Jehowa akatɛ Mɔsɛ ate: ‘Dɛ oya le mi lo dikona. Dimi layofunda ɛlɛmbɛ ami lo pase di’ave ko layokoshadiɔ.’ Mɔsɛ akadɛ lo dikona ndo akatotshikala lɛkɔ nshi 40 ndo etsho 40. Etena kakinde lɛkɔ, Jehowa akafunde Ɛlɛmbɛ Dikumi lo pase di’ave pende ko akasha Mɔsɛ pase diakɔ di’ave.

L’ɔkɔngɔ wa tshanda mɔtshi, ase Isariyɛlɛ wakɔshi dia Mɔsɛ ambatshika. Vɔ wakatɛ Arɔna vate: ‘Tekɔ l’ohomba w’onto latɔlɔmbɔla. Otosale jambizambi!’ Arɔna akate ate: ‘Nyombisha paonyi yanyu.’ Nde akalɛlɔla paonyi ko akasale lohingu la yana ya ngɔmbɛ. Anto wakate vate: ‘Yana ya ngɔmbɛ nyɛ mbele Nzambi kaso kakatotondja oma l’Edjibito!’ Vɔ wakatatɛ ntɛmɔla ekishi ka lohingu la yana ya ngɔmbɛ ya paonyi ndo wakasale fɛtɛ. Onde dui sɔ diaki kɔlɔ? Eelo, nɛ dia anto asɔ wakalake dia ntɛmɔla paka Jehowa ndamɛ oto. Koko kakianɛ, vɔ hawokitanyiyisha daka diawɔ.

Jehowa akɛnyi kɛnɛ kakatombe ndo akatɛ Mɔsɛ ate: ‘Holɔ otsha le anto. Vɔ waya l’ohindodi oya le mi ndo wɔtɛmɔla jambizambi ya kashi.’ Mɔsɛ akaholɔ oma lo dikona ele la pase pende di’ave.

Etena kakandasukana la mpango, Mɔsɛ akoke anto wemba. Oma laasɔ, nde akawaɛnyi wa nnɔ lokombe ndo wakusamɛ lohingu la yana ya ngɔmbɛ. Mɔsɛ akomala efula. Nde akakasha pase pende lo nkɛtɛ ko diɔ diakaatatɛ. Mbala kakɔ ɔtɔi nde akalanya lohingu lɔsɔ. Ko nde akambola Arɔna ate: ‘Ngande wakaketawoyisha anto anɛ dia nsala dui dia kɔlɔ nɛ?’ Arɔna akate ate: ‘Tomomalɛke. Wɛ mbeyaka woho wele anto anɛ. Vɔ wakalange monga la jambizambi, diakɔ diakamokɛ paonyi yawɔ lo dja ndo mbakamasale lohingu la yana ya ngɔmbɛ lɔnɛ!’ Arɔna takandahombe nsala dui sɔ. Mɔsɛ akadɛ nto lo dikona ndo akatɔsɛngasɛnga Jehowa dia dimanyiya anto.

Jehowa akadimanyiya wanɛ waketawɔ dia mbokitanyiya. Onde wɛ mɛnaka woho wele aki dimɛna dia ase Isariyɛlɛ ndjela ɛlɔmbwɛlɔ ka Mɔsɛ?

Etena kaki Mɔsɛ lo Dikona dia Sinayi, Jehowa akawotɛ dia mbika luudu la dipɛma la laande lelamɛ tabɛrnaklɛ, lɛnɛ akakokaka ase Isariyɛlɛ Mbɔtɛmɔla. Vɔ wakahombaka tɛmbaka tabɛrnaklɛ kakɔ etena kakawatononɔka.

Jehowa akate ate: ‘Tɛ ase Isariyɛlɛ dia vɔ nkimɔ kɛnɛ kakokawɔ nkimɔ dia mbika tabɛrnaklɛ.’ Ase Isariyɛlɛ wakakimɔ paonyi, mfɛsa, nkonga, mbɔkɔ y’oshinga wolo ndo dɛngalɛnga dikina. Vɔ wakakimɔ nto eshinga wosalemi la wɛɔsa, linɛnɛ, dikoho dia nyama ndo diangɔ dikina efula. Vɔ waki la lokaho efula diakɔ diele Mɔsɛ akawatɛ ɔnɛ: ‘Ambokoka! Tanyokimɔke nto.’

Apami la wamato efula waki la diewo wakasha lonya lo mbika tabɛrnaklɛ. Jehowa akawasha lomba la vɔ nsala olimu ɔsɔ. Amɔtshi wakɛlaka eshinga, wakakakatanyaka ahɔndɔ ndo wakawadje asango asango. Akina wakaataka ave, wakakambaka la paonyi kana wakaataka abaya.

Ase Isariyɛlɛ wakake tabɛrnaklɛ paka oko wakawatɛ Jehowa. Vɔ wakasale dihɔndɔ dia dimɛna efula di’okombɔ dia nkakitola tabɛrnaklɛ lo tenyi pende, Dihole di’Ekila la Dihole dioleki Ekila. Ɔshɛtɛ wa sheke wakasalema l’abaya w’osongo wa akasia ndo la paonyi waki lo Dihole dioleki Ekila. Ekundji ka tala, mɛsa ndo elambwelo ka tshumbaka tshɔ mbaki lo Dihole di’Ekila. Dɔnga dia woke dia nkonga ndo elambwelo ka woke mbaki l’etei ka lokombo. Ɔshɛtɛ wa sheke wakoholaka ase Isariyɛlɛ daka diakawalake dia mongaka l’okitanyiya le Jehowa. Onde wɛ mbeyaka sheke yatɛkɛtama lanɛ? Ɔsɔ ekɔ daka dimɔtshi dia laande.

Jehowa akasɔnɛ Arɔna la anande dia vɔ kambaka lo tabɛrnaklɛ oko ɛlɔmbɛdi. Vɔ wakahombe kikokɛka ndo nambolaka Jehowa elambo lɔkɔ. Paka Arɔna, ɔlɔmbɛdi a laadiko mbaketawɔmaka dia mbɔtɔ lo Dihole dioleki Ekila. Nde akasalaka dui sɔ mbala ɔtɔi lo ɔnɔnyi dia tokimɔ olambo dikambo dia pɛkato yande, pɛkato ya nkumbo kande ndo pɛkato ya wodja w’otondo w’Isariyɛlɛ.

Ase Isariyɛlɛ wakashidiya mbika tabɛrnaklɛ ɔnɔnyi ɔtɔi l’ɔkɔngɔ wa vɔ ntomba oma l’Edjibito. Kakianɛ vɔ waya la dihole dia tɛmɔlaka Jehowa.

Jehowa akalodia tabɛrnaklɛ la lotombo lande ndo akasale dia dinge mɛnamaka laadiko dia tɔ. Lo edja tshɛ kakatshikalaka dinge laadiko dia tabɛrnaklɛ, ase Isariyɛlɛ wakatshikalaka lo dihole diakiwɔ. Koko etena kakamɔka dinge, vɔ wakeyaka dia etena ka vɔ monɛ kambokoka. Vɔ wakakongolaka tabɛrnaklɛ ko ndjela dinge.