L’ɔkɔngɔ wa Sɔlɔmɔna nkoma nkumekanga k’Isariyɛlɛ, Jehowa akawombola ate: ‘Alangayɛ dimi kosha?’ Sɔlɔmɔna akate ate: ‘Dimi leke dikɛnda, haleye kɛnɛ kasalami. Lam’alangayɛ, ombisha lomba dia dimi nkokɛ wodja ayɛ.’ Jehowa akate ate: ‘Lam’ele wɛ ambɔlɔmba dia monga la lomba, dimi layoketɛ onto loleki tshɛ lomba lo nkɛtɛ k’otondo. Dimi layokosha nto ɔngɔnyi efula. Ndo naka wɛ nkitanyiyami, wɛ ayɔsɛna edja.’

Sɔlɔmɔna akatatɛ mbika tɛmpɛlɔ. Nde akakambe la paonyi, mfɛsa, esongo ndo ave woleki tshɛ dimɛna. Nunu dia apami ndo wamato waki la diewo wakakambaka lo tɛmpɛlɔ. L’ɔkɔngɔ w’ɛnɔnyi esambele, tɛmpɛlɔ kaki suke dia kisapwɛ Jehowa. Tɔ kaki la elambwelo ndo elambo waki lɔkɔ. Sɔlɔmɔna akake adwe la ntondo k’elambwelo ndo akalɔmbɛ ate: ‘Jehowa le, tɛmpɛlɔ kɛnɛ bu woke kana olangala wakoka la yɛ, koko lam’alangayɛ etawɔ ɔtɛmwɛlɔ aso ndo hokamɛ alɔmbɛlɔ aso.’ Ngande wakɔshi Jehowa tɛmpɛlɔ ndo dɔmbɛlɔ dia Sɔlɔmɔna? Kam’akashidiya Sɔlɔmɔna dɔmbɛlɔ diande, dja yakaholɔ oma l’olongo ndo yakatshumbe elambo waki l’elambwelo. Jehowa aketawɔ tɛmpɛlɔ. Lam’akɛnyi ase Isariyɛlɛ dui sɔ, vɔ wakangɛnangɛna.

Nkumekanga Sɔlɔmɔna akeyamaka l’ɔtɛ wa lomba lande lo Isariyɛlɛ w’otondo polo ndo l’ahole wa tale. Anto wakayaka le Sɔlɔmɔna dia ndjoyanga ekimanyielo lo ekakatanu awɔ. Kaanga nkumekanga ka womoto ka Shɛba akaye ndjoohemba la ambola wa wolo. Etena kakandoke ekadimwelo ande, nde akate ate: ‘Dimi kombetawɔ kɛnɛ kakambitɛ anto lo dikambo diayɛ, koko kakianɛ lambɛna dia wɛ ekɔ la lomba efula ndeka ndo kɛnɛ kakawate. Jehowa Nzambi kayɛ ambokɔtshɔla.’ Lɔsɛnɔ laki dimɛna lo wodja w’Isariyɛ ndo anto wa lɛkɔ waki l’ɔngɛnɔngɛnɔ. Koko awui waki suke la ntshikitana.

L’edja tshɛ kakatɛmɔlaka Sɔlɔmɔna Jehowa, wɔladi wakikɔ l’Isariyɛlɛ. Koko Sɔlɔmɔna akatshuke wamato efula w’oma lo wedja ekina ndo wamato asɔ wakatɛmɔlaka dikishi. Yema yema, Sɔlɔmɔna akayokadimɔka ndo nde la wɔ akayotatɛ ntɛmɔla dikishi. Jehowa akomala. Nde akatɛ Sɔlɔmɔna ate: ‘Isariyɛlɛ wayangana la nkumbo kayɛ ndo wayatɔna l’ahende. Dimi layosha okambi ayɛ ɔmɔtshi ɛtshi koleki woke ndo nkumbo kayɛ kayolɛ paka lo yɛtshi ya tshitshɛ.’

Jehowa akalembetshiya hwe yɛdikɔ yande shɔ lo yoho nkina nto. Jɛrɔbɔama, okambi wa Sɔlɔmɔna ɔmɔtshi akayayaka lo mboka etena kakahomana omvutshi Ahidja la nde. Ahidja akaate okutu ande lo bɛtshi 12 ndo akatɛ Jɛrɔbɔama ate: ‘Jehowa ayonya diolelo di’Isariyɛlɛ oma lo nkumbo ka Sɔlɔmɔna ndo ayodiatanya l’ahende. Ɔsa bɛtshi dikumi oma lo bɛtshi nɛ, nɛ dia wɛ ayonga nkumekanga ka waoho dikumi.’ Nkumekanga Sɔlɔmɔna akoke dui sɔ ndo akalange ndjaka Jɛrɔbɔama! Ɔnkɔnɛ, Jɛrɔbɔama akalawɔ l’Edjibito. L’edjedja ka wonya, Sɔlɔmɔna akayovɔ ndo Rɛhɔbɔama w’ɔnande akakome nkumekanga. Ko Jɛrɔbɔama akɛnyi dia aya dimɛna nde nkalola l’Isariyɛlɛ.

Dikumanyi dia l’Isariyɛlɛ diakatɛ Rɛhɔbɔama ɔnɛ: ‘Naka wɛ salɛ anto anɛ ɔlɔlɔ, vɔ wayonga la kɔlamelo oya le yɛ.’ Koko angɛnyi wa Rɛhɔbɔama w’akɛnda wakawotɛ vate: ‘Wɛ pombaka monga awui wolo otsha le anto! Kandjawɔ elimu lo yoho yoleki tshɛ wolo!’ Rɛhɔbɔama akayele dako di’akɛnda w’asekande. Nde aki ngala otsha le anto ndo vɔ wakatɔmbɔkɔ. Vɔ waketɛ Jɛrɔbɔama nkumekanga ka waoho dikumi, diakayelamɛka diolelo di’Isariyɛlɛ. Waoho akina ahende wakayelamɛka diolelo dia Juda ndo vɔ wakatshikala la kɔlamelo le Rɛhɔbɔama. Waoho 12 w’Isariyɛlɛ wakaatɔna.

Jɛrɔbɔama konanga dia anto ande ntshɔ dia tɔtɛmɔla la Jɛrusalɛma, yaki lo diolelo dia Rɛhɔbɔama. Onde wɛ mbeyaka lande na? Jɛrɔbɔama aki la wɔma dia vɔ wayowoka ɔkɔngɔ ndo wayosukɛ Rɛhɔbɔama. Ɔnkɔnɛ, nde akasale tana ta ngɔmbɛ ta paonyi tohende ndo akatɛ anto ande ate: ‘Jɛrusalɛma amboleka etale. Nyu mbeyaka tɛmɔlaka lanɛ.’ Anto wakatatɛ ntɛmɔla tana ta ngɔmbɛ ta paonyi ndo wakayohɛ Jehowa nto.