Lɔta akadjasɛka kaamɛ la Abrahama, ɔnango she lo wodja wa Kanana. L’ekomelo, Abrahama la Lɔta wakayongaka la nyama efula polo ndo waya bu l’ɛtshi ka nkɛtɛ kahombama dia ndjilesha yɔ tshɛ. Abrahama akatɛ Lɔta ate: ‘Hatokoke mbidjasɛ nto kaamɛ dihole ɔtɔi. Lam’alangayɛ, sɔna lɛkɛ lalangayɛ ntshɔ ndo dimi layɔsɔna lɛkɛ lokina.’ Abrahama akɛnya dia nde bu la lokaki, shi mɛtɛ?

Lɔta akɛnyi ɛtshi ka nkɛtɛ ka dimɛna efula kaki suke l’osomba wa Sɔdɔma. Ashi la adiyo w’ɛlɛsɛlɛsɛ waki efula lɛkɔ. Ɔnkɔnɛ, nde akasɔnɛ dihole diakɔ ndo akonɔ la nkumbo kande lɛkɔ.

Anto wa lo Sɔdɔma ndo wa lo Ngɔmɔra osomba waki suke, waki anto wa kɔlɔ efula. Lo mɛtɛ, vɔ waki anto wa kɔlɔ efula, diɔ diakɔ diakɔshi Jehowa yɛdikɔ ya ndanya esomba akɔ. Koko, Nzambi akalangaka nkokɛ Lɔta la nkumbo kande, diakɔ diele nde akatome andjelo ahende dia towaewola ɔnɛ: ‘Nyotombe esadi oma l’osomba ɔnɛ! Jehowa ayanga mbolanya.’

Lɔta kotomba ko wonya akɔ. Nde akatshimbatshimbaka. Ɔnkɔnɛ, andjelo wakakimɛ Lɔta, wadɛnde ndo ana ande ahende wa wamato l’anya ndo wakaatondja oma l’osomba esadi esadi wata ɔnɛ: ‘Nyolawɔ dia nshimbɛ nsɛnɔ yanyu ndo tanyɛwɔke l’ɔkɔngɔ. Naka nyu mbɛwɔ l’ɔkɔngɔ, nyayovɔ!’

Etena kakawakome l’osomba wakawelɛka Zɔara, Jehowa akalɔsha mvula ka dja ndo ka mbɔkɔ la Sɔdɔma la Ngɔmɔra. Esomba ehende ɛsɔ, wakalanyema tshɛ. Etena kakahindolɛ wadi aki Lɔta Jehowa ndo kakandɛwɔ l’ɔkɔngɔ, nde akahilɔ ekundji ka lɛɛhɔ! Koko, Lɔta la anande wa wamato wakahande nɛ dia vɔ wakakitanyiya Jehowa. Vɔ wakahombe monga la lonyangu efula l’ɔtɛ w’ohindodi wa wadi aki Lɔta. Koko vɔ waki l’ɔngɛnɔngɛnɔ nɛ dia vɔ wakakitanyiya alako wa Jehowa.

Abrahama aketshaka Isaka w’ɔnande dia nde mboka Jehowa ngandji ndo ndjaɛkɛ lo alaka tshɛ wa Jehowa. Koko etena kaki Isaka l’ɛnɔnyi oko 25, Jehowa akalɔmbɛ Abrahama dia nde nsala dui dimɔtshi diaki wolo efula nsala. Naa dui diakɔ?

Nzambi akatɛ Abrahama ate: ‘Lam’alangayɛ, ɔsa tshɔi y’ɔnayɛ kele onambolende oko olambo wa lotshumba lo dikona dimɔtshi dia lo nkɛtɛ ya Mɔriya.’ Abrahama kombeyaka lande na kakɔlɔmbɛ Jehowa dia nsala dui sɔ. Koko nde aki l’okitanyiya otsha le Jehowa.

La yosose ya wedi a pindju, Abrahama akɔshi Isaka la ekambi ande ehende ko wakatshu otsha la Mɔriya. L’ɔkɔngɔ wa nshi shato, vɔ wakakoke mɛna akona lo tshalola. Abrahama akatɛ ekambi ande dia vɔ mbakonga etena kambowotshɔ nde la Isaka dia tolambola olambo. Abrahama akasha Isaka ekanda ka nkunyi dia mɛmba ndo Abrahama akɔshi lokuwa. Isaka akambola she ate: ‘Nyama katatatshu tolambola etɔ?’ Abrahama akakadimola ate: ‘Jehowa ayotosha tɔ, ɔnami.’

Etena kakawatokomaka lo dikona, vɔ wakasale elambwelo. Oma laasɔ, Abrahama akakeleka Isaka anya la ekolo ndo akokitsha lo elambwelo.

Abrahama akɔshi lokuwa. Mbala kakɔ ɔtɔi ondjelo wa Jehowa akawelɛ oma l’olongo ɔnɛ: ‘Abrahama! Tosalɛke ɔna kɔlɔ! Kakianɛ lambeya dia wɛ ekɔ la mbetawɔ le Nzambi, nɛ dia wɛ ambetawɔ mbolambola ɔnayɛ.’ Oma laasɔ, Abrahama akɛnyi ɔkɔkɔ w’omi wokakate nseke yawɔ lo dikombokombo. Nde akakelekola Isaka esadi eto ndo akalambola ɔkɔkɔ ɔsɔ lo dihole dia nde.

Ntatɛ lushi lɔsɔ, Jehowa akatatɛ mbelɛ Abrahama ɔnɛ ɔngɛnyi ande. Onde wɛ mbeyaka lande na? Abrahama akasalaka kɛnɛ tshɛ kakalangaka Jehowa nde nsala, oyadi kaanga etena kakinde koshihodia lande na k’ɔlɔmba Jehowa dia nde disala.

Jehowa akohola nto daka diakandasha Abrahama ɔnɛ: ‘Dimi layokɔtshɔkɔla ndo layofudia anayɛ kana tokanula tayɛ.’ Kɛsɔ nembetshiyaka dia Jehowa ayohomba tshɔkɔla anto w’ɛlɔlɔ tshɛ lo tshimbo ya nkumbo ka Abrahama.