Hulda akakotsha oyango ande

NAKA wɛ akatembola disɛnga dia tshitshɛ dia Sangir Besar lo Indonésie ɛnɔnyi engana wetshi, kete ondo wɛ akɛnyi akadiyɛso asato w’Akristo lo disɛnga sɔ. Vɔ mbeyamaka dimɛna lo disɛnga sɔ l’ɔtɛ w’esambishelo kawɔ, mbuta ate woho wakimanyiyawɔ anto dia nshihodia Bible. Koko lo diaaso sɔ, vɔ wekɔ lo nkamba olimu ɔmɔtshi wa laande.

Ntondotondo, vɔ waketetaka l’ashi ndo wakatoshola abanga wa wetsho ko wakɛmbaka abanga asɔ oya l’okongo. Abanga amɔtshi l’atei awɔ waki weke oko mponde kokawɔ l’ekolo. Oma laasɔ, wamato asɔ wakadjasɛka lo tobasa tatotshitshɛ ndo wakakambaka la maditɔ dia mbatshatsha abanga asɔ tɛtshi tɛtshi, totshitshɛ ndeka ekele wa kɔkɔ. Oma laasɔ, wakadjaka tɔwɔkɔwɔkɔ tɔsɔ lo bomba ya mponde ndo wakayɛmbaka otsha l’etajɛ lo dihole diakawadjasɛka. Ko oma laasɔ, wakadjaka tɔwɔkɔwɔkɔ tɔsɔ lo saki ya weke ko todja lo mituka ndo wakakambaka la mbɔkɔ shɔ dia nsala otadimbo.

Kadiyɛso kɛmɔtshi l’atei w’akadiyɛso asɔ lokombo lande Hulda. Awui waki la nde lo lɔsɛnɔ wakawoshaka diaaso dia nde kambaka wenya efula oleki asekande. Nde akakambaka la falanga yakandakondjaka dia sombɛ ase nkumbo kande ehomba waki lawɔ lushi la lushi. Koko, wonya ɔnɛ nde okamba olimu ɔsɔ la oyango okina lo yimba. Nde aki l’ohomba wa tablɛtɛ kakandakokaka mbɔtɔ lo aplikasiɔ wa JW Library^®. Hulda akeyaka dia tovidɛo ndo diangɔ dikina dia lo aplikasiɔ ɔsɔ diayolowanya esambishelo kande ndo eokelo kande ka Bible.

Hulda akakambaka wenya ehende wa ntango pindju tshɛ l’edja ka ngɔndɔ ɔtɔi l’etenyi, lo mbatshatshaka abanga dia ndodia mutuka ɔmɔtshi wa tshitshɛ. L’ekomelo, nde akayokondja falanga yakandakoke nsomba tablɛtɛ.

Hulda, mbutaka ate: “Kaanga mbakamalɛmbaka ndo kakamadiɛnɛka l’efushi w’abanga wakamatshatshaka, aha la ntshimbatshimba lakohɛ paa tshɛ yakamɛnaka ndo nkandji yakamokaka etena kakamatatɛ nkamba la tablɛtɛ kami k’oyoyo dia nkimanyiyami dia dimi nyomoleka mpamia olimu ami w’esambishelo ndo nyomoleka mbetsha ɔlɔngɔswɛlɔ wa nsanganya yaso y’Akristo dui dia wɔdu efula.” Nde mbutaka nto dia tablɛtɛ kɛsɔ kakokimanyiya etena kakatatɛ hemɔ kakakokanɛ l’andja w’otondo ka COVID 19, nɛ dia awui tshɛ wa l’etshumanelo wakasalemaka lo telefɔnɛ kana lo tablɛtɛ. Tekɔ lo ngɛnangɛna kaamɛ la Hulda lo woho wakandakotsha oyango ande ɔsɔ.