KƐNƐ KA NSALA ETENA KATADƐ DIANGƆ ESHINGA

Onga l’elongamelo

Onde eshinga wa diangɔ wekɔ lo tadɛ lo wodja anyu, koko wɛ bu la falanga efula? Onde wɛ ekɔ lo ndjakiyanya dia nkotsha ehomba ayɛ ndo w’ase nkumbo kayɛ? Naka ngasɔ, kete wɛ koka ndjakiyanya lo dikambo dia nshi yayaye. Koko oyadi lo tena di’ekakatanu wa ngasɔ, monga l’elongamelo ekɔ ohomba efula.

OHOMBA WA DUI SƆ

Anto wele l’elongamelo hawokombola tsho di’awui w’ɛlɔlɔ salema. Elongamelo mbatshutshuyaka dia vɔ nsala tshɛ kakokawɔ nsala dia nkandola ekakatanu awɔ. Ɛnyɛlɔ, wekelo ɛmɔtshi mɛnyaka dia anto wele l’elongamelo salaka awui wayela anɛ. . .

mbikikɛka ekakanu wele la wɔ
salaka etshikitanu etena kele dui sɔ ohomba
salaka ɛsɔnwɛlɔ wa la lomba lo lɔsɛnɔ mbidja ndo mbekelo yakimanyiya dia monga la yoonge ya dimɛna

KƐNƐ KAKOKAYƐ NSALA

Dui dia ntondo: Sɛdingola woho wakoka Bible kokimanyiya ɛlɔ kɛnɛ. Bible kekɔ l’alako w’eshika wakoka kokimanyiya dia ntondoya etena kadɛ diangɔ eshinga. Alako asɔ koka kokimanyiya aha tsho etena kayaokayɛ dia wɛ bu l’okimanyedi, koko ndo dia mbeya dia ekɔ dui dimɔtshi diakokayɛ nsala oma ko kakianɛ ndo lo nshi yayaye etena kayoyohomana l’ekakatanu.

“Ekanelo ka yimba k’ɔlɔlɔ kayokokokɛ; ndo nshihodia akambo ayokolama.”—Tokedi 2:11, New Century Version.

Dui dia hende: Sɛdingola kɛnɛ kata Bible lo dikambo dia nshi yayaye. Etena kashihodiayɛ ohomba wa lomba latanema lo Bible, wɛ koka tshutshuyama dia nyanga dia mbeya awui akina efula wata dibuku sɔ lo dikambo dia nshi yayaye. Ɛnyɛlɔ, Nzambi hakombola tsho dia wɛ monga la “nshi yayaye ndo elongamelo,” koko nde koshaka ndo ɔkɔkɔ w’oshika wa monga l’elongamelo kɛsɔ. (Jɛrɛmiya 29:11) Ɔkɔkɔ akɔ ko Diolelo dia Nzambi.

DIOLELO DIA NZAMBI KƐDIKƐDI NA NDO KAKƆNA KAYODIOSALA?

Diolelo dia Nzambi ekɔ lowandji layahemɛ nkɛtɛ k’otondo. (Danyɛlɛ 2:44; Mateo 6:10) Diɔ diayɔlɔmbɔla oma l’olongo, diayokomiya asui ndo wola ndo diayɔhɛnya awui asɔ la wɔladi ndo kɛnɛ tshɛ kayonga l’anto ohomba dia monga l’ɔngɛnɔngɛnɔ oko wadiɛnya avɛsa wayela anɛ.

“Wɛ ayonga l’ɔngɛnɔngɛnɔ ndo ayonga la ɔngɔnyi.”—Osambo 128:2.

“Vɔ [ambolami wa Diolelo.] hawotɛna paa wɛnɛna.”—Isaya 65:23.

“Mbo ya ndɛ yayoyala efula la nkɛtɛ.”—Osambo 72:16.

Miliyɔ y’anto wayaɛkɛ lo alaka asɔ, wekɔ l’eshikikelo dia Nzambi ‘hakoke mbuta kashi.’ (Tito 1:2) Wɛmɛ koka menda dui sɔ lo Bible. Elongamelo kashatɔ koka kokimanyiya dia mbikikɛ tena dia wolo ndo monga l’eshikikelo dia nshi yayaye y’amɛna yekɔ lo kokongɛ.