Yɔsɛfu aki ɔna ɔmɔtshi la kose l’atei wa ana w’apami wa Jakɔbɔ. Nondo diande wakɛnyi dia Yɔsɛfu akalekaka nangema le shɛwɔ. Afɔnyayɛ, ngande wakawayaoke lo dikambo sɔ? Vɔ wakoke Yɔsɛfu kandjema ndo wakohetsha. Etena kakɛnyi Yɔsɛfu alɔ amɔtshi wende atɛnaka, nde akatɛ anango alɔ akɔ. Vɔ wakɔshi dia alɔ asɔ mɛnyaka dia lushi lɔmɔtshi wayowokusamɛ. Vɔ wakaleke mbohetsha!

Lushi lɔmɔtshi, anango Yɔsɛfu wakalamaka ɛkɔkɔ suke l’osomba wa Shɛkɛmɛ. Jakɔbɔ akatome Yɔsɛfu dia towaenda woho wewɔ. Vɔ wakɛnyi Yɔsɛfu ayaye oma l’etale ndo wakatanɛ lam’asawɔ vate: ‘Ɔmɛnyi wa alɔ ɔnɛ amboya. Nyɛsɔ toodiake!’ Vɔ wakawonde ndo wakawokasha lo difuku di’ɔhɔngɔ. Koko, Juda ɔnangɛwɔ ɔmɔtshi akawatɛ ate: ‘Tanyoodiakake! Nyɛsɔ tosondja oko mfumbe lo dihole dia mbodiaka.’ Ɔnkɔnɛ, vɔ wakasondja Yɔsɛfu la ekenga wa mfɛsa 20 le amundji w’okanda w’ase Midiyana wakatatshɔka otsha l’Edjibito.

Oma laasɔ, anango Yɔsɛfu wakɔshi okutu ande ko wakotambiya lo dikila dia mbudi ndo wakatomɛ shɛwɔ okutu akɔ ko wakatowotɛ vate: ‘Onde ɔnɛ keema okutu w’ɔnayɛ?’ Ɔnkɔnɛ, Jakɔbɔ akɔshi dia nyama kɛmɔtshi ka ngala kakadiaki Yɔsɛfu. Otema ande wakandama la lɔkɔnyɔ. Ndooko onto lakakoke mbosamba.

Yɔsɛfu akasondjama oko mfumbe l’Edjibito le owandji ɔmɔtshi wa lokumu wakawelɛka Pɔtifara. Koko Jehowa aki kaamɛ la Yɔsɛfu. Pɔtifara akɛnyi dia Yɔsɛfu akakambaka olimu dimɛna ndo nde aki onto lakawakokaka mbɛkɛ otema. Kem’edja, Pɔtifara akakitsha Yɔsɛfu owandji wa diangɔ diande tshɛ.

Wadi aki Pɔtifara akɛnyi dia Yɔsɛfu aki pami k’olangala efula ndo ka lokalo. Lushi la lushi, nde akasɛngɔlaka Yɔsɛfu dia nde mbeyana la nde. Kakɔna kakahombe Yɔsɛfu nsala? Nde akatone ndo akate ate: ‘Ndooko, dui sɔ diekɔ kɔlɔ! Nkumɛmi ndjaɛkɛka lemi ndo wɛ ekɔ wadɛnde. Naka dimi mbeyana la yɛ, kete layosalɛ Nzambi pɛkato!’

Lushi lɔmɔtshi, wadi aki Pɔtifara akayange dia mbeyana la Yɔsɛfu la wolo. Nde akokimɛ lo ahɔndɔ ande, ko Yɔsɛfu akalawɔ. Etena kakakalola Pɔtifara la ngelo, wadɛnde akawotɛ dia Yɔsɛfu akayangi mbeyana la nde. Nde kombotɛ kɛnɛ kele mɛtɛ. Pɔtifara akadunganɛ la nkɛlɛ ndo akadje Yɔsɛfu lo lokanu. Koko Jehowa kombohɛ Yɔsɛfu.

Etena kaki Yɔsɛfu lo lokanu, Farawɔ nkumekanga k’Edjibito akɛnyi alɔ wele ndooko onto lakakoke mbolembetshiya. Okambi ande ɔmɔtshi akatɛ Farawɔ dia Yɔsɛfu koka mbotɛ kitshimudi ya alɔ ande. Mbala kakɔ ɔtɔi Farawɔ akatome dui dia vɔ toya la Yɔsɛfu.

