kɔlamelo lɔsɛnɔ lande l’otondo, mɛnyaka yoho yahomba anto nsɛna ndo shikikɛka dia Satana Diabolo, owandji w’andja ɔnɛ pombaka ndjakema. Yeso akate ate: “Kilombo k’andja ɔnɛ kekɔ lo salema l’etena kɛnɛ ndo l’etena kɛnɛ owandji w’andja ɔnɛ ayokashema.” Lo dihole dia monga dui dia lonyangu, nyɔi ka Yeso kayasukana ayonga otshumba. Lo woho akɔna? Nde akalembetshiya ate: “Koko naka dimi minyɛma oma la nkɛtɛ, kete dimi layokotola weho tshɛ w’anto le mi.” (Joani 12:31, 32) Lo tshimbo ya nyɔi kande ka l’otamba, Yeso ayokotola anto oya le nde ndo ayodihola mboka k’otsha lo lɔsɛnɔ la pondjo.

Lo nkadimola lo kɛnɛ kakate Yeso dia nde ‘ayonyɛma,’ olui w’anto wakate ɔnɛ: “Takoke oma l’Ɛlɛmbɛ dia Kristo tshikalaka pondjo. Ko woho akɔna woyota wate Ɔna onto pombaka minyɛma? Ele Ɔna onto latayɛ ɔsɔ?” (Joani 12:34) Kaanga mbakawɛnyi tolembetelo tshɛ, mbidja ndo woho wakawoke dui dia Nzambi, efula ka l’atei awɔ kombetawɔ dia Yeso ekɔ Ɔna onto la mɛtɛ, mbuta ate Mɛsiya wakalakema.

Oko wakandasale ntondo, Yeso akatɛkɛta dia nde ekɔ “osase.” (Joani 8:12; 9:5) Nde akatɛ olui w’anto ate: “Osase wayoyala l’atei anyu lo tshanda mɔtshi. Nyɔkɛndɛkɛndɛ etena kenyu la osase diaha wodjima nyahemɛ . . . Nyonge la mbetawɔ le osase etena kenyu la osase dia nyu monga ana w’osase.” (Joani 12:35, 36) Ko Yeso akanya demba, nɛ dia Nisana 10 bu lushi lakandahombe mvɔ. Lo Elekanelo ka lo Nisana 14 mbele lushi ‘layondonyɛma,’ mbuta ate layondohanema l’otamba.​—Ngalatiya 3:13.

Lo mboka sso l’olimu wambokamba Yeso, mɛnamaka hwe dia prɔfɛsiya kɛsɔ kekɔ lo nkotshama lo woho wele ase Juda hawongi la mbetawɔ le nde. Isaya akatatshi dia anto wayetɛma totshungu ndo etema awɔ wayonga lonyu diaha vɔ ndjokadimɔ ko nkɔnɔ. (Isaya 6:10; Joani 12:40) Eelo, efula k’ase Juda wakatone l’okonda tshɛ tolembetelo tɛnya dia Yeso mbele Otshungodi awɔ wakalakema, mbuta ate mboka ka lɔsɛnɔ.

Nikɔdɛmɔ, Yɔsɛfu y’ose Arimateya ndo emboledi ekina efula “waki la mbetawɔ” le Yeso. Ko onde vɔ wayosala akambo lo ndjela mbetawɔ kana wayokalola ɛkɔngɔkɔngɔ oyadi l’ɔtɛ wokawɔ wɔma wa mbitshanyema oma lo shinangɔnga kana l’ɔtɛ ‘walangawɔ lotombo l’anto’?​—Joani 12:42, 43.

Yeso ndaamɛ akalembetshiya kɛnɛ kalɔmbama dia monga la mbetawɔ le nde ate: “Onto tshɛ lele la mbetawɔ le mi, bu la tɔ le mi dimɛ oto, koko ndo le Ɔnɛ lakantome. Onto tshɛ lambɔmɛna ambɛna ndo Ɔnɛ lakantome.” Akambo wa mɛtɛ wakewoya Nzambi Yeso dia mbetsha ndo wakatetemalaka Yeso mbetsha, wekɔ akambo wa mɛtɛ w’ohomba efula diakɔ diakandakoke mbuta ate: “Onto tshɛ latona ndo lahetawɔ ɛtɛkɛta ami, ɔnɛ layowolombosha ekɔ. Kɛnɛ katami kayowolombosha lo lushi l’ekomelo.”​—Joani 12:44, 45, 48.

Ko Yeso akakominya lo mbuta ate: “Dimi haatɛkɛta lo ndjela tokanyi tami hita, koko Papa lakantome akambisha didjango dia kɛnɛ kahombami mbuta ndo ntɛkɛta. Ndo nto, dimi mbeyaka dia didjango sɔ nembetshiyaka lɔsɛnɔ la pondjo.” (Joani 12:49, 50) Yeso akeyaka dia kem’edja, nde ayotshola dikila diande diasha lɔsɛnɔ oko olambo dikambo di’anto wele la mbetawɔ le nde.​—Rɔmɔ 5:8, 9.