Wamato wakaye lo diombo waki la lonyangu l’efula lo woho wakawatane diombo diaya hwe! Mariya w’ose Mangadala ‘akalawɔ otsha le Simɔna Petero ndo le ombeki okina wele Yeso akawokaka ngandji efula,’ mbuta ate ɔpɔstɔlɔ Joani. (Joani 20:2) Koko, wamato akina wakatshikala lo diombo wakɛnyi ondjelo. Ndo l’etei ka diombo di’ohɔma, vɔ wakɛnyi ondjelo okina “ɔlɔtshi okutu wa wɛma.”​—Makɔ 16:5.

Ondjelo ɔmɔtshi akawatɛ ate: “Tanyokake wɔma, dimi mbeyaka dia nyekɔ lo nyanga Yeso lakawadiake l’otamba. Nde bu lanɛ, nɛ dia nde akolwe oko wakandate. Nyoye nyoyende lam’aki odo ande. Ɔnkɔnɛ, nyotshu esadi nyotote ambeki ande dia nde ambolɔ. Nyolonge, nde ambeta la ntondo kanyu otsha la Ngalileya.” (Mateo 28:5-7) Ɔnkɔnɛ, ‘watasake lokomba ndo wele l’ɔngɛnɔngɛnɔ w’efula,’ wamato akɔ wakalawɔ dia totɛ ambeki.​—Makɔ 16:8.

L’etena kɛsɔ, Mariya akatɛnana la Petero ndo la Joani. Ahetanɛ la lɔhɛngɔ nde akawatɛ ate: “Wakanyisha Nkumadiɔndjɔ oma lo diombo, hateye lɛnɛ akawookitshisha.” (Joani 20:2) Petero nde la Joani wakakɔ la lowango. Joani akaleke lowango ko nde akakome ntondo lo diombo. Nde akalengɛ lɔkɔ ko akɛnyi bɛtshi dia ahɔndɔ, koko nde kɔmbɔtɔ l’etei.

Lam’akakome Petero, nde akɔtɔ l’etei ka diombo. Nde akɛnyi ahɔndɔ wa linɛnɛ ndo ahɔndɔ wakawɔmbɛ Yeso l’ɔtɛ. Joani akayɔtɔka ndo aketewɔ kɛnɛ kakate Mariya. Kaanga mbakate Yeso ntondo dia nde ayolɔ, ndooko onto la l’atei awɔ lakashihodia dia nde ambolɔ. (Mateo 16:21) Vɔ wakatshimbe wɔɔngɔ ndo wakakalola lawakawɔ. Koko, Mariya akayokalola lo diombo, akatshikala lɛkɔ.

Etena kɛsɔ, wamato akina wakatatshɔka dia totɛ ambeki dia Yeso ambolɔ. Lam’akawatalawɔka dia tosala dui sɔ, Yeso akahomana la wɔ ndo akate ate: “Mɔyɔ anyu!” Vɔ wakakusama l’ekolo ande ndo “wakɔɔlɛmiya.” Ko Yeso akate ate: “Tanyokake wɔma! Nyotshu nyotote analengo dia vɔ ntshɔ la Ngalileya, lɛkɔ mbayowotɔmɛna.”​—Mateo 28:9, 10.

Ntondo, lam’akasalema didimu dia nkɛtɛ ndo lam’akɛnama andjelo, asɔlayi waki lo diombo “wakasake lokomba ndo wakayala oko anto wambovɔ.” Lam’akawakashimɔ, vɔ wakɔtɔ l’osomba ndo “wakatotɛ ewandji w’ɛlɔmbɛdi kɛnɛ tshɛ kakatombe.” Oma laasɔ, ɛlɔmbɛdi wakasawola la dikumanyi di’ase Juda. Wakɔshi yɛdikɔ ya mbisha asɔlayi etshimba dia mbishɛ dui diakɔ ndo mbuta ɔnɛ: “Ambeki ande wakaye l’otsho ko wakayowova wonya wakiso lo djɔ.”​—Mateo 28:4, 11, 13.

