Diolelo dia waoho dikumi di’Isariyɛlɛ diaki la nkumi ya dikanga ya kɔlɔ efula ndo Ahaba mbakaaleke tshɛ kɔlɔ. Nde akatshuke womoto la kɔlɔ efula lakatɛmɔlaka Baala. Lokombo lande Jezabɛlɛ. Ahaba la Jezabɛlɛ wakalodia wodja l’ɔtɛmwɛlɔ wa Baala ndo wakadiake amvutshi wa Jehowa. Kakɔna kakasale Jehowa? Nde akatome omvutshi Elidja dia tewoya Ahaba losango lɔmɔtshi.

Elidja akatɛ nkumekanga Ahaba dia l’ɔtɛ wa kɔlɔ kande, mvula hatɔlɔ l’Isariyɛlɛ. L’edja k’ɛnɔnyi ndekana esato, diononɛ kotomba ndo anto wakadiɛnɛ la ndjala. L’ɔkɔngɔ diko, Jehowa akayotoma Elidja nto le Ahaba. Nkumekanga akate ate: ‘Wɛ ekɔ ombidji w’ofukutanu! Kɛnɛ tshɛ kambotokomɛ ekɔ munga kayɛ.’ Elidja akakadimola ate: ‘Aha dimi kambosala di’aha mvula ndɔ. Wɛ kambosala dui sɔ lo woho watɛmɔlayɛ Baala. Tayanga mpemba dui dimɔtshi. Tshumanya wodja ndo amvutshi wa Baala lo shɔdi ya Dikona dia Karamɛlɛ.’

Anto wakatshumana lo dikona. Elidja akate ate: ‘Nyodje yimba. Naka Jehowa mbele Nzambi ka mɛtɛ, nyowoyele. Naka Baala mbele Nzambi ka mɛtɛ ko nyu mboyela. Nyosale nganɛ. Amvutshi 450 wa Baala walɔngɔsɔlɛ elambo ndo wele nzambi kawɔ ndo dimi layɔlɔngɔsɔla olambo ndo layelɛ Jehowa. Ɔnɛ layokadimola lo ntoma dja mbele Nzambi ka mɛtɛ.’ Anto waketawɔ.

Amvutshi wa Baala wakalɔngɔsɔla olambo. Lushi l’otondo vɔ wakelɛ nzambi kawɔ ɔnɛ: ‘Baala le, otokadimole!’ Lam’ele Baala kokadimola, Elidja akaasɔkɛ lo mbuta ate: ‘Nyowele la wolo anyu tshɛ. Ondo nde ekɔ lo djɔ ndo onto ɔmɔtshi pombaka mbowemola.’ Dikɔlɔ diakakoke ndo amvutshi wa Baala wakatetemala mbeelɛ koko ndooko okadimwelo.

Elidja akakitsha olambo ande lo elambwelo ndo akatɛ ashi l’omamu atɔ. Ko nde akalɔmbɛ ate: ‘Jehowa le, lam’alangayɛ sala di’anto mbeya dia wɛ kele Nzambi ka mɛtɛ.’ Mbala kakɔ ɔtɔi, Jehowa akatome dja oma l’olongo ndo yakatshumbe olambo. Anto wakade ekoko vate: ‘Jehowa mbele Nzambi ka mɛtɛ!’ Elidja akate ate: ‘Aha ndooko omvutshi wa Baala mpandɔ!’ Lushi lɔsɔ, amvutshi wa Baala 450 wakadiakema.

Etena kakɛnama dinge dia tshitshɛ laadiko dia ndjale, Elidja akatɛ Ahaba ate: ‘Mvula ngembe kayanga ndɔ. Lɔngɔsɔla pusupusu kayɛ ndo kalola la ngelo.’ Olongo wakakome odima tshududu la wange, lɔpɛpɛ lakapɛpɛ ndo mvula ngembe kakatatɛ ndɔ. Ɔwɔ wakayoshilaka. Ahaba akalawɔ la pusupusu kande la lowango loleki tshɛ. L’ekimanyielo ka Jehowa, Elidja akalawɔ ndeka pusupusu lowango! Ko onde ekakatanu waki l’Elidja wakakomɛ laasɔ? Ɛsɔ tende.

Jezabɛlɛ akoke kɛnɛ kakakomɛ amvutshi wa Baala ndo nde aki la nkɛlɛ k’efula. Nde akatomɛ Elidja dui ɔnɛ: ‘Loyi, wɛ ayovɔ woho wakavu amvutshi wa Baala.’ Elidja akoke wɔma efula ndo akalawɔ l’oswe. Nde akalɔmbɛ ate: ‘Jehowa le, handjokoka mbikikɛ. Ontshike mvu.’ Oko wakandalɛmbɛ, Elidja akalale djɔ l’ɛsɛ k’osongo.

Ondjelo ɔmɔtshi akawemola ndo akawotɛ la ngandji tshɛ ate: ‘Emɔ ndo lɛka yangɔ.’ Elidja akɛnyi mapa w’obolonga laadiko di’ave wa dja ndo mbidika k’ashi. Nde akale, akanɔ ndo akalale nto. Ondjelo akawemola nto ndo akate ate: ‘Lɛka. Wɛ pombaka monga la wolo dia minda lɔkɛndɔ.’ Ko Elidja akanyomɔlɛ nto. Oma laasɔ, nde akande lɔkɛndɔ la nshi 40 ndo etsho 40 polo lam’akandakome lo shɔdi ya Dikona dia Hɔrɛbɛ. Lɛkɔ, Elidja akatshu dia tolala lo woko wa dive. Ko Jehowa akatɛkɛta la nde. Nde akate ate: ‘Asalayɛ lanɛ na Elidja?’ Elidja akakadimola ate: ‘Ase Isariyɛlɛ wambolanya sheke yakawadje la yɛ. Vɔ wambolanya dilambwelo diayɛ ndo wambodiaka amvutshi ayɛ. Kakianɛ vɔ wekɔ lo nyanga dia ndjakami ndo dimi.’

Jehowa akawotɛ ate: ‘Tshɔka ndo temale lo dikona.’ Ntondo, lɔpɛpɛ la wolo lakete lo woko wa dive. Oma laasɔ, didimu dia nkɛtɛ ndo dja. L’ekomelo, Elidja akoke dia ki kaya lɛkɔ ndo akoke dui dimɔtshi dia l’ɛse. Nde akafɛ elungi kande la okutu ande ndo akemala l’andja wa woko wa dive. Ko Jehowa akawombola lande na kayandalawɔ. Elidja akate ate: ‘Paka dimɛmɛ oto kambotshikala.’ Koko, Jehowa akawotɛ ate: ‘Aha wɛmɛ oto. Anto 7 000 wekɔ l’Isariyɛlɛ wakatetemala tɛmɔlami. Tshɔka ndo tɔsɔnɛ Elisha dia nde monga omvutshi lo dihole diayɛ.’ Mbala kakɔ ɔtɔi, Elidja akatshu dia tosala kɛnɛ kakawotɛ Jehowa. Onde wɛ mbɔsaka dia Jehowa ayokokimanyiya ndo wɛ etena kasalayɛ kɛnɛ kalangande wɛ nsala? Eelo, nde ayokokimanyiya. Ɛsɔ tende dui dimɔtshi diakasalema lo nshi ya ɔwɔ.