Jɔnatana ɔna nkumekanga Saolo l’enondo aki ɔndɔshi wa ta waki la dihonga. Davidɛ akate dia Jɔnatana akalawɔka ndeka mpongo ndo aki la wolo ndeka ntambwɛ. Lushi lɔmɔtshi Jɔnatana akɛnyi asɔlayi 20 w’ase Filistiya l’okidi ɔmɔtshi. Nde akatɛ ɔmɛmbi ande wa dihomɔ dia ta ate: ‘Tayowalɔsha paka naka Jehowa ambotosha djembetelo mɔtshi. Naka ase Filistiya wambototɛ dia sho ntshɔ lewɔ, kete sho pombaka mbalɔsha.’ Ase Filistiya wakate la dui dia wolo vate: ‘Nyoye lendo toyɔlɔ!’ Ɔnkɔnɛ, apami ahende asɔ wakadɛ dia tɔlɔ la wɔ ko wakaalɛndja.

Lam’ele nde aki ɔna Saolo l’enondo, Jɔnatana mbakahombe ndjonga nkumekanga. Koko Jɔnatana akeyaka dia Jehowa akasɔnɛ Davidɛ dia monga nkumekanga k’oyoyo k’Isariyɛlɛ ndo nde komboka Davidɛ kandjema. Jɔnatana nde la Davidɛ wakakome angɛnyi wa ma ma. Vɔ wakalakana lam’asawɔ di’onto l’onto nkokɛ osekande. Jɔnatana akasha Davidɛ okutu ande, lokuwa lande la ta, ota ande ndo oya oko djembetelo yashikikɛ lɔngɛnyi lawɔ.

Etena kakatalawɔka Davidɛ Saolo, Jɔnatana akatshu le nde ndo akawotɛ ate: ‘Keketala ndo onga la dihonga. Jehowa akakɔsɔnɛ dia wɛ monga nkumekanga. Kaanga papa mbeyaka dui sɔ.’ Onde wɛ ayɔngɛnangɛna monga l’ɔngɛnyi w’oshika woho waki Jɔnatana?

Ndekana mbala ɔtɔi, Jɔnatana akadje lɔsɛnɔ lande lo waale dia nkimanyiya ɔngɛnyi ande. Nde akeyaka dia nkumekanga Saolo akalangaka ndjaka Davidɛ, ɔnkɔnɛ nde akatɛ she ate: ‘Ayonga kɔlɔ dia wɛ ndjaka Davidɛ, nɛ dia ndooko dui dia kɔlɔ diosadinde.’ Saolo akomalɛ Jɔnatana. Ɛnɔnyi ɛmɔtshi l’ɔkɔngɔ, Saolo la Jɔnatana wakavu lo ta.

L’ɔkɔngɔ wa nyɔi ka Jɔnatana, Davidɛ akayange Mɛfibɔshɛtɛ w’ɔna Jɔnatana. Etena kakɛnana Davidɛ la nde, nde akatɛ Mɛfibɔshɛtɛ ate: ‘Lam’ele shɔ aki ɔngɛnyi w’oshika le mi, dimi layokokimanyiya lɔsɛnɔ layɛ l’otondo. Wɛ ayodjasɛka lo luudu lami la nkumekanga ndo wɛ ayɔlɛka lo mɛsa ami.’ Davidɛ kombohɛ ɔngɛnyi ande Jɔnatana.

Lam’akavu Saolo, Davidɛ akayonga nkumekanga. Nde aki l’ɛnɔnyi 30. L’ɔkɔngɔ wa nde monga nkumekanga l’edja k’ɛnɔnyi ɛmɔtshi, l’otsho ɔmɔtshi oma lo nsambe ka luudu lande la nkumekanga nde akɛnyi womoto ɔmɔtshi l’olangala. Davidɛ akeye dia lokombo lande Batɛ-Shɛba ndo nde aki wadi aki ɔsɔlayi ɔmɔtshi lokombo lande Uriya. Davidɛ akelɛ Batɛ-Shɛba lo luudu lande la nkumekanga. Vɔ wakeyana ko nde akatshu diemi. Davidɛ akayange dia mbishɛ kɛnɛ kakandasale. Nde akatɛ owandji ande w’asɔlayi dia mbetshɛ Uriya la ntondo lo ta ko asɔlayi akina mangana la nde. L’ɔkɔngɔ wa Uriya ndjakema lo ta, Davidɛ akatshuke Batɛ-Shɛba.

Koko Jehowa akɛnyi akambo wa kɔlɔ tshɛ wakasalema. Kakɔna kakandahombe nsala? Jehowa akatome omvutshi Natana le Davidɛ. Natana akate ate: ‘Pami kɛmɔtshi k’ɔngɔnyi aki l’ɛkɔkɔ efula ndo pami kɛmɔtshi ka wola aki paka la yana y’ɔkɔkɔ y’omi yakandalangaka efula. Pami k’ɔngɔnyi kɛsɔ akɔshi ɔkɔkɔ w’omi wa pami k’ose wola kɛsɔ.’ Davidɛ akomala ndo akate ate: ‘Pami k’ɔngɔnyi kɛsɔ pombaka ndjakema!’ Ko Natana akatɛ Davidɛ ate: ‘Wɛ mbele pami k’ɔngɔnyi kɛsɔ!’ Davidɛ akakɔmɔ efula ndo akasuya la ntondo ka Natana ate: ‘Dimi lakasalɛ Jehowa pɛkato.’ Pɛkato kɛsɔ kakela efukutanu efula le Davidɛ ndo le nkumbo kande. Jehowa akasha Davidɛ dilanya koko aketawɔ dia mbotshika la lɔsɛnɔ nɛ dia nde aki onto la losembwe ndo aki l’okitshakitsha.

Davidɛ akalange dia mbikɛ Jehowa tɛmpɛlɔ, koko Jehowa akasɔnɛ dia Sɔlɔmɔna k’ɔnande mbayohomba mbika tɛmpɛlɔ. Davidɛ akatatɛ tshumanya diangɔ dia Sɔlɔmɔna ndjoka tɛmpɛlɔ ndo akate ate: ‘Tɛmpɛlɔ ka Jehowa pombaka monga dimɛna di’efula. Sɔlɔmɔna eke dikɛnda, koko dimi layowokimanyiya dia mbootshumanyɛ diangɔ.’ Davidɛ akakimɔ falanga yande hita efula di’olimu wa wokelo. Nde akatane ase olimu wa tomanamana. Nde akatshumanya paonyi ndo mfɛsa ndo wakawela esongo w’elondo oma la Tura la Sidɔna. Oya lo ekomelo ka lɔsɛnɔ lande, Davidɛ akasha Sɔlɔmɔna dikongelo diendana la wokelo wa tɛmpɛlɔ. Nde akate ate: ‘Jehowa akambutɛ dia dimi mfunda akambo anɛ lo dikambo diayɛ. Jehowa ayokokimanyiya. Tokake wɔma. Onga la dihonga ndo kamba olimu.’