Ase Isariyɛlɛ wakamɔ oma lo Dikona dia Sinayi ndo wakande lɔkɛndɔ otsha l’oswe wa Parana lo dihole diakawelɛka Kadɛshɛ. Lɛkɔ, Jehowa akatɛ Mɔsɛ ate: ‘Toma apami 12, pami ɔtɔi oma lo dioho tshɛ dia vɔ tokembola Kanana, nkɛtɛ yayangami mbisha ase Isariyɛlɛ.’ Ko Mɔsɛ akasɔnɛ apami 12 ndo akawatɛ ate: ‘Nyotshu lo Kanana kele nyotende nkɛtɛ yakɔ kana yekɔ ɛtɛtɔ. Nyotende kana anto wele lɛkɔ wekɔ anto wa lokalo kana ɛhɔdu ndo nyotende kana vɔ wekɔ lo mbidjasɛ lo mvudu y’apɛma kana l’esomba.’ Atɔpi 12 mbidja ndo Jashua la Kalɛba wakatshu otsha la Kanana.

L’ɔkɔngɔ wa nshi 40, atɔpi wakakalola wayɛmbɛ elowa wa fingo, wa pɔmɛgranatɛ ndo nsandji di’elowa ekina. Atɔpi wakate vate: ‘Ekɔ wodja wa dimɛna, koko anto wa lɛkɔ wekɔ anto wele la lokalo efula ndo esomba awɔ wekɔ la mpele di’etale.’ Ko Kalɛba akate ate: ‘Sho koka mbalɛndja. Nyoyete totshu!’ Onde wɛ mbeyaka lande na kakate Kalɛba ngasɔ? Nɛ dia nde la Jashua wakayaɛkɛka le Jehowa. Koko atɔpi akina wakate vate: ‘Keema! Anto wa lɛkɔ wekɔ weke oko akongote! Lam’akiso suke la wɔ sho takɛnamaka oko akata.’

Ase Isariyɛlɛ wakakɔmɔ. Vɔ wakatatɛ kiyana ndo wakatanɛ lam’asawɔ ɔnɛ: ‘Nyɛsɔ tɔsɔnɛ ɔnɔmbɔdi okina kele tokalole l’Edjibito. Lande na kahombaso ntshɔ lo dihole sɔ ndo todiakema?’ Jashua la Kalɛba wakate vate: ‘Tanyongake l’ohindodi otsha le Jehowa ndo tanyokake wɔma. Jehowa ayotokokɛ.’ Koko ase Isariyɛlɛ kombahokamɛ. Vɔ wakakome polo lo nyanga dia ndjaka Jashua la Kalɛba!

Kakɔna kakasale Jehowa? Nde akatɛ Mɔsɛ ate: ‘Ase Isariyɛlɛ wakatetemala pindolɛmi l’ɔkɔngɔ wa kɛnɛ tshɛ kamomosala lo dikambo diawɔ. Ɔnkɔnɛ, vɔ wayotshikala l’oswe wa shɛnga ɛnɔnyi 40 ndo wayovɔ lɛkɔ. Paka anawɔ la Jashua la Kalɛba mbayotɔsɛna lo nkɛtɛ yakamalake dia mbasha.’

Etena kɛmɔtshi l’ɔkɔngɔ, lam’aki ase Isariyɛlɛ l’oswe wa shɛnga, Kɔra, Datana, Abirama ndo anto akina 250 wakatɔmbɔkwɛ Mɔsɛ. Vɔ wakawotɛ vate: ‘Tambohekɔ dikambo diayɛ! Lande na kahombayɛ monga ɔnɔmbɔdi aso ndo Arɔna ɔlɔmbɛdi a laadiko? Jehowa ekɔ kaamɛ la so sho tshɛ, koko aha paka wɛ la Arɔna ato.’ Jehowa kɔngɛnangɛna dui sɔ. Nde akadiɔshi oko nde mbatɔmbɔkwɛwɔ!

Mɔsɛ akatɛ Kɔra la wanɛ wakosukɛka ate: ‘Kanyoye loyi lo tabɛrnaklɛ ndo kanyoye la diangɔ dianyu diatonyɛmbaka dja la tshɔ lɔkɔ. Jehowa ayotɛnya ɔnɛ lamondɔsɔna.’

La wedi a pindju, Kɔra nde la apami 250 wakatshu dia tohomana la Mɔsɛ lo tabɛrnaklɛ. Lɛkɔ, vɔ wakatotshumba tshɔ wate kana vɔ waki ɛlɔmbɛdi. Jehowa akatɛ Mɔsɛ la Arɔna ate: ‘Nyokakitɔne la Kɔra la anto ande.’

Kaanga mbakatshu Kɔra le Mɔsɛ lo tabɛrnaklɛ, Datana, Abirama ndo nkumbo yawɔ wakatone ntshɔ. Jehowa akatɛ ase Isariyɛlɛ dia vɔ mangana la mvudu y’apɛma ya Kɔra, Datana ndo Abirama. Mbala kakɔ ɔtɔi, ase Isariyɛlɛ wakamɔ. Datana, Abirama ndo nkumbo yawɔ wakemala l’andja wa mvudu yawɔ y’apɛma. Mbala kakɔ ɔtɔi, nkɛtɛ yakatɛ l’ahende ndo yakaamɛnɛ! Lo tabɛrnaklɛ, dja yakaholɔ ko yakatshumbe Kɔra la anto ande 250.

Oma laasɔ, Jehowa akatɛ Mɔsɛ ate: ‘Ɔsa danga oma le owandji wa dioho tshɛ ndo funda lokombo lande lɔkɔ. Koko lo danga dia dioho dia Lɛwi, kofunde lokombo la Arɔna. Kowakitsha l’etei ka tabɛrnaklɛ ko danga dia pami kamomɔsɔna diayotomba alɛmbɔlɛmbɔ.’

La wedi a pindju, Mɔsɛ akatondja alanga tshɛ ko akawaɛnya ewandji wa waoho. Danga dia Arɔna diakatombe alɛmbɔlɛmbɔ ndo diakatɔ elowa w’amandɛ. Lo yoho shɔ mbakashikikɛ Jehowa dia nde akakasɔnɛ Arɔna oko ɔlɔmbɛdi a laadiko.