Lo nshi ya ɔwɔ, Jehowa akatɛ Elidja ate: ‘Tshɔka la Zarɛfata. Womoto ɔmɔtshi la wadi aki odo lele lɛkɔ ayotokosha mbo ya ndɛ.’ Lo soko di’osomba, Elidja akɛnyi wadi aki odo ana nkunyi. Elidja akɔlɔmbɛ dia mbosha ashi wa nɔ. Etena kakandatatshɔka dia towɔsɛ, Elidja akoowelɛ ate: ‘Lam’alangayɛ kombela ndo yema ya mapa.’ Koko wadi aki odo akawotɛ ate: ‘Dimi bu la mapa wa kosha. Dimi lekɔ tsho la diwambo di’okuna la yema y’esɔ dia nkatɛ yangɔ ya ndɛ dikambo di’ɔnami ndo dikambo diami dimɛ.’ Elidja akawotɛ ate: ‘Jehowa akalake dia naka wɛ mbishami yema ya mapa, okuna ndo esɔ kayɛ hatoshila polo lam’ayotatɛ avula ndɔ.’

Ɔnkɔnɛ, nde akatshu lakande ko akatokatɛ omvutshi waki Nzambi mapa. Paka oko wakalake Jehowa, wadi aki odo ɔsɔ la ɔnande wakongaka nshi tshɛ la mbo ya ndɛ lo nshi ya ɔwɔ. Mbaka kande k’okuna ndo k’esɔ akongaka wonya tshɛ tɔɔ.

Oma laasɔ, dui dimɔtshi dia kɔlɔ diakasalema. Ɔna wadi aki odo ɔsɔ akatate hemɔ efula ndo akavu. Nde akalɔmbɛ Elidja dia mbokimanyiya. Elidja akɔshi ɔna oma l’anya ande ko akadɛ la nde lo luudu lande. Nde akawetanya lo mbeto ndo akalɔmbɛ ate: ‘Jehowa le, lam’alangayɛ olola ɔna ɔnɛ.’ Onde wɛ mbeyaka lande na kele ɔsɔ aki dui dia diambo dia Jehowa nsala? Nɛ dia oko wadieyaso, polo l’etena kɛsɔ ko ndooko onto lakolɔ. Ndo wadi aki odo ɔsɔ ndo ɔnande komonga ase Isariyɛlɛ.

Koko ɔna ɔsɔ akolɔ ko nde akatatɛ mpɛnga! Elidja akatɛ wadi aki odo ate: ‘Eenda! Ɔnayɛ aya la lɔsɛnɔ.’ Nde aki l’ɔngɛnɔngɛnɔ w’efula ndo akatɛ Elidja ate: ‘Wɛ mɛtɛ ekɔ omvutshi wa Nzambi. Dimi mbeyaka dui sɔ nɛ dia wɛ tɛkɛtaka paka kɛnɛ kakotɛ Jehowa dia mbuta.’

Oma lo didishi dia lo luudu lande la nkumekanga la la Jɛzɛrɛlɛ, nkumekanga Ahaba akakokaka mɛna ekambɔ ka vinyɔ kaki Nabɔta. Ahaba akalangaka ekambɔ ka vinyɔ kɛsɔ ndo akasale tshɛ dia kisomba oma le Nabɔta. Koko Nabɔta akatone mbosondjatɔ, nɛ dia Jehowa akatonaka osondjelo w’ɛtshi ka nkɛtɛ k’okitɔ. Onde Ahaba akalɛmiya Nabɔta lo yɛdikɔ ya dimɛna yakandɔshi? Ndooko. Ahaba akomala efula. Nde akomala polo ndo ntona ntomba oma lo luudu lande la ndala ndo akatone ndɛ.

Jezabɛlɛ wadi aki Ahaba laki nkumekanga ka womoto ka kɔlɔ akawotɛ ate: ‘Wɛ kele nkumekanga kolɛ lo Isariyɛlɛ. Wɛ koka nkondja kɛnɛ tshɛ kalangayɛ. Dimi layosala dia wɛ nkondja ekambɔ kengo.’ Ko nde akafundɛ dikumanyi dia l’osomba mikanda dia vɔ mfunda Nabɔta ɔnɛ nde ambodja Nzambi mananu ndo dia vɔ mbooka ave polo nde mvɔ. Dikumanyi wakasale kɛnɛ kakawatɛ Jezabɛlɛ ndo oma laasɔ, Jezabɛlɛ akatɛ Ahaba ɔnɛ: ‘Nabɔta ambovɔ. Ekambɔ ka vinyɔ kaya kakiyɛ.’

Nabɔta komonga onto la ntondo laki komonga l’onongo lakadiakisha Jezabɛlɛ. Nde akadiakisha anto efula wakokaka Jehowa ngandji. Nde akatɛmɔlaka dikishi ndo akasalaka awui akina wa kɔlɔ. Jehowa akɛnaka awui wa kɔlɔ tshɛ wakasalaka Jezabɛlɛ. Kakɔna kakandahombe mbosalɛ?

L’ɔkɔngɔ w’Ahaba mvɔ, Jɛhɔrama y’ɔnande akakome nkumekanga. Jehowa akatome Jehu dia ndjosha Jezabɛlɛ la nkumbo kande dilanya.

Jehu akahema lo pusupusu kande otsha la Jɛzɛrɛlɛ lɛnɛ akadjasɛka Jezabɛlɛ. Jɛhɔrama akaye lo pusupusu dia ndjohomana la Jehu ko akawombola ɔnɛ: ‘Onde wɔladi wekɔ lam’asaso?’ Jehu akokadimola ate: ‘Ndooko wɔladi wayonga etena tshɛ kakatetemala Jezabɛlɛ ya nyɔ la nsala awui wa kɔlɔ.’ Jɛhɔrama akahembe dia nkadimola mponda kande dia ntshɔ. Koko Jehu akooke Jɛhɔrama lohito ko nde akavu.

Oma laasɔ, Jehu akatshu otsha lo luudu laki Jezabɛlɛ. Etena kakoke Jezabɛlɛ dia nde oyaye, nde akayalɛngɛ, akalɔngɔsɔla divo diande ko akatatɛ mbokonga la didishi diande. Etena kakakome Jehu, Jezabɛlɛ akawosha mɔyɔ l’otako tshɛ. Jehu akatɛ ekambi ande wakemala suke la nde ate: “Nyowoke la nkɛtɛ!” Vɔ wakakasha Jezabɛlɛ oma lo didishi ndo nde akakɔ la nkɛtɛ ko akavu.

L’ɔkɔngɔ wa laasɔ, Jehu akadiake ana waki Ahaba 70 ndo akɛdia wodja wakatɛmɔlaka Baala. Onde wɛ ambɛna dia Jehowa mbeyaka oseka dui tshɛ ndo ɔnɛ l’etena kahombama, nde mbishaka dilanya le anto wasala awui wa kɔlɔ?