L’edjedja ka wonya, ase Isariyɛlɛ wakayanganaka nto la Jehowa ndo wakatatɛ ntɛmɔla tozambizambi ta kashi. L’edja k’ɛnɔnyi esambele, ase Midiyana wakavaka dongalonga di’ase Isariyɛlɛ ndo wakalanyaka tombatomba diawɔ. Dia ndjakokɛ oma le ase Midiyana, ase Isariyɛlɛ wakayashɛka lo weoko w’ave ndo l’akona. Vɔ wakalɔmbɛ Jehowa dia nde mbashimbɛ. Ko Jehowa akatome ondjelo le ɔlɔngɔlɔngɔ wa pami wakawelɛka Ngidiyɔna. Ondjelo akate ate: ‘Jehowa ambokɔsɔna dia wɛ monga ɔndɔshi wa ta wa wolo.’ Ngidiyɔna akakadimola ate: ‘Ngande wakokami nshimbɛ ase Isariyɛlɛ? Dimi lekɔ onto l’anyanya.’

Ngande wakeye Ngidiyɔna dia Jehowa ambɔɔsɔna? Nde akakitshɛ wɛɔsa lo nkɛtɛ ndo akatɛ Jehowa ate: ‘La pindju, naka wɛɔsa wambɔlɔha la lɔpɔpɔ koko nkɛtɛ yele lawɔ monga ofumbo, mbayomeya dia wɛ nangaka dia dimi nshimbɛ Isariyɛlɛ.’ La wedi a pindju, wɛɔsa wakalɔhɛ tshɛ ndo nkɛtɛ yaki paka ofumbo oto! Ko Ngidiyɔna akalɔmbɛ dia la wedi a pindju okina, wɛɔsa eto monga womu, ko lɔpɔpɔ ndɔya nkɛtɛ yele laawɔ. Etena kakasalema dikambo sɔ, Ngidiyɔna akayoshikikɛka dia Jehowa akɔsɔnɛ. Nde akatshumanya asɔlayi ande dia ndɔshana l’ase Midiyana.

Jehowa akatɛ Ngidiyɔna ate: ‘Dimi layanga mbisha ana w’ase Isariyɛlɛ otshumba. Koko lam’ele wɛ ekɔ la asɔlayi efula, wɛ koka ndjɔfɔnya dia wɛ ambodja otshumba wɛmɛ. Tɛ onto tshɛ lele la wɔma dia nde nkalola otsha lakande.’ Ɔnkɔnɛ, asɔlayi 22 000 wakakalola ndo 10 000 wakatshikala. Ko Jehowa akate nto ate: ‘Asɔlayi weke paka efula. Tɔlawɔ otsha l’ɔkɛdi w’ashi ndo towate dia vɔ nnɔ ashi. Kɔshi paka wanɛ wanɔ ashi ndo l’etena kakɔ kaamɛ wenda atunyi.’ Paka apami 300 mbakɛwɛwaka etena kakawanɔka. Jehowa akalake dia la yema y’apami shɔ mbayondɔlɛndja asɔlayi 135 000 w’ase Midiyana.

L’otsho akɔ, Jehowa akatɛ Ngidiyɔna ate: ‘Etena ka wɛ ndɔsha ase Midiyana tɔ kɛnɛ!’ Ngidiyɔna akasha apami ande amama ndo mbaka ya weke ndo akashɛ ewa l’etei. Nde akawatɛ ate: ‘Nyomendake, ndo kanyosale paka kɛnɛ kasalami.’ Ngidiyɔna akade dimama diande, akole mbaka kande, aketshetsha owa ande ndo akate la dui dia wolo ate: ‘Lokuwa la ta laki Jehowa ndo laki Ngidiyɔna!’ Apami ande tshɛ 300 wakasale woho akɔ waamɛ. Ase Midiyana wakandama la wɔma ndo wakalawɔ oko waa nyama lo bɛkɛ tshɛ. Lo lofunge lɔsɔ, vɔ wakatatɛ ndɔshana lam’asawɔ. Mbala kɛsɔ nto, Jehowa akakimanyiya ase Isariyɛlɛ dia vɔ nɛndja atunyi awɔ.

Ose Isariyɛlɛ ɔmɔtshi lakawelɛka Elekana aki la wadi ahende, Hana la Penina koko nde akalekaka nanga Hana. Penina akɔlaka Hana tena tshɛ nɛ dia Hana aki ekomba koko Penina aki la ana efula. Ɔnɔnyi tshɛ, Elekana akatshɔka la nkumbo kande dia tɔtɛmɔla lo tabɛrnaklɛ la Shilo. Mbala kɛmɔtshi etena kakiwɔ lɛkɔ, nde akɛnyi dia Hana wadɛnde lakandalangaka aki la lonyangu efula. Nde akate ate: ‘Takolela, Hana. Dimi lekɔ kaamɛ la yɛ. Dimi kolangaka.’

L’ɔkɔngɔ diko, Hana akatshu ndamɛ dia tɔlɔmba. Nde akatetemalaka la ndela etena kakandasɛngasɛngaka Jehowa dia mbokimanyiya. Nde akalake ate: ‘Jehowa le, naka wɛ mbishami ɔna, dimi layokolambolande ndo nde ayokokambɛka lɔsɛnɔ lande l’otondo.’

Ɔlɔmbɛdi a laadiko Eli akɛnyi Hana asekuma la delo ndo nde akafɔnya dia Hana akadjwe wanu. Hana akakadimola ate: ‘Keema, nkumɛmi, dimi hanwɛ wanu. Dimi lekɔ l’okakatanu wa wolo ndo lekɔ lo mbutɛ Jehowa okakatanu akɔ.’ Eli akɛnyi dia nde akandjisha ndo akawotɛ ate: ‘Nzambi akosha kɛnɛ kalangayɛ.’ Hana akayaoke dimɛna ndo akakalola. La ntondo k’ɔnɔnyi nkoka, nde akote ɔna pami lakawɔlɛ Samuɛlɛ. Onde wɛ koka nkanyiya ɔngɛnɔngɛnɔ wakahombe monga la Hana?

Hana kombohɛ daka diakandalake Jehowa. Kam’akandakidja Samuɛlɛ diwɛlɛ, nde akɔtɔlɛ dia nde tokambɛ Jehowa lo tabɛrnaklɛ. Nde akatɛ Eli ate: ‘Ɔna ɔnɛ mbakamalɔmbaka dikambo diande. Dimi lambookimɔ le Jehowa dia nde mbokambɛ lɔsɛnɔ lande l’otondo.’ Elekana la Hana wakatshɔka tenda Samuɛlɛ ɔnɔnyi tshɛ ndo wakɔtɔlɛka okutu w’oyoyo waha l’anya. Jehowa akayoshaka Hana ana akina w’apami asato ndo ana wa wamato ahende.