Farawɔ akawombola ate: ‘Onde wɛ koka nembetshiyami alɔ ami?’ Yɔsɛfu akatɛ Farawɔ ate: ‘Diangɔ dia ndɛ diayonga tshavutshavu l’Edjibito l’edja ka ɛnɔnyi esambele, oma laasɔ ayoyonga ɛnɔnyi esambele wa ndjala ka kasha. Sɔna onto ɔmɔtshi lele la lomba dia nde momba diangɔ dia ndɛ diaha anto ayɛ ndjovɔ la ndjala.’ Farawɔ akakadimola ate: ‘Lambokɔsɔna! Wɛ ayoyala onto la hende lo lowandji l’Edjibito!’ Ngande wakeye Yɔsɛfu kitshimudi ya alɔ wa Farawɔ? Jehowa akakimanyiya Yɔsɛfu.

L’edja k’ɛnɔnyi esambele wakayele, Yɔsɛfu akombe diangɔ dia ndɛ. Oma laasɔ, ndjala ka kasha kakayonga lo nkɛtɛ k’otondo paka oko wakate Yɔsɛfu. Anto wakayaka oma l’ahole tshɛ dia ndjosomba diangɔ dia ndɛ le Yɔsɛfu. Jakɔbɔ ya she akoke dia diangɔ dia ndɛ diekɔ l’Edjibito, ɔnkɔnɛ nde akatome ana ande w’apami dikumi dia tosomba diangɔ dia ndɛ.

Ana wa Jakɔbɔ wakatshu le Yɔsɛfu lakawaeye mbala kakɔ ɔtɔi. Koko, anango kombeya Yɔsɛfu. Vɔ wakookusamɛ oko wakandɛnyi dɔ etena kakinde eke dikɛnda. Yɔsɛfu akalange mbeya dia kana anango weke la lohetsho. Ɔnkɔnɛ nde akawatɛ ate: ‘Nyu nyekɔ atɔpi. Nyekɔ lo nanga mbeya lɛnɛ ele wodja aso wɔɔdu.’ Vɔ wakate vate: ‘Keema! Sho tekɔ ana wakotɔ 12 la Kanana. Ɔnangɛso ɔmɔtshi ambovɔka ndo kosɛso akatshikala la shɛso.’ Ko Yɔsɛfu akate ate: ‘Nyotombela kosɛnyu ko layetawɔ kɛnɛ katanyu.’ Ɔnkɔnɛ, vɔ wakatshu lo ngelo kawɔ le shɛwɔ.

Etena kakayoshilaka diangɔ dia ndɛ nto, Jakɔbɔ akatome ana ande nto l’Edjibito. Mbala kɛnɛ, vɔ wambotshɔ la kosɛwɔ Bɛnjamina. Dia mpemba anango, Yɔsɛfu akashɛ dikɔhɔ diande dia mfɛsa lo mpaya ka Bɛnjamina ndo akate dia anango wambodiva. Etena kakɛnyi ekambi waki Yɔsɛfu dikɔhɔ lo mpaya kaki Bɛnjamina, anango waki la lonyangu efula. Vɔ wakalɔmbɛ Yɔsɛfu dia mbasha dilanya lo dihole dia Bɛnjamina.

Kakianɛ, Yɔsɛfu ambeya dia anango wambotshikitana. Yɔsɛfu takandakoke nto mbikikɛ. Nde akatondɔ la delo ndo akate ate: ‘Dimi ɔnangɛnyu Yɔsɛfu. Onde papa eke la lɔsɛnɔ?’ Anango wakambe woho w’anyanya. Nde akawatɛ ate: ‘Tanyoyakiyanyake l’ɔtɛ wa kɛnɛ kakanyansalɛ. Nzambi akantome lanɛ dia dimi ndjoshimbɛ nsɛnɔ yanyu. Kakianɛ, nyotshu esadi kele nyotoye la papa.’

Vɔ wakatshu lakawɔ, ko wakatotɛ shɛwɔ losango l’ɔlɔlɔ lɔsɔ ndo wakatshu la nde l’Edjibito. L’ɔkɔngɔ w’ɛnɔnyi efula, Yɔsɛfu la she wakayongaka nto kaamɛ.