Mɔsɛ la Arɔna wakatshu dia totɛ Farawɔ losango l’oma le Nzambi ɔnɛ: ‘Naka wɛ halange ntondja anto ami, dimi layotoma ntshingo lo wodja.’ Elui wa ntshingo wakɔtɔ lo mvudu y’ase Edjibito oyadi le akanga w’ɛngɔnyi kana le ase wola. Wodja w’otondo wakalole la ntshingo. Koko, lo nkɛtɛ ya Ngɔshɛnɛ lɛnɛ akadjasɛka ase Isariyɛlɛ, ndooko lotshingo laki lɛkɔ. Ntatɛ oma lo sui dia nɛi sɔ, asui waki paka le ase Edjibito. Farawɔ akalɔmbɛ ate: ‘Sɛngasɛnga Jehowa dia nde tonyɛ ntshingo. Anto ayɛ kokaka ntshɔ.’ Koko, lam’akanya Jehowa ntshingo, Farawɔ akatshikitanya kanyi yande. Onde Farawɔ akakondja wetshelo ɔmɔtshi?

Jehowa akate ate: ‘Naka Farawɔ hetawe dia anto ami ntshɔ, dongalonga di’ase Edjibito diayotata ndo diayovɔ.’ L’ɔkɔngɔ wa lushi lɔsɔ, dongalonga diakatatɛ mvɔ. Koko dongalonga di’ase Isariyɛlɛ kovɔka. Farawɔ akatetemala nkeketsha otema ndo nde kombakimɔ.

Oma laasɔ, Jehowa akatɛ Mɔsɛ dia nde nkalola le Farawɔ ndo dia nde tokɛ otoko l’olongo. Otoko wakakadimɔ ditshu ndo ditshu diakafumbɔ lo lɔpɛpɛ ndo diakakokanɛ le ase Edjibito tshɛ. Ditshu sɔ diakakadimɔ atshutshu wakɛnyaka ase Edjibito la dongalonga diawɔ paa efula. Kaanga mbakidiɔ ngasɔ, Farawɔ akatone dia ase Isariyɛlɛ ntshɔ.

Jehowa akatome Mɔsɛ otsha le Farawɔ dia towotɛ losango Lande ɔnɛ: ‘Onde wɛ ekɔ lo ntetemala ntona dia ntondja anto ami? Loyi, mvula ka mbɔkɔ kayɔlɔ lo wodja.’ L’ɔkɔngɔ wa lushi lɔsɔ, Jehowa akatome mvula ka mbɔkɔ, ndjadi ndo dja. Ɔsɔ aki mvula ka kɔlɔ efula kele katalɔka l’Edjibito. Esongo ndo tombatomba tshɛ diakalana onyake lo nkɛtɛ ya Ngɔshɛnɛ. Farawɔ akate ate: ‘Lam’alangayɛ, lɔmba Jehowa dia nde nshidiya sui nɛ kele kanyutshu!’ Koko etena kakashile mbɔkɔ ndo kakahembɔ mvula, Farawɔ akatshikitanya kanyi yande.

Oma laasɔ, Mɔsɛ akate ate: ‘Akata w’ɛndjɔ wayɔlɛ diononɛ diakatshikala diele kondanyema la mvula ka mbɔkɔ.’ Miliyɔ ya akata w’ɛndjɔ yakale diangɔ tshɛ diakatshikala l’okonda ndo diangɔ dia l’esongo. Farawɔ akasɛngasɛnga ate: ‘Lam’alangayɛ, lɔmba Jehowa dia nde tonyɛ akata w’ɛndjɔ anɛ.’ Koko, kaanga l’ɔkɔngɔ wa Jehowa minya akata w’ɛndjɔ, Farawɔ akatetemala nkeketsha otema.

Jehowa akatɛ Mɔsɛ ate: ‘Edia lonya layɛ otsha l’olongo.’ Mbala kakɔ ɔtɔi, olongo wakakadimɔ odima tshududu. Ase Edjibito kokoka mɛna oyadi ɛngɔ kana onto l’edja ka nshi shato. Koko, osase wakikɔ lo mvudu y’ase Isariyɛlɛ.

Farawɔ akatɛ Mɔsɛ ate: ‘Wɛ kokaka ntshɔ wɛ la anto ayɛ. Nyu pombaka tatshiki dongalonga dianyu lanɛ.’ Mɔsɛ akate ate: ‘Sho pombaka ntshɔ la dongalonga diaso dia sho todilambola Nzambi kaso.’ Farawɔ akomala efula. Nde akahangɔhangɔ ate: ‘Omɔ oma la lemi! Naka dimi kɛna nto, layokodiaka.’

Mɔsɛ ambolaka Farawɔ dia nde hatohemba mɛnana la nde nto. Koko, la ntondo ka nde ntshɔ, nde ambotɛ Farawɔ ate: ‘Oya lo midi k’otsho, ɔna l’enondo tshɛ la l’Edjibito, ntatɛ oma le ɔna l’enondo laki Farawɔ polo le ɔna l’enondo laki mfumbe ayovɔ.’

Jehowa akatɛ ase Isariyɛlɛ dia vɔ nsala dambo dia laande. Nde akate ate: ‘Kanyodiake ɔna mbudi kana ɔna ɔkɔkɔ lele l’ɔnɔnyi ɔtɔi ndo kanyokite yema ya dikila dia tɔ lo dikundji dia lo soko dianyu. Kanyofumbe nyama ndo kanyokile kaamɛ la mapa waha la wodoya. Kanyɔlɔtɛ ahɔndɔ, la sabata l’ekolo nyele suke monɛɛ. L’otsho ɔnɛ, mbayomonyotshungola.’ Onde wɛ kokaka kanyiya ɔngɛnɔngɛnɔ wakakoke monga l’ase Isariyɛlɛ?

La midi k’otsho, Jehowa akatome ondjelo lo mvudu ya l’Edjibito tshɛ. Lo luudu tshɛ laki komonga la dikila lo dikundji dia soko, ɔna l’enondo laki lɛkɔ akadiakema. Koko, ondjelo akatatambaka mvudu yakawakite dikila. Nkumbo tshɛ ya l’Edjibito, mbidja ndo nkumbo y’ase ɛngɔnyi ndo ase wola wakavusha ɔna. Koko ndooko ɔna ɔtɔi l’ose Isariyɛlɛ lakavu.

Oyadi kaanga ɔnaki Farawɔ akadiakema. Farawɔ kokoka nkeketsha otema nto. Aha la ntshimbatshimba, nde akatɛ Mɔsɛ la Arɔna ate: ‘Nyonee. Nyotombe oma lanɛ. Nyotshu ndo nyotɔtɛmɔlɛ Nzambi kanyu. Nyotshu ndo la dongalonga dianyu!’

Lam’akayala ngɔndɔ emuma, ase Isariyɛlɛ wakamɔ oma l’Edjibito wokongɛmi lo ndjela nkumbo ndo waoho. Aki apami 600 000 mbidja ndo wamato la ana efula. Ndo nto, anto efula wakatshu kaamɛ la wɔ dia vɔ tɔtɛmɔla ndo vɔ lawɔ Jehowa. Ase Isariyɛlɛ wakatshungɔ lo pondjo!

Dia mbohɔ woho wakaatshungola Jehowa, vɔ wakahombaka salaka dambo dia laande diamɛ ɔnɔnyi tshɛ. Diɔ diakelamɛka Elekanelo.