Etena kakatshu atɔpi w’ase Isariyɛlɛ l’osomba wa Jeriko, vɔ wakatɔtɔka lo luudu laki womoto ɔmɔtshi lakawelɛka Rahaba. Nkumekanga ka Jeriko akeye ndo akatome asɔlayi lo luudu la Rahaba. Nde akashɛ atɔpi asɔ ahende lo nsambe ka luudu ndo akatɛ asɔlayi dia vɔ tayanga lo dihole dikina. Nde akatɛ atɔpi ate: ‘Dimi layonyokimanyiya nɛ dia dimi mbeyaka dia Jehowa ekɔ l’atei anyu ndo ɔnɛ nyayanga mbɔsa wodja. Lam’alanganyu nyondake dia nyayoshimbɛ dimi la nkumbo kami.’

Atɔpi wakatɛ Rahaba vate: ‘Tambokolaka dia ndooko onto layonga lo luudu layɛ layosalemɛ kɔlɔ.’ Vɔ wakate vate: ‘Keleka oshinga wa beela lo didishi diayɛ ko nkumbo kayɛ kayoshimbamɛ.’

Rahaba akaholoya atɔpi l’ɔkɔdi oma lo didishi. Vɔ wakatshu l’akona ko wakatoyashɛ nshi shato la ntondo ka nkalola le Jashua. Oma laasɔ, ase Isariyɛlɛ wakatehɔ Ɔkɛdi wa Jɔrdana ndo wakayalɔngɔsɔla dia mbɔsa wodja. Jeriko mbaki osomba wa ntondo wakawalɛndja. Jehowa akawatɛ dia vɔ ntshimba osomba mbala ɔtɔi lushi tshɛ l’edja ka nshi shamalo. Lushi l’esambele, vɔ wakatshimbe osomba mbala esambele. Oma laasɔ, ɛlɔmbɛdi wakade amama ndo asɔlayi wakade ekoko la wolo awɔ tshɛ. Mpele di’osomba diakanyukɔ! Koko, luudu laki Rahaba laki l’ehele k’osomba konyukɔ. Rahaba la nkumbo kande wakashimbamɛ nɛ dia nde akayaɛkɛ le Jehowa.

Losango lendana la Jeriko lakadiangana lo wedja ekina wa la Kanana. Nkumi ya dikanga yawɔ wakɔshi yɛdikɔ ya nsangana kaamɛ dia ndɔsha Isariyɛlɛ. Koko ase Ngibiyɔna wakɔshi yɛdikɔ yotshikitanyi. Vɔ wakalɔtɛ ahɔndɔ w’emusu ndo wakatshu otsha le Jashua ndo wakatowotɛ ɔnɛ: ‘Sho oma lo wodja w’etale. Takoke nkumu yendana la Jehowa ndo kɛnɛ kakandanyosalɛ l’Edjibito ndo la Mɔaba. Ototshike dɔkɔlɔkɔ diaha tɔlɔsha ko sho tayonga ekambi ayɛ.’

Jashua aketawɔ kɛnɛ kakawawotɛ ndo akɔshi yɛdikɔ yaha mbalɔsha. Nshi shato l’ɔkɔngɔ, nde akayeyaka dia vɔ kondja oma lo wodja w’etale. Vɔ waki paka oma lo nkɛtɛ ya Kanana. Jashua akambola ase Ngibiyɔna ate: ‘Lande na kakanyatokese?’ Vɔ wakokadimola ɔnɛ: ‘Sho taki la wɔma! Sho mbeyaka dia Jehowa Nzambi kayɛ ekɔ lo kɔlwɛlwɛ ata. Lam’alangayɛ totodiakake.’ Jashua akalɛnya dɔkɔlɔkɔ diande ndo akaatshike la lɔsɛnɔ.

Oshimu kele edja, nkumi ya dikanga tshanu y’ase Kanana la asɔlayi awɔ wakaanɛɛ ase Ngibiyɔna. Jashua la asɔlayi ande wakakɛndakɛnda otsho w’otondo dia towakimanyiya. Ta diakatatɛ la wedi a pindju la yosose. Ase Kanana wakatatɛ ndawɔ lo bɛkɛ tshɛ. Lo bɛkɛ tshɛ diakawatalawɔka, Jehowa akaakɔshiyɛka ave wa weke wa mvula ya mbɔkɔ. Ko Jashua akalɔmbɛ Jehowa dia wonya memala. Lande na kakandalɔmbɛ Jehowa dia nsala dui sɔ etena kele ndooko lushi lakemala wonya? Nɛ dia Jashua akayaɛkɛka le Jehowa. Wonya wakemala lushi l’otondo polo ndo lo ase Isariyɛlɛ wambɔlɛndja nkumi ya dikanga y’ase Kanana la asɔlayi awɔ.