TSHAPITA 1

Yeso Aki Ombetsha A Woke

AMBETA ɛnɔnyi ndekana nunu dihende wele ɔna ɔmɔtshi lotshikitanyi l’ana akina tshɛ akotɔ. Nde akole polo ndo ndjokoma onto loleki woke lo tena tshɛ. Ndoko onto lakasɛnaka l’etena kɛsɔ laki l’aviyɔ, mutuka kana mututu. Diangɔ diele oko televiziɔ, ɔrdinatɛrɛ kana Ɛtɛrnɛtɛ komonga.

Lokombo lakawɔlɛ ɔn’ɔsɔ ko Yeso. Nde akayokoma onto loleki anto wa lo nkɛtɛ k’otondo lomba. Yeso akayokoma nto ombetsha woleki mbeya mbetsha. Nde akalembetshiyaka awui wa wolo lo yoho yakakokaka anto mbaoka aha kânga la yema y’okakatanu.

Yeso aketshaka anto l’oseka dihole tshɛ diakandahomanaka la wɔ. Nde akawaetshaka l’omamu w’ashi a wake ndo oma lo masuwa. Nde aketshaka anto lawakawɔ ndo lam’akinde lo nkɛndɔ. Yeso komonga la mutuka ndo nde komindaka nkɛndɔ lo mutuka kana lo kawolo. Yeso akatshɔka lo dihole la dihole dia tetshaka anto.

Sho mbekaka awui efula oma le anto akina. Koko sho koka mbeka awui woleki ohomba oma le Yeso lele Ombetsha a Woke. Ɛtɛkɛta waki Yeso tanemaka lo Bible. Lam’ahokamɛso ɛtɛkɛta ɛsɔ oma lo Bible, sho mbokaka di’oko Yeso mbatɛkɛta la so.

Lande na kaki Yeso Ombetsha a Woke wa ngasɔ na? Ɔkɔkɔ ɔmɔtshi ele nɛ dia Yeso ndamɛ aketshama. Ndo nde akeyaka dia ekɔ ohomba efula mpokamɛ. Ko Yeso akandahokamɛka na? Onto akɔna akawetshaka?. . . She mbakawetshaka ndo She Yeso mbele Nzambi.

La ntondo ka nde ndja lanɛ la nkɛtɛ oko onto, Yeso akasɛnaka l’olongo nde la Nzambi. Ɔnkɔnɛ, Yeso akatshikitana l’anto akina tshɛ nɛ dia ndoko onto lakasɛnɛ l’olongo la ntondo ka nde mbotɔ lanɛ la nkɛtɛ. Yeso aki ɔna l’ɔlɔlɔ lam’akinde l’olongo, nde akahokamɛka awui waki She. Dakɔ diaki Yeso l’akoka wa mbetsha anto kɛnɛ kakandeke oma le Nzambi. Wɛ koka mbokoya Yeso naka wɛ mpokamɛka awui waki shɔ la nyɔ.

Ɔkɔkɔ okina waki Yeso Ombetsha a Woke ele nde akokaka anto ngandji. Nde akalangaka kimanyiya anto dia vɔ mbeka awui wendana la Nzambi. Yeso akalangaka oyadi epalanga w’anto kana ana. Ndo ana wakangɛnangɛnaka monga lale Yeso nɛ dia nde akatɛkɛtaka la wɔ ndo akâhokamɛka.

Lushi lɔmɔtshi ambutshi amɔtshi wakaye l’anawɔ w’akɛnda oya le Yeso. Koko angɛnyi waki Yeso wakafɔnya ɔnɛ Ombetsha a Woke aki l’olimu efula, lâsɔ nde kondjala l’etena ka tɛkɛta la tɔkɛndakɛnda. Ɔnkɔnɛ vɔ wakatɛ ambutshi dia vɔ kawola l’anawɔ. Ko Yeso akandate na?. . . Nde akate ate: “Nyete tokendakenda wayi le mi, tanyâsikeki.” Eelo, Yeso akalangaka di’ana w’akɛnda ndja oya le nde. Ɔnkɔnɛ, kânga mbakinde onto lele la lomba efula ndo onto la woke, Yeso akɔshi etena ka mbetsha tɔkɛndakɛnda.​—⁠Mako 10:​13, 14.

Onde wɛ mbeyaka lande na kaketshaka Yeso ana ndo kakandâhokamɛka? Ɔkɔkɔ ɔmɔtshi ele nde akalangaka mbangɛnyangɛnya lo mbaewoya awui wendana la Nzambi ka She lele l’olongo. Ngande wakokayɛ ngