Jehowa akatɛ Samuɛlɛ ate: ‘Tshɔka laka Jɛse. Ɔnande ɔmɔtshi mbayonga nkumekanga k’oyoyo k’Isariyɛlɛ.’ Ko Samuɛlɛ akatshu laka Jɛse. Lam’akandɛnyi ɔnande l’enondo, nde akate ate: ‘Ɔnɛ mbele ɔlɔngɔ akɔ a pami.’ Koko Jehowa akatɛ Samuɛlɛ di’aha nde. Jehowa akate ate: ‘Dimi mɛnaka kɛnɛ kele l’etei k’otema w’onto koko aha tsho ɛnamelo ka l’andja.’

Jɛse akela anande akina asamalo le Samuɛlɛ. Koko Samuɛlɛ akate ate: ‘Jehowa hasɔnyi ndooko onto l’atei awɔ. Onde wɛ ekekɔ la ana akina?’ Jɛse akate ate: ‘Lekɔ la ɔna okina la kose, Davidɛ. Nde ekɔ lo nama ɛkɔkɔ ami.’ Lam’akaye Davidɛ, Jehowa akatɛ Samuɛlɛ ate: ‘Nde kamomɔsɔna!’ Samuɛlɛ akatɛ esɔ l’ɔtɛ wa Davidɛ lo mbɔsɔna oko onto layoyonga nkumekanga k’Isariyɛlɛ.

Etena kɛmɔtshi l’ɔkɔngɔ diko, ase Isariyɛlɛ wakatshu dia tɔlɔ l’ase Filistiya wanɛ waki la dikongote dimɔtshi di’ɔndɔshi wa ta diakawelɛka Ngɔliyatɛ lakaalwɛlɛka ata. Lushi la lushi, Ngɔliyatɛ akɔlaka ase Isariyɛlɛ. Nde akataka la dui dia wolo ate: ‘Nyotomee onto ɔmɔtshi dia ndjɔlɔ la mi. Naka nde nɛndjami, sho tayonga mfumbe yanyu. Ko naka dimi mbɔlɛndja, nyu nyayonga mfumbe yaso.’

Davidɛ akatshu lo mpango k’asɔlayi k’ase Isariyɛlɛ dia tɔlɛɛ anango waki asɔlayi mbo ya ndɛ. Nde akoke kɛnɛ kakataka Ngɔliyatɛ ndo akate ate: ‘Dimi layotɔlɔ la nde!’ Nkumekanga Saolo akate ate: ‘Wɛ eke dikɛnda efula.’ Davidɛ akakadimola ate: ‘Jehowa ayonkimanyiya.’

Saolo akayange dia mbisha Davidɛ dihomɔ diande dia ta koko Davidɛ akate ate: ‘Dimi hantɔlɔ la dihomɔ nɛ dia ta.’ Davidɛ akɔshi yoka ave yande ndo akatshu lo lushi lɔmɔtshi. Nde akasɔnɛ mbɔkɔ tshanu y’ɔsɛlɔ ko akayidje lo dibenga. Ko Davidɛ akalawɔ otsha le Ngɔliyatɛ. Dikongote sɔ akate la dui dia wolo ate: ‘Yaka lanɛ wɛ yana nyɛ. Layosha fudu ya l’olongo ndo nyama ya l’okonda odo ayɛ dia yɔ ndɛ.’ Davidɛ komboka wɔma. Nde akakaloya la dui dia wolo ate: ‘Wɛ amboya la lokuwa la ta ndo la dikɔnga, koko dimi lamboya lo lokombo la Jehowa. Aha sho mbalɔshayɛ; wɛ ekɔ lo ndɔsha Nzambi. Onto tshɛ lele lanɛ ayɛna dia Jehowa ekɔ la wolo ndeka lokuwa la ta kana dikɔnga. Nde ayonyokimɔ nyu tshɛ l’anya aso.’

Davidɛ akadje lɔwɔkɔ lo yoka ave yande ko akalioke la wolo ande tshɛ. Lo ekimanyielo ka Jehowa, lɔwɔkɔ lakatshu ndo lakatɔkɔmɔla Ngɔliyatɛ lo mfumu. Dikongote sɔ akakɔ ndo akavu. Ko ase Filistiya wakalawɔ dia nkokɛ nsɛnɔ yawɔ. Onde wɛ ndjaɛkɛka le Jehowa oko wakayaɛkɛ Davidɛ?

L’ɔkɔngɔ wa Davidɛ ndjaka Ngɔliyatɛ, nkumekanga Saolo akawodje owandji w’asɔlayi ande. Davidɛ akalɛndja ata efula ndo akayonyɛnyɛma efula. Mbala tshɛ kakakalolaka Davidɛ oma lo ta, wamato wakatombaka wayanɔ ndo wayembe ɔnɛ: ‘Saolo ambodiaka nunu, koko Davidɛ ambodiaka nunu akumi!’ Saolo akoke Davidɛ kandjema ndo akalange mbodiaka.

Davidɛ akahomaka lɔsɛsɛ dimɛna efula. Lushi lɔmɔtshi etena kakahomɛka Davidɛ Saolo lɔsɛsɛ, nkumekanga akawoke dikɔnga. Davidɛ akasanɔ ko dikɔnga diakatokama l’ehele. L’ɔkɔngɔ wa laasɔ, Saolo akayange mbala nkina efula dia ndjaka Davidɛ. L’ekomelo, Davidɛ akayolawɔka ndo akatoyashɛ l’oswe.

Saolo akɔshi asɔlayi 3 000 dia toyanga Davidɛ. Nde akatɔtɔ lo woko wa dive lɛnɛ akayashɛ Davidɛ l’anto ande. Anto wa Davidɛ wakawotɛ lo hiɔtɛhɔtɛ ɔnɛ: ‘Ɔnɛ ekɔ diɛsɛ diayɛ dia ndjaka Saolo.’ Davidɛ akasɛmɛ otsha le Saolo ko akatohembola yɛtshi y’okutu wa nkumekanga. Saolo kombeya dui sɔ. L’ɔkɔngɔ wa laasɔ, Davidɛ akayaoke kɔlɔ nɛ dia nde akɛnya dia nde bu la dilɛmiɛlɔ le nkumekanga kakasɔnama oma le Jehowa. Nde kombetawɔ dia asɔlayi ande ndɔsha Saolo. Nde akelɛ Saolo ndo akawotɛ la dui dia wolo dia nde akakoki mbodiaka etena kakandakondjisha diaaso. Onde Saolo akatshikitanya ekanelo kande ka yimba otsha le Davidɛ?

Ndooko. Saolo akatetemala nyanga Davidɛ. L’otsho ɔmɔtshi, Davidɛ nde la Abishai w’ɔna ɔnango wakakome lo mpango ka Saolo. Kaanga Abinɛrɛ, ɔnɛ lakalamaka Saolo akalale djɔ. Abishai akate ate: ‘Tambokondja diaaso! Ontshike mbodiake.’ Davidɛ akakadimola ate: ‘Jehowa ayendana la Saolo. Ɛsɔ tɔshi paka dikɔnga diande la mbidika kande k’ashi kele totshu.’

Davidɛ akadɛ lo shɔdi ya dikona diakɛlanɛ la mpango ka Saolo. Nde akate la dui dia wolo ate: ‘Abinɛrɛ, lande na keyɛ heye nkokɛ nkumekanga kayɛ? Lende ele mbidika ka Saolo la dikɔnga?’ Saolo akeye dui dia Davidɛ ndo akate ate: ‘Wɛ akakoki ndjakami, koko wɛ hasadi dui sɔ. Lambeya dia wɛ kayonga nkumekanga k’oyoyo k’Isariyɛlɛ.’ Saolo akakalola otsha lo luudu lande la nkumekanga. Koko aha ase nkumbo tshɛ ka Saolo mbakahetshaka Davidɛ.