B1
Losango la lo Bible
Jehowa Nzambi mbele la lotshungɔ la mbolɛ. Yoho yande ya mbolɛ mboleki dimɛna. Sangwelo diande diendana la nkɛtɛ ndo l’anto diayokotshama.
L’ɔkɔngɔ wa 4026 N.T.D. “Oloyi” akɔnyɔla lotshungɔ lele la Jehowa la mbolɛ ndo yoho yande ya nɔmbɔla. Jehowa akalake dia ntondja “kanula” kana “lɔtɔngɔ” layoyominola oloyi, mbuta ate Satana. (Etatelo 3:1-5, 15, nɔtɛ) Koko Jehowa akatshike etena k’anto ndjalɔmbɔla vɔamɛ lo shɛngiya yaki oloyi. |
1943 N.T.D. Jehowa ambotɛ Abrahama ɔnɛ “kanula” yakalakema yayonga ɔmɔtshi la lo ɔlɔndji ande.—Etatelo 22:18. |
L’ɔkɔngɔ wa 1070 N.T.D. Jehowa amboshikikɛ nkumekanga Davidɛ ndo akayoshikikɛ ɔnande Sɔlɔmɔna l’ɔkɔngɔ ɔnɛ “kanula” yakalakema yayotomba oma lo ɔlɔndji wa nkumbo kawɔ.—2 Samuɛlɛ 7:12, 16; 1 Nkumi ya dikanga 9:3-5; Isaya 9:6, 7. |
29 T.D. Jehowa ambɛnya dia Yeso mbele “kanula” yakalakema, ɔnɛ lele Okitɔ wa kiti ka Davidɛ.—Ngalatiya 3:16; Luka 1:31-33; 3:21, 22. |
33 T.D. Oloyi, mbuta ate Satana, akasha “kanula” yakalakema paa lo tshanda mɔtshi lo ndjakisha Yeso. Jehowa akoolola Yeso otsha lo lɔsɛnɔ la l’olongo ko aketawɔ nɛmɔ dia lɔsɛnɔ la kokele laki Yeso. Diɛsɛ l’olambo akɔ mbakoka tokanula taki Adama nkondja edimanyielo ka pɛkato ndo lɔsɛnɔ la pondjo.—Etalelo 3:15; Etsha 2:32-36; 1 Kɔrɛtɔ 15:21, 22. |
Oya lo 1914 T.D. Yeso akakasha oloyi, mbuta ate Satana oya la nkɛtɛ, dia mbolama lɛkɔ lo etena ka mondo.—Ɛnyɛlɔ 12:7-9, 12. |
Nshi yayaye Yeso ayodja Satana lo lokanu l’edja k’ɛnɔnyi 1000, oma laasɔ nde ayowolanya, lo yoho ya didjidji ayominola ɔtɛ ande. Etena kɛsɔ mbayokotshama sangwelo diaki Jehowa di’oma l’etatelo diendana la nkɛtɛ ndo l’anto ndo mbayɛdiama lokombo lande oma lo ntɛngɔ ndo mbayoyindjama lowandji lande.—Ɛnyɛlɔ 20:1-3, 10; 21:3, 4. |