Asɔlayi w’ase Rɔmɔ wakakokaka ndjakema naka vɔ ndala djɔ lo dihole di’olimu, ɔnkɔnɛ ɛlɔmbɛdi wakalake vate: “Naka nguvɛrnɛrɛ amboka dikambo sɔ [kashi kawɔ k’ɔnɛ vɔ wakalale], sho tayowolembetshiya dikambo sɔ ndo nyu hanyotoyakiyanya.” (Mateo 28:14) Asɔlayi wakɔshi etshimba ɛsɔ ndo wakasale kɛnɛ kakawatɛ ɛlɔmbɛdi. Ɔnkɔnɛ, kashi k’ɔnɛ wakayova odo wa Yeso kakadiangana le ase Juda.

Mariya w’ose Mangadala akatetemala ndela lo diombo. Lam’akandasukana dia nengɛ l’etei, nde akɛnyi andjelo ahende wɔlɔtshi ahɔndɔ wa wɛma! Ɔmɔtshi mbidjasɛ l’ɔtɛ wa dihole diaki odo wa Yeso ndo okina l’ekolo. Vɔ wakawombola vate: “Womoto, lande na kalelayɛ?” Mariya akakadimola ate: “Wakayonya Nkumadiɔndjɔ, handeye lɛnɛ akawatookitsha.” Lam’akandakadimɔ, Mariya akɛnyi onto okina. Onto akɔ akawombola nto dimbola diakawombola andjelo ndo akakotsha ate: “Onto akɔna ayangayɛ?” Lo fɔnya dia nde kele kanga ekambɔ, Mariya akate ate: “Yɔnɛ, naka wɛ kakawonyisha, ombute lɛnɛ akayokitshisha kele towɔshi.”​—Joani 20:13-15.

Lo mɛtɛ, Mariya akatɛkɛtaka la Yeso lakolwama ndo l’etena kɛsɔ Mariya kombeya. Koko, etena kakate Yeso ate: “Mariya!” nde akashihodia dia ekɔ Yeso, lo mbeya yoho yokondɔtɛkɛtaka la nde. Mariya akate l’ɔngɛnɔngɛnɔ tshɛ ate: “Rabɔni!” (kitshimudi ate: “Ombetsha!”). Koko, lo mboka wɔma dia Yeso ayanga mbidɛ otsha lo longo, Mariya akokumbatɛ. Ko Yeso akawotɛ ate: “Tokumbatɛke, nɛ dia dimi taladɛ le Papa. Koko tshɔka le analengo towate wate: ‘Dimi layanga mbidɛ le Papa kami ndo Papa kanyu, le Nzambi kami ndo Nzambi kanyu.’”​—Joani 20:16, 17.

Mariya akalawɔ otsha lɛnɛ aki apɔstɔlɔ ndo ambeki akina. Nde akawatɛ ate: “Dimi lakɛnyi Nkumadiɔndjɔ!” lo nkotsha lo kɛnɛ kakawoke oma le wamato akina. (Joani 20:18) Koko, “vɔ wakɔshi dia ɔsɔ ekɔ awui wa wotata.”​—Luka 24:11.

Lushi la lomingu, Nisana 16, ambeki wakakɔmɔ. Vɔ koshihodia woho wakawatane diombo hwe. (Mateo 28:9, 10; Luka 24:11) La dikɔlɔ, Kleɔpasɛ ndo ombeki okina wakamɔ oma la Jɛrusalɛma otsha la Emayo, ngelo kaki lo kilɔmɛtɛlɛ oko 11.

Etena kakiwɔ lo mboka, vɔ wakatakɛtshanyaka kɛnɛ kaki eke kambeta. Ko onto ɔmɔtshi lahaweye akasambe la wɔ. Onto akɔ akambola ate: “Akambo akɔna asɔ watanyakɛtshanya lo mboka lam’asanyu?” Kleɔpasɛ akakadimola ate: “Onde wɛ ɔngɛndangɛnda keyɛ la Jɛrusalɛma mbahayeye akambo wambotomba lɛkɔ nshi nyɛ?” Ko onto ɔsɔ akambola ate: “Akambo akɔna asɔ?”​—Luka 24:17-19.

Vɔ wakate vate: “Akambo wendana la Yeso y’ose Nazarɛtɛ . . . sho takalongamɛka dia nde mbakahombe ntshungola Isariyɛlɛ.”​—Luka 24:19-21.

Kleɔpasɛ la osekande wakatetemala kɔndɔla akambo wakatombe lushi lɔsɔ. Vɔ wakate dia wamato amɔtshi wakatshu lo diombo lɛnɛ akakundɛma Yeso wakatane diaya hwe ndo wamato asɔ wakɛnyi akambo wa diambo, mbuta ate ɛnamelo ka andjelo wakate dia Yeso ambolɔ. Vɔ wakate dia anto akina wakatshu nto lo diombo ndo “wakatotana paka oko wakatshi wamato.”​—Luka 24:24.

Mɛnamaka dia ambeki ahende asɔ wakayakiyanyaka dia mbeya kɛnɛ kakatombe kɛsɔ. Pami kɛsɔ akakadimola la l’eshikikelo tshɛ dia mingola tokanyi ta kɔlɔ taki l’etema awɔ ate: “Nyu wanɛ wele bu la tomba ndo wahetawɔ esadi akambo tshɛ wakate amvutshi le, onde komonga dimɛna dia Kristo mpomana l’akambo asɔ ndo mbɔtɔ lo lotombo lande?” (Luka 24:25, 26) Nde akatetemala mbalembetshiya avɛsa efula wa l’Afundelo wendana la Kristo.

L’ekomelo, vɔ akɔ asato wakakome suke l’Emayo. Ambeki ahende asɔ wakalangaka nyomohokamɛ akambo asɔ, diakɔ diele vɔ wakalɔmbɛ pami kɛsɔ ɔnɛ: “Tshikala kaamɛ la so, nɛ dia taya dikɔlɔ ndo wonya aya suke la mbidja.” Nde aketawɔ tshikala la wɔ ndo wakawasha yangɔ ya ndɛ. L’ɔkɔngɔ wa pami kɛsɔ nsala dɔmbɛlɔ, nde akate mapa ndo akawasha, vɔ wakaweye ko oma laasɔ nde akashishɔ. (Luka 24:29-31) L’etena kɛsɔ vɔ wakeye mɛtɛ dia Yeso ambolɔ!

La ɔlɔ w’efula, ambeki ahende asɔ wakatatɛ kɛtshanya kɛnɛ k’omawɔ la mɛna ɔnɛ: “Onde etema aso hawonandemi efula etena kakandayasawolaka la so lo mboka, lam’akandayatodiholɛka Afundelo dimɛna?” (Luka 24:32) Vɔ wakakalola esadi eto la Jɛrusalɛma, lɛnɛ akawatotana apɔstɔlɔ ndo anto akina kaamɛ la wɔ. Ntondo ka Kleɔpasɛ la osekande kɔndɔla, vɔ wakoke anto akina wata ɔnɛ: “Lo mɛtɛ, Nkumadiɔndjɔ ambolɔ ndo nde akɛnami le Simɔna!” (Luka 24:34) Ko vɔ akɔ ahende wakakɔndɔla woho wakɛnami Yeso le wɔ. Eelo, ndo vɔ lawɔ wekɔ ɛmɛnyi wa dikambo sɔ.

Etena kɛnɛ kambowotshimba vɔ tshɛ wɔɔngɔ, Yeso ambɛnama lo luudu! Ɔsɔ akɔsamaka oko dikambo diahakoke salema nɛ dia vɔ wakadihe nkuke l’ɔtɛ wa wɔma w’ase Juda. Koko, Yeso akemala l’atei awɔ. Nde akawatɛ la wɔlamu tshɛ ate: “Wɔladi wayale la nyu.” Koko vɔ wakoke wɔma. Oko wakawasale mbala kɛmɔtshi, vɔ “wakafɔnya dia wambɛna edimu.”​—Luka 24:36, 37; Mateo 14:25-27.

Dia mbowaɛnya dia nde bu edimu kana ɛngɔ kɛmɔtshi kakawafɔnyaka lɔfɔnya koko ɔnɛ nde ekɔ la demba dia l’emunyi, Yeso akawaɛnya anya la ekolo ande ko akate ate: “Lande na kahandjɔnyu wɔɔngɔ ndo lande na kenyu la taamu l’etema anyu? Nyende anya la ekolo ami ɛnɛ, toko dimɛ ɔnɛ! Nyominande ndo nyomende, edimu bu l’emunyi la weka woho wamɛnanyu ɔnɛ.” (Luka 24:36-39) Vɔ waki l’ɔngɛnɔngɛnɔ w’efula ndo wakambe, koko vɔ waki la yema ya taamu.

Dia nyomoyanga mbakimanyiya dia ekɔ mɛtɛ nde, Yeso akambola ate: “Onde nyu keema la yangɔ ya ndɛ lanɛ?” Vɔ wakawosha etenyi ka lose la lofumba ko nde akale. Oma laasɔ nde akate ate: “Etena kakimi kaamɛ la nyu, [ntondo ka nyɔi kami], dimi lakanyotɛ nte, akambo tshɛ wakafundama lo Ɛlɛmbɛ wa Mɔsɛ, lo Amvutshi ndo lo Esambo lo dikambo diami pombaka kotshama.”​—Luka 24:41-44.

Yeso akakimanyiya Kleɔpasɛ ndo osekande dia vɔ nshihodia Afundelo ndo kɛsɔ kambondosala nto kakianɛ dikambo dia anto tshɛ wakatshumana laawɔ ate: “Ngasɔ mbakadiafundama ɔnɛ Kristo pombaka nsowa ndo mbolɔ oma lo nyɔi lushi la 3, ndo lo lokombo lande mbahomba esambishelo salema lo wedja tshɛ dia anto ndjatshumoya ko vɔ dimanyiyama pɛkato yawɔ, ntatɛ oma la Jɛrusalɛma. Nyu pombaka monga ɛmɛnyi w’akambo asɔ.”​—Luka 24:46-48.

L’ɔtɛ w’ɔkɔkɔ ɔmɔtshi, Tɔma komonga laawɔ. Lo nshi yakayele, anto akina wakawotɛ l’ɔngɛnɔngɛnɔ tshɛ ɔnɛ: “Takɛnyi Nkumadiɔndjɔ!” Tɔma akakadimola ate: “Naka dimi latɛnyi wesho wa nsɛti l’anya ande ndo latadje lohita lami lo wesho wa nsɛti yakɔ ndo latadje lonya lami lo wosho wa lo lohandju lande, kete dimi hambetawɔki pondjo.”​—Joani 20:25.

Nshi enanɛi l’ɔkɔngɔ, ambeki wakasangana nto ndo wakadihe nkuke, l’etena kɛsɔ ndo Tɔma akikɔ. Yeso akalɔtɛ demba di’onto ndo akɛnama l’atei awɔ ko akawasha mɔyɔ ate: “Wɔladi wayale la nyu!” Yeso akakadimɔ otsha le Tɔma ndo akate ate: “Dja lohita layɛ lanɛ ndo enda anya ami. Dja lonya layɛ lo lohandju lami ndo tshika monga la taamu, onga la mbetawɔ.” Tɔma akate ate: “Nkumɛmi ndo Nzambi kami!” (Joani 20:26-28) Eelo, kakianɛ nde aya bu la taamu dia Yeso ambolɔ oko etongami ka lo nyuma kele la wolo ndo ekɔ onyimpala wa Jehowa Nzambi.

Yeso akate ate: “Wɛ ambetawɔ dikambo wɛ ambɔmɛna? Diɛsɛ le wanɛ wetawɔ aha la mɛna.”​—Joani 20:29.