Mɔsɛ akadjasɛ la Midiyana l’edja k’ɛnɔnyi 40. Nde akatshuke ndo akote ana. Lushi lɔmɔtshi, etena kakandalamaka ɛkɔkɔ ande suke la Dikona dia Sinayi, nde akɛnyi dui dimɔtshi dia diambo. Dja yakahɛtaka lo dikombokombo di’atɛndɛ, koko diɔ konongolaka! Etena kakasukana Mɔsɛ dia menda lande na, nde akoke dui diatomba oma l’etei ka dikombokombo diakɔ ɔnɛ: ‘Mɔsɛ! Tosukanake lanɛ. Kolola sabata, nɛ dia dihole diemadiyɛ diekɔ dihole di’ekila.’ Ɔsɔ aki Jehowa mbakatɛkɛtaka lo tshimbo y’ondjelo.

Mɔsɛ akoke wɔma, diakɔ diele nde akakombe elungi. Dui diakɔ diakate ɔnɛ: ‘Lambɛna woho wasowa ase Isariyɛlɛ. Layowashimbɛ oma le ase Edjibito ndo layowatɔla lo nkɛtɛ ya dimɛna. Wɛ kele onto layotondja wodja ami oma l’Edjibito.’ Wɛ hɛnyi dia dikambo sɔ diakahombe mambiya Mɔsɛ?

Mɔsɛ akambola ate: ‘Ngande wayomota naka anto wambomimbola ɔnɛ okotomi?’ Nzambi akakadimola ate: ‘Tɛwɔ dia Jehowa, Nzambi ka Abrahama, Nzambi k’Isaka ndo Nzambi ka Jakɔbɔ mbontomi.’ Oma laasɔ, Mɔsɛ akate ate: ‘Kakɔna kayomosala naka anto hawompokame?’ Jehowa akasha Mɔsɛ djembetelo yɛnya dia Nde ayowokimanyiya. Nde akatɛ Mɔsɛ dia nde mbikasha danga diande lo nkɛtɛ. Oma laasɔ, danga diakakadimɔ oloyi! Etena kakakimɛ Mɔsɛ oloyi akɔ lo wela, vɔ wakakadimɔ danga. Jehowa akate ate: ‘Lam’ayosala dihindo nɛ, diɔ diayɛnya dia dimi mbokotomi.’

Mɔsɛ akate ate: ‘Dimi keema ɔtɛkɛtshi wa dimɛna.’ Jehowa akolake ate: ‘Layokotɛ kɛnɛ ka wɛ tota ndo layotoma ɔnanyɔ Arɔna dia kokimanyiya.’ Lo mbeya dia Jehowa ekɔ kaamɛ la nde, Mɔsɛ akɔshi wadɛnde ndo anande ko wakakalola l’Edjibito.

Ase Isariyɛlɛ, wakatshutshuyamaka dia nkamba elimu wa wolo oko mfumbe. Jehowa akatome Mɔsɛ la Arɔna le Farawɔ dia towotɛ ɔnɛ: ‘Tshika anto ami watshu kele watɔntɛmɔlɛ l’oswe.’ Farawɔ akakadimola l’otako tshɛ ate: ‘Dimi halodje yimba lo kɛnɛ kata Jehowa ndo hatokimɔ ase Isariyɛlɛ dia vɔ ntshɔ.’ Oma laasɔ, Farawɔ akaatshutshuya dia vɔ nyomoleka nkamba elimu wa wolo. Jehowa akahombe mbisha Farawɔ wetshelo. Onde wɛ mbeyaka lo ngande? Nde akela asui dikumi l’Edjibito. Jehowa akatɛ Mɔsɛ ate: ‘Farawɔ halange kitanyiyami. La pindju, nde ayonga l’ɔkɛdi wa Nilɛ. Kotshu le nde ndo kotowote dia l’ɔtɛ wahandalange nkimɔ anto ami, ashi tshɛ wa Nilɛ wayokadimɔ dikila.’ Mɔsɛ akakitanyiya ndo akatshu le Farawɔ. Farawɔ akendaka etena kakakɔmɔla Arɔna ashi wa Nilɛ la danga diande ndo ashi wakakadimɔ dikila. Ashi wakatatɛ mbipɔ nsolo, nse yakavu ndo ashi w’amɛna wa nnɔ kotanema nto lo Nilɛ. Farawɔ akatetemala ntona diaha ase Isariyɛlɛ ntshɔ.

Nshi esambele l’ɔkɔngɔ, Jehowa akatome Mɔsɛ le Farawɔ dia towotɛ ɔnɛ: ‘Naka wɛ hakimɔ anto ami, Edjibito ayolola l’ɛkɔlɛ.’ Arɔna akedia danga diande ko ɛkɔlɛ wakatatɛ ndolanɛ lo wodja. Anto wakatane ɛkɔlɛ lo mvudu yawɔ, lo mbeto yawɔ ndo lo alɔnga la mpoke yawɔ. Ɛkɔlɛ wakikɔ ahole tshɛ! Farawɔ akatɛ Mɔsɛ dia nde nɔmba Jehowa dia nde nkomiya sui sɔ. Farawɔ akalake dia nde ayokimɔ ase Isariyɛlɛ dia vɔ ntshɔ. Ɔnkɔnɛ, Jehowa akemadia sui sɔ ndo ase Edjibito wakatshumanya ɛkɔlɛ wambovɔ elui elui. Wodja wakatatɛ mbipɔ nsolo. Koko, mbala kɛnɛ nto Farawɔ akatone dia anto ntshɔ.

Ko Jehowa akatɛ Mɔsɛ ate: ‘Arɔna pombaka kɔmɔla danga diande lo nkɛtɛ ko ditshu diayokadimɔ mɛmbɛlɛ kana totshingotshingo talumatana.’ Mbala kakɔ ɔtɔi mɛmbɛlɛ yaki l’ahole tshɛ. Anto waki Farawɔ amɔtshi wakawotɛ vate: ‘Sui nɛ ndja oma le Nzambi.’ Koko, Farawɔ akatetemala ntona nkimɔ ase Isariyɛlɛ.