L’ɔkɔngɔ wa nde nɔmbɔla ekambi waki Jehowa l’edja k’ɛnɔnyi efula, Jashua akavu ele l’ɛnɔnyi 110. L’edja tshɛ kakinde la lɔsɛnɔ, ase Isariyɛlɛ wakatɛmɔlaka Jehowa. Koko l’ɔkɔngɔ wa nyɔi ka Jashua, vɔ wakatatɛ ntɛmɔla dikishi oko wakasalaka ase Kanana. Lam’ele ase Isariyɛlɛ kotetemala la mboyela, Jehowa aketawɔ dia Jabinɛ nkumekanga kɛmɔtshi k’ase Kanana mpɛnyahɛnya ase Isariyɛlɛ wolo. Anto wakalɔmbɛ Jehowa dia mbakimanyiya. Ɔnkɔnɛ, Jehowa akawasha ɔnɔmbɔdi w’oyoyo, mbuta ate Baraka. Nde akahombe nkimanyiya anto dia vɔ nkalolɛ Jehowa.

Dɛbɔra, omvutshi wa womoto, akatomama le Baraka. Nde aki la losango lande lɔnɛ l’oma le Jehowa: ‘Ɔsa apami 10 000, kele tohomane l’asɔlayi waki Jabinɛ l’ashi wa Kishɔna. Lɛkɔ wɛ ayotɔlɛndja Sisɛra, owandji w’asɔlayi wa Jabinɛ.’ Baraka akatɛ Dɛbɔra ate: ‘Dimi layotshɔ paka naka wɛ ambetawɔ dia ntshɔ la mi.’ Nde akate ate: ‘Dimi layotshɔ la yɛ. Koko eya dia aha wɛ mbayodiaka Sisɛra. Jehowa akate dia womoto mbayowodiaka.’

Dɛbɔra akatshu nde la Baraka ndo la asɔlayi ande lo Dikona dia Tabɔra dia toyalɔngɔsɔla dia ndɔ ta. Kam’akoke Sisɛra dui sɔ, nde akatshumanya pusupusu yande ya ta ndo asɔlayi ande l’okidi waki l’ɛse. Dɛbɔra akatɛ Baraka ate: ‘Ɛlɔ ekɔ lushi layokokimanyiya Jehowa dia mbidja otshumba.’ Baraka la anto ande 10 000 wakaholɔ dia tɔlɔ la asɔlayi wa wolo efula waki Sisɛra.

Jehowa akasale dia elola monga lo ashi wa Kishɔna. Pusupusu ya ta yaki Sisɛra yakadinde lo lɔtɛkɛ. Sisɛra akaholɔ oma lo pusupusu kande ko akatatɛ ndawɔ. Baraka nde l’asɔlayi ande wakalɛndja asɔlayi waki Sisɛra, koko Sisɛra akalawɔ! Nde akalawɔ ndo akatoyashɛ lo luudu la dipɛma la womoto ɔmɔtshi lakawelɛka Jaɛlɛ. Jaɛlɛ akawosha abɛlɛ dia nde nnɔ ndo oma laasɔ akawofɛ olangitshi. Ɔndɔshi wa ta wakalɛmbɛ ɔsɔ akalale djɔ. Ko Jaɛlɛ akasɛmɛ otsha le nde ɔkɔkɛ ko akawoke wokɔ l’ɔtɛ ko nde akavu.

Baraka akayayangaka Sisɛra. Jaɛlɛ akatombe oma lo luudu lande la dipɛma ndo akate ate: ‘Ɔtɔ l’etei. Dimi layokɛnya pami katayayange.’ Baraka akɔtɔ l’etei ndo akɛnyi odo wa Sisɛra wokalemi. Baraka la Dɛbɔra wakatombola Jehowa lo mbeembɛ osambo lo woho wakandakimanyiya ase Isariyɛlɛ dia mbidja atunyi awɔ otshumba. Isariyɛlɛ akasɛnɛ lo wɔladi l’edja k’ɛnɔnyi 40.

Lam’aki ndjala ka kasha lo Isariyɛlɛ, Naɔmi ose Isariyɛlɛ ɔmɔtshi akatshu otsha lo nkɛtɛ ya Mɔaba nde la omɛnde la anawɔ ahende w’apami. L’ɔkɔngɔ diko omɛki Naɔmi akavu. Anande wakatshuke Ruta la Ɔrɔpa, ana wa wamato w’ase Mɔaba. Lonyangu ko, l’edjedja ka wonya, ana waki Naɔmi wakayovɔka.

Lam’akoke Naɔmi dia ndjala ka kasha kamboshila l’Isariyɛlɛ, nde akɔshi yɛdikɔ ya nkalola lakawɔ. Ruta la Ɔrɔpa wakatshu kaamɛ la nde, koko lo mboka, Naɔmi akawatɛ ate: ‘Nyu nyaki wadi w’eshika le ana ami ndo nyaki wadi wa anami w’eshika le mi. Dimi nangaka dia nyu akɔ ahende tshukama nto. Nyokalole la Mɔaba.’ Vɔ wakawotɛ vate: ‘Sho kookaka ngandji! Sho hatolange kakitɔna la yɛ.’ Naɔmi akatetemala mbatɛ dia vɔ nkalola. L’ekomelo, Ɔrɔpa akayokalola koko Ruta akatshikala. Naɔmi akawotɛ ate: ‘Ɔrɔpa ambokalola otsha le anto ande ndo otsha le tozambizambi tande. Kalola kaamɛ lande ndo tshɔka otsha la kanyu.’ Koko Ruta akate ate: ‘Dimi hatokotshika. Anto ayɛ wayoyala anto ami ndo Nzambi kayɛ ayoyala Nzambi kami.’ Afɔnyayɛ, ngande wakayaoke Naɔmi etena kakawotɛ Ruta ngasɔ?

Ruta nde la Naɔmi wakakome l’Isariyɛlɛ, l’etatelo ka dinela dia asami. Lushi lɔmɔtshi, Ruta akatshu dia tɔkɔdiakɔdia washa wakatshikalaka l’ekambɔ ka pami kɛmɔtshi kakawelɛka Bɔaza, laki ɔnaki Rahaba. Nde akoke dia Ruta aki ose Mɔaba lakatshikala nde la Naɔmi la kɔlamelo tshɛ. Nde akatɛ ase olimu ande dia tatshikaka washa amɔtshi l’ekambɔ dia Ruta kɔnɔlaka.

La dikɔlɔ sɔ, Naɔmi akambola Ruta ate: ‘L’ekambɔ kakina kakayatshwe ɛlɔ?’ Ruta akate ate: ‘Lo ekambɔ ka pami kɛmɔtshi kelɛwɔ Bɔaza.’ Naɔmi akawotɛ ate: ‘Bɔaza ekɔ owotɔ w’omɛmi ɔmɔtshi. Tetemala ntshɔ l’ekambɔ kande wɛ la esekaseka ekina. Ndooko layokosalɛ kɔlɔ l’ekambɔ kande.’

Ruta akatetemala tokamba l’ekambɔ ka Bɔaza polo lam’akashile dinela. Bɔaza akɛnyi dia Ruta akakambaka olimu la wolo ndo aki womoto l’oshika. Lo nshi shɔ, naka pami ambovɔ aha la mbota, owotɔ ande ɔmɔtshi akahombaka ntshuka wadi lotshikinde. Ɔnkɔnɛ, Bɔaza akatshuke Ruta. Vɔ wakote Ɔbɛdɛ, lakayongaka l’ɔkɔngɔ tshɛnde la nkumekanga Davidɛ. Angɛnyi wa Naɔmi waki l’ɔngɛnɔngɛnɔ efula. Vɔ wakate vate: ‘Ntondo, Jehowa akakosha Ruta, ɔnɛ laki onto lakakosalɛ ɔlɔlɔ efula ndo kakianɛ wɛ aya la okana. Jehowa atombɔme.’