3. Lande na kasowa anto w’ɛlɔlɔ?
Ohomba wa dimbola sɔ
Kɛnɛ kele mɛtɛ ele, keema losembwe di’anto w’ɛlɔlɔ nsowa. Amɔtshi mbutaka dia keema ohomba nyanga dia ndjala onto l’ɔlɔlɔ naka wɛ ayosowa lo yoho mɔtshi.
Tokane yimba la dui nɛ
Amɔtshi mbutaka di’anto mvɔka ndo mbotɔka nto lootɔ la mbala ka hende. Vɔ mbutaka dia wanɛ wakasalaka awui w’ɛlɔlɔ, nyomotɔka nto dia tɔsɛna lo lɔsɛnɔ loleki dimɛna, koko wanɛ wakasalaka awui wa kɔlɔ, nyomotɔka nto dia tɔsɛna lɛnɛ ayowotosowaka tena tshɛ. Lo ndjela dietawɔ sɔ, kaanga onto ɔlɔlɔ kokaka nsowa naka nde akasale awui wa kɔlɔ lo “nshi y’edjedja.” Ko . . .
Oyango akɔna wakoka monga l’asui asɔ, lam’ele onto latawɔ dia nde nyomotɔka nto hohɔ awui wakandasalaka lo nshi y’edjedja?
Lande na kasalaso la wolo efula dia ntshikala la yoonge ya dimɛna ndo mbewɔ aksida, naka lɔsɛnɔ laso nemanɛka lo yɛdikɔ y’efula la kɛnɛ kakatasalaka lo nshi y’edjedja?
DIA MBEYA AWUI AKINA EFULA
Enda vidɛo yele l’ɔtɛ a dui ɔnɛ: Lande na katshika Nzambi asui? yɔ tanemaka lo jw.org.
Kɛnɛ kata Bible
Asui keema dilanya di’oma le Nzambi.
Koko asui efula ndjaaka mbala efula etena katanema onto lo dihole dimɔtshi dia kɔlɔ ndo l’etena ka kɔlɔ.
“Aha wanɛ wadja lowango mbatodjaka nshi tshɛ otshumba, aha akanga wa wolo mbalɛndja ta, aha akanga wa lomba mbonga nshi tshɛ la mbo ya ndɛ, aha akanga wa yimba mbonga nshi tshɛ ɛngɔnyi, ndo aha wanɛ wele la ewo mbatondoya nshi tshɛ, nɛ dia tena ndo awui wa shashimoya mbakomɛka vɔ tshɛ.”—ONDAKI 9:11.
Pɛkato kakatahowɔ mbele lo kiɔkɔ y’asui.
Anto kambaka la tshɛkɛta “pɛkato” mbala efula dia ntɛkɛta dikambo di’etsha wa kɔlɔ wasala onto ɔmɔtshi. Koko, Bible kambaka nto la tshɛkɛta shɔ dia mɛnya dia sho tshɛ, oyadi onto ɔlɔlɔ kana onto la kɔlɔ, sho tshɛ takahowɔ pɛkato.
“Dimi lakotɔ la onongo wa munga, ndo otshi wa pɛkato oma ko etena kakatshu mama diemi diami.”—OSAMBO 51:5, Nɔtɛ.
Pɛkato kaki la shɛngiya ya kɔlɔ efula le anto.
Tɔ kondanya tsho diɔtɔnganelo diasaso la Nzambi, koko kakela nto ndo mpokoso kina ndo kakela nto etombelo wa kɔlɔ efula le anto tshɛ. Dui sɔ mbamboyokonya dia asui monga efula, oyadi l’onto ndo l’onto kana le anto tshɛ.
“Lam’akombolami nsala kɛnɛ kele ɔlɔlɔ, kɛnɛ kele kɔlɔ kekɔ le mi.”—RƆMƆ 7:21.
“Ditongami tshɛ diekɔ lo ntetemala nkuma akumu kaamɛ ndo diekɔ lo nsowa kaamɛ.”—RƆMƆ 8:22.