L’ɔkɔngɔ wa Adama l’Eva mimɔ oma l’ekambɔ k’Ɛdɛna, vɔ wakote ana efula. Ɔnawɔ l’enondo Kɛna, akayala okambi wa dikambɔ ndo ɔnawɔ lahende Aabɛlɛ, akayala olami wa dongalonga.

Lushi lɔmɔtshi, Kɛna nde la Aabɛlɛ wakalambola Jehowa elambo. Onde wɛ mbeyaka elɛwɔ olambo? Ɔsɔ ekɔ woshasha ɔmɔtshi wa laande. Jehowa akangɛnangɛna olambo waki Aabɛlɛ, koko nde kɔngɛnangɛna waki Kɛna. Dui sɔ diakomadia Kɛna wolo efula. Jehowa akahɛmɔla Kɛna dia nkɛlɛ kande kakakoke mbokonya dia nsala dikambo dimɔtshi dia kɔlɔ. Koko Kɛna kompokamɛ.

Lo dihole dia nde mpokamɛ, Kɛna akatɛ Aabɛlɛ ate: ‘Yete totshinde l’ekambɔ.’ Etena kakiwɔ vɔamɛ l’ekambɔ, Kɛna akakɔmɔla ɔnango ndo akodiake. Kakɔna kakahombe Jehowa nsala la dui sɔ? Jehowa akasha Kɛna dilanya lo mbotoma etale mangana la nkumbo kande. Kɛna takandahombe nkalola pondjo.

Onde sho kondjaka wetshelo ɔmɔtshi lanɛ? Sho mbeyaka ntatɛ monga la nkɛlɛ naka akambo hawosalema oko wakombolaso. Naka tamboka nkɛlɛ koyahame le so, kana naka anto amɔtshi wambotɔhɛmɔla l’ɔtɛ wambowɛna dia tambomala, sho pombaka nsala etshikitanu esadi esadi ndo mbahemɛ nkɛlɛ kaso la ntondo ka tɔ ndjotahemɛ.

Lam’ele Aabɛlɛ akokaka Jehowa ngandji, ndo akasalaka kɛnɛ kele ɔlɔlɔ, Jehowa ayowohɔka. Nzambi ayolola Aabɛlɛ etena kayondetɛ nkɛtɛ paradiso.

L’edjedja ka wonya, anto wakayonga efula la nkɛtɛ. Efula ka l’atei awɔ wakasalaka akambo wa kɔlɔ. Kaanga andjelo amɔtshi l’olongo wakakome akanga wa kɔlɔ. Vɔ wakatshike ahole awɔ l’olongo ko mpolɔ la nkɛtɛ. Onde wɛ mbeyaka lande na kakawasale ngasɔ? Wakasale ngasɔ lo ndɔta alemba w’anto ndo ndjotshuka wamato.

Andjelo wakote la wamato wakawatshuke. Ana asɔ wakole, wakakome anto wa wolo efula ndo wakahɛnyahɛnyaka anto. Vɔ wakahomuyaka anto. Jehowa kokoka ntshika dia akambo asɔ ntetemala. Diakɔ diele nde akɔshi yɛdikɔ ya ndjaka anto wa kɔlɔ la elola.

Koko aki onto ɔmɔtshi lakatshikitana la anto akina tshɛ. Nde akokaka Jehowa ngandji. Lokombo lande aki Nɔa. Nde aki la wadi ndo la ana asato, Shɛmɛ, Hama la Jafɛtɛ, ndo ɔna la ɔna aki la wadɛnde. Jehowa akatɛ Nɔa dia nsala waato wa luudu dia nde la nkumbo kande ndjoshimbamɛ lo Mvula k’elola. Waato wa luudu ekɔ ɔshɛtɛ wa shaka wakoka teha l’ashi. Jehowa akatɛ Nɔa dia mbɔtshiya waa nyama l’etei ka waato wa luudu dia ndo yɔ lawɔ shimbamɛ.

Aha la ntshimbatshimba, Nɔa akatatɛ la mbika waato wa luudu. Olimu ɔsɔ akɔsɛ Nɔa nde la nkumbo kande ɛnɔnyi oko 50. Vɔ wakake waato wa luudu paka oko wakawatɛ Jehowa. L’etena kɛsɔ, Nɔa akahɛmɔla anto lo dikambo dia Mvula k’elola kɛsɔ. Koko ndooko onto lakohokamɛ.

L’ekomelo, etena kakayokoka ka mbɔtɔ lo waato wa luudu. Ɛsɔ tende kɛnɛ kakayotomba oma laasɔ.