Nsanganya ya l’etshumanelo yasalema lo tshimbo ya vidɛo kɔferansɛ

Mandji efula l’andja w’otondo yambɔlɔmba diaha anto mamatanaka lam’asawɔ ndo diaha anto tshumanaka lo sɛkɛ. Ɛmɛnyi wa Jehowa wamboyashikikɛ dia ndjela awui walɔmbama asɔ etena kewɔ lo ntetemala nsangana aha la mbidja nsɛnɔ lo waale. Dia vɔ nsangana, tshumanelo diekɔ lo nkamba la vidɛo kɔferansɛ, ɛnyɛlɔ oko Zoom.

L’oyango wa sho salaka nsanganya yaso mbala la mbala aha la mbidja nsɛnɔ yaso lo waale, Olui-walɔmbɔla aketawɔ dia sho nkamba la weshasha dia ndihola wa kɔntɛ lo Zoom dikambo dia tshumanelo. Ɔsɔ amonga ekimanyielo ka woke le tshumanelo dimɔtshi diahakoke nsomba kɔntɛ ya losomba yele l’oshinga wa dɔlara 15-20 kana ndekana. Tshumanelo sɔ wakakambaka mbala efula la kɔntɛ y’ofele yele la elelo lo lofulo l’anto lahomba ndja kɔnɛktɛ ndo yele la ekokelo ka dimɛna. Tshumanelo tshɛ diakamba la kɔntɛ ka Zoom k’okongamelo kokaka nkondja wahɔ oma lo woho wele kɔntɛ shɔ bu l’okakatanu dia ndjikokɛ ndo lemba l’anto la woke kokaka ndja kɔnɛktɛ lo losanganya tshɛ. Polo ndo ɛlɔ katɛkɛtaso kɛnɛ, tshumanelo ndekana 65 000 lo wedja ndekana 170 diekɔ lo nkamba la kɔntɛ shɔ.

Etshumanelo ka Kairagi, la Manado, lo Nɔrdɛ ka Sulawesi, l’Indonesie, wakamɔ oma lo vidɛo kɔferansɛ k’ofele ko ntshɔ otsha lo Zoom k’okongamelo. Ɔnangɛso Hadi Santoso mbutaka ate: “Kaanga anangɛso l’akadiyɛso wele bu tomanyi l’okambelo wa la tshulatshula kokaka mbɔtɔ nsanganya shɔ, lo yɛdikɔ ya woke nɛ dia waya bu l’ohomba wa ndjakɔnɛktɛka mbala efula lo losanganya ɔtɔi.”

Lester Jijón, Jr., ekumanyi kɛmɔtshi ka l’etshumanelo ka Guayacanes Oeste la Guayaquil, lo wodja w’Équateur mbutaka ate: “Lam’ele anangɛso l’akadiyɛso efula bu l’ekondjelo ka dimɛna, otonga wolo le tshumanelo dimɔtshi dia diɔ nsomba license la Zoom lotowasha etshumanelo k’otondo diaaso dia mbɔtɔ nsanganya. Kakianɛ, diɛsɛ l’okongamelo, taya la kɔntɛ ka Zoom kaya lemba l’anto la diaaso dia vɔ ndjakɔnɛktɛ. Taya l’akoka wa mbelɛ anto akina oya lo nsanganya ofele, aha la wɔma w’ɔnɛ kɔnɛksiɔ kayohembɔ.”

Johnson Mwanza, ekumanyi kɛmɔtshi ka l’etshumanelo ka Ngwerere North l’osomba wa Lusaka, lo wodja wa Zambie, akafunde ate: “Anangɛso l’akadiyɛso wakataka mbala la mbala ɔnɛ: ‘Zoom k’okongamelo tokonyaka dia ndjaoka suke suke l’anangɛso l’akadiyɛso ndo mɛnyaka dia Jehowa tokaka ngandji ndo tokokɛka.’”

Kɔntɛ y’okongamelo shɔ yakasombama diɛsɛ la falanga yakombama dikambo dia waa mpokoso. Falanga shɔ ndja oma lo weshasha wa la lolango dikambo di’olimu wakambema l’andja w’otondo. Efula ka weshasha ɛsɔ kimɔmaka lo tshimbo ya donate.jw.org. Loska lo weshasha anyu wa la lokaho, wakimanyiya nto etena katomba mpokoso kɛmɔtshi.​—2 Kɔrɛtɔ 8:14.