Komangana etale la Babɛlɛ mbaki osomba wa Ura, lɛnɛ akatɛmɔlaka anto tozambizambi efula lo dihole dia Jehowa. Koko, aki onto ɔmɔtshi laki la Ura lakatɛmɔlaka paka Jehowa oto. Lokombo lande Abrahama.

Jehowa akatɛ Abrahama ate: ‘Mɔ oma lo ngelo kayɛ ndo ntshika ewotɔ ayɛ kele tshɔka lo wodja wayomokɛnya.’ Oma laasɔ, Nzambi akalake ate: ‘Wɛ ayoyala wodja wa woke ndo dimi layosalɛ anto efula wa la nkɛtɛ akambo w’amɛna l’ɔtɛ ayɛ.’

Abrahama kombeyaka lɛnɛ akootome Jehowa, koko nde akayaɛkɛ le Jehowa. Ɔnkɔnɛ, Abrahama, wadɛnde Sara, papa kande Tɛra ndo Lɔta laki ɔna aki ɔnango, wakalɔngɛ diangɔ diawɔ ndo wakatatɛ lɔkɛndɔ lawɔ l’otale l’okitanyiya tshɛ.

Abrahama aki l’ɛnɔnyi 75 etena kakandakome nde la nkumbo kande lo wodja wakalange Jehowa mbowaɛnya. Wodja akɔ wakelamɛka Kanana. Lɛkɔ mbakatɛkɛta Nzambi la Abrahama ndo mbakandasha daka nɛ: ‘Layosha ana ayɛ wodja w’otondo wɛnayɛ ongo.’ Koko, laasɔ ko Abrahama nde la Sara waya esombe koko watote. Ko ngande wakakoke Jehowa nkotsha daka diande sɔ?

Abrahama nde la Sara wakatshukana l’edja k’ɛnɔnyi efula. Vɔ wakatshike luudu lawɔ la dimɛna efula la Ura ndo wakatshu todjasɛ lo luudu la dipɛma. Koko, Sara kokiyana nɛ dia nde akayaɛkɛka le Jehowa.

Sara akalangaka efula dia monga l’ɔna, diakɔ diakandatɛ Abrahama ɔnɛ: ‘Naka okambi ami Hangara mbota, kete ɔna ɔsɔ ayonga oko ɔnami.’ L’edjedja ka wonya, Hangara akayotaka ɔna pami. Lokombo lande Ishimaɛlɛ.

L’ɔkɔngɔ w’ɛnɔnyi efula, etena kaki Abrahama l’ɛnɔnyi 99 ndo Sara l’ɛnɔnyi 89, vɔ wakalongola angɛndangɛnda asato. Abrahama akawaelɛ dia vɔ tomuya l’ɛse k’osongo ndo dia ndɛ yangɔ. Onde wɛ mbeyaka waa na waki angɛndangɛnda asɔ? Vɔ waki andjelo! Vɔ wakatɛ Abrahama ɔnɛ: ‘Ɔnɔnyi wayaye, l’etena kɛnɛ, wɛ la wadɛyɛ nyayonga la ɔna.’ Sara akahokamɛka oma l’etei ka luudu la dipɛma. Nde akɔlɛ l’otema ndo akate ate: ‘Onde mɛtɛ dimi koka mbota ɔna lam’ele laya osombe efula?’

Ɔnɔnyi wakayele, Sara akoote ɔna pami, paka oko wakalake ondjelo waki Jehowa. Abrahama akawɔlɛ Isaka, kitshimudi ate “Mbɔla.”

Etena kaki Isaka l’ɛnɔnyi oko etanu, Sara akɛnyi Ishimaɛlɛ awɔsɔka. Lam’ele nde akalangaka nkokɛ ɔnande, ɔnkɔnɛ nde akatshu le Abrahama ndo akɔlɔmbɛ dia nde mbitshanya Hangara nde la Ishimaɛlɛ. Abrahama kombetawɔ dui sɔ la ntondo. Koko, Jehowa akatɛ Abrahama ate: ‘Hokamɛ Sara. Dimi layokokɛ Ishimaɛlɛ. Koko, lo tshimbo y’Isaka mbayokotshama alaka ami.’