Isaka aki l’ɛnɔnyi 40 etena kakandatshuke Rɛbɛka. Nde akolangaka efula. L’edjedja ka wonya, wakayotaka ana ahende, waasa wa apami ato.

Enondo lokombo lande Esao ndo la kose Jakɔbɔ. Esao akalangaka tombatomba ndo nde aki mengenga ka manamana. Koko Jakɔbɔ akalangaka ntshikala la ngelo.

Lo nshi shɔ, ɔna la pami l’enondo, mbakawashaka ɛtshi ka nkɛtɛ koleki ndo falanga etena kakavɔka she. Ɔsɔ mbakawelɛka etenyi k’okitɔ. Lo nkumbo ka Isaka, etenyi k’okitɔ kakendanaka nto la nkondja etenyi kɛmɔtshi k’alaka wakalake Jehowa Abrahama. Esao kondekaka mbidja yimba l’alaka asɔ, koko Jakɔbɔ akeyaka dia vɔ waki ohomba efula.

Lushi lɔmɔtshi, Esao akakawola oma lo wenga ele l’ɔlɛmbɛlɔ efula. Nde akoke diɛndjɛ dia diangɔ dia ndɛ di’amɛna diakakatɛka Jakɔbɔ ndo akate ate: ‘Lambɔlɛmba! Ombisha yema y’osawo wa beela!’ Jakɔbɔ akawotɛ ate: ‘Layokosha, koko ntondo ondake dia mbishami etenyi kayɛ k’okitɔ.’ Esao akate ate: ‘Dimi keema l’ohomba wa etenyi kami k’okitɔ! Wɛ kokaka mbokiɔsa. Ombisha tsho yangɔ ya ndɛ.’ Onde wɛ fɔnyaka dia Esao akasale dui sɔ la lomba? Ndooko. Esao akashisha ɛngɔ kɛmɔtshi ka nɛmɔ efula, paka l’ɔtɛ wa dɔnga di’osawo.

Etena kakakome Isaka osombe wa lokosombe, ɔsɔ aki etena kakandahombe tatshɔkɔdi ɔna l’enondo. Koko Rɛbɛka akakimanyiya Jakɔbɔ, ɔna la kose dia nde nkondja ɔtshɔkɔ ɔsɔ. Etena kakeye Esao dui sɔ, nde aki la nkɛlɛ k’efula ndo akalange ndjaka kosɛnde laki diasa diande. Isaka la Rɛbɛka wakalange nkokɛ Jakɔbɔ, ɔnkɔnɛ vɔ wakawotɛ ɔnɛ: ‘Tshɔka kele todjasɛ la Labana la nyɔ pami polo lam’ayotuta nkɛlɛ ka Esao.’ Jakɔbɔ akoke dako dia ambutshi ande ndo nde akalawɔ dia nkokɛ lɔsɛnɔ lande.

Jehowa akalake Jakɔbɔ dia nde ayowokokɛ paka oko wakandakokɛ Abrahama la Isaka. Jakɔbɔ akatodjasɛ lo dihole diakawelɛka Harana, lɛnɛ akandatotshukaka, akandatongaka la nkumbo ka woke ndo akandatokomaka kanga ɔngɔnyi.

L’ekomelo, Jehowa akatɛ Jakɔbɔ ate: ‘Kalola otsha lo ngelo kanyu.’ Ɔnkɔnɛ, Jakɔbɔ la nkumbo kande wakatatɛ munda lɔkɛndɔ l’otale dia nkalola lo ngelo kawɔ. Lo mboka, anto amɔtshi wakaye le Jakɔbɔ ko wakawotɛ vate: ‘Esao wa ɔnanyɔ ekɔ lo ndjaye, ndo nde ekɔ lo ndjaye la apami 400!’ Jakɔbɔ akoke wɔma ɔnɛ Esao ayowosalɛ nde la nkumbo kande kɔlɔ. Nde akalɔmbɛ Jehowa ate: ‘Lam’alangayɛ onshimbe oma l’anya w’ɔnalengo.’ La wedi a pindju, Jakɔbɔ akatomɛ Esao weshasha w’ɛkɔkɔ, mbudi, ngɔmbɛ, kamɛlɔ ndo mponda efula.

L’otsho akɔ, etena kaki Jakɔbɔ ndamɛ, nde akɛnyi ondjelo! Ondjelo akatatɛ ndɔ la nde. Vɔ wakalɔ polo la pindju. Kaanga mbakahomuya ondjelo ɔsɔ Jakɔbɔ, nde kompekɔ. Ondjelo akate ate: ‘Ontshike ntshu.’ Koko, Jakɔbɔ akate ate: ‘Ndooko, dimi hatokotshika polo wɛ ambɔntshɔkɔla.’

L’ekomelo, ondjelo akɔɔtshɔkɔla. Kakianɛ, Jakɔbɔ ambeya dia Jehowa hatetawɔ dia Esao mbosalɛ kɔlɔ.

La pindju kakɔ, Jakɔbɔ akende lo tshalola ko akɛnyi Esao la apami 400. Jakɔbɔ akete la ntondo ka nkumbo kande ndo akakusama la ntondo k’ɔnango mbala esambele. Esao akalawɔ otsha le Jakɔbɔ ko nde akookumbatɛ. Vɔ ahende wakatondɔ la delo ko wakadje wɔladi. Afɔnyayɛ, ngande wakayaoke Jehowa lo woho wakakandola Jakɔbɔ dui sɔ?

L’ɔkɔngɔ diko, Esao akakalola lakande ndo Jakɔbɔ akatshu lakande. Jakɔbɔ aki tshɛ l’ana 12 w’apami. Nkombo yawɔ yɔ nyɛ: Rubɛna, Simɛyɔna, Lɛwi, Juda, Danɛ, Nafɛtali, Ngada, Ashɛrɛ, Isakara, Zebuluna, Yɔsɛfu ndo Bɛnjamina. Jehowa akakambe la Yɔsɛfu, ɔmɔtshi l’atei wa ana asɔ dia nshimbɛ wodja Ande. Onde wɛ mbeyaka ngande wakandaashimbɛ? Ɛsɔ tende.