-
Daka diaki JafɛtaWetshelo wakokayɛ nkondja oma lo Bible
-
-
WEKELO 36
Daka diaki Jafɛta
Ase Isariyɛlɛ wakoke nto Jehowa ɔkɔngɔ ndo wakatatɛ ntɛmɔla nto tozambizambi ta kashi. Etena kakalɔsha ase Amɔna ase Isariyɛlɛ, tozambizambi ta kashi tɔsɔ kosala ndooko dui dia mbakimanyiya. Ase Isariyɛlɛ wakadisowɛ l’edja k’ɛnɔnyi efula. L’ekomelo vɔ wakatɛ Jehowa ɔnɛ: ‘Sho tambosala pɛkato. Lam’alangayɛ otoshimbee oma le atunyi aso.’ Ase Isariyɛlɛ wakalanya dikishi diawɔ ndo wakayotatɛ ntɛmɔla Jehowa nto. Jehowa konanga mbaɛna watetemala nsowa.
Ɔndɔshi wa ta ɔmɔtshi wakawelɛka Jafɛta, akalɔmbɔla ase Isariyɛlɛ lo ta diakawalɔ l’ase Amɔna. Nde akatɛ Jehowa ate: ‘Naka wɛ tokimanyiya dia sho nɛndja lo ta nɛ, dimi lambolaka dia etena kayomokalola lakami, dimi layokosha onto la ntondo layotomba oma lo luudu lami dia ndjondjayola.’ Jehowa akahokamɛ dɔmbɛlɔ dia Jafɛta ndo akokimanyiya dia mbidja otshumba lo ta sɔ.
Etena kakakalola Jafɛta lakande, onto la ntondo lakatombe ndjooyayola aki ɔnande la womoto, tshɔi yande y’ɔna. Nde akayanɔka lokombe ayahome ngɔmɔ. Kakɔna kakahombe Jafɛta nsala? Nde akohɔ daka diande ndo akate ate: ‘Hayi, ɔnami! Wɛ ambombata asolo. Dimi lakalake Jehowa. Dia nkotsha daka sɔ, dimi pombaka kotoma dia wɛ tokamba lo tabɛrnaklɛ la Shilo.’ Koko ɔnande la womoto akawotɛ ate: ‘Ipa, naka wɛ akalake Jehowa wɛ pombaka nkotsha daka diayɛ. Kɛnɛ kakɔlɔmbami ele, dia dimi tetshisha ngɔndɔ hiende l’akona kaamɛ la asekami wa wamato. Oma laasɔ, layoyotshɔ.’ Ɔnaki Jafɛta la womoto akakambe la kɔlamelo tshɛ lo tabɛrnaklɛ lɔsɛnɔ lande l’otondo. Ɔnɔnyi tshɛ, angɛnyi ande wakatshɔka la Shilo dia towenda.
“Onto tshɛ loka ɔnande la pami kana la womoto ngandji koleki kɛnɛ kambokande hasungana le mi.”—Mateo 10:37
-
-
Jehowa ambɔtɛkɛta la SamuɛlɛWetshelo wakokayɛ nkondja oma lo Bible
-
-
WEKELO 37
Jehowa ambɔtɛkɛta la Samuɛlɛ
Ɔlɔmbɛdi a laadiko Eli aki la ana ahende w’apami wakakambaka oko ɛlɔmbɛdi lo tabɛrnaklɛ. Nkombo yawɔ aki Hɔfɛni la Finehasi. Vɔ kokitanyiyaka ɛlɛmbɛ wa Jehowa ndo wakasalɛka anto akambo wa kɔlɔ efula. Etena kakayaka ase Isariyɛlɛ l’elambo dia ndjolambola Jehowa, Hɔfɛni la Finehasi wakɔsaka emunyi wa nyama woleki dimɛna. Eli akoke awui wakasalaka anande, koko nde kosala ndooko dui. Onde Jehowa akahombe ntshika dia dui sɔ ntetemala?
Kaanga mbele Samuɛlɛ aki dikɛnda efula la ntondo ka Hɔfɛni la Finehasi, nde kombaokoya. Jehowa akangɛnangɛnaka Samuɛlɛ. L’otsho ɔmɔtshi etena kakinde lo djɔ, Samuɛlɛ akoke onto ɔmɔtshi awelɛ. Nde akemɔ, ko akalawɔ otsha le Eli ndo akatowotɛ ate: ‘Dimi ɔnɛ!’ Koko Eli akate ate: ‘Dimi hakele. Kalola toshame.’ Samuɛlɛ akakalola lo mbeto. Ko dui sɔ diakasalema nto. Etena kakoke Samuɛlɛ onto aweta mbala ka sato, Eli akashihodia dia ekɔ Jehowa mbelɛ Samuɛlɛ. Nde akatɛ Samuɛlɛ dia naka nde amboka onto awelɛ nto ko nde nkadimola ɔnɛ: ‘Jehowa tɛkɛta. Okambi ayɛ ekɔ lo kohokamɛ.’
Samuɛlɛ akakalola lo mbeto. Ko nde akoke onto aweta ɔnɛ: ‘Samuɛlɛ! Samuɛlɛ!’ Nde akakadimola ate: ‘Tɛkɛta, okambi ayɛ ekɔ lo kohokamɛ.’ Jehowa akawotɛ ate: ‘Tote Eli dia dimi layanga mbosha nde la nkumbo kande dilanya. Nde mbeyaka akambo wa kɔlɔ wasala anande lo tabɛrnaklɛ kami, koko nde hasale ndooko dikambo.’ La wedi a pindju, Samuɛlɛ akadihola nkuke ya tabɛrnaklɛ oko waki mbekelo kande. Nde akoke wɔma mbutɛ ɔlɔmbɛdi a laadiko kɛnɛ kakate Jehowa. Koko Eli akawelɛ ndo akawotɛ ate: ‘Ɔnami, kakɔna kakakote Jehowa? Ombute oseka dui tshɛ.’ Ko Samuɛlɛ akatɛ Eli oseka dui tshɛ.
Lam’akatolaka Samuɛlɛ, Jehowa akatetemala monga kaamɛ la nde. Oma lo koma mɔtshi ya wodja polo lo koma kina, ase Isariyɛlɛ tshɛ wakeyaka ɔnɛ Jehowa akasɔnɛ Samuɛlɛ dia nde monga omvutshi ndo shushi.
“Ɔnkɔnɛ, ohɔke Otungi ayɛ wa Woke lo nshi yayɛ y’ɔlɔngɔlɔngɔ.”—Ondaki 12:1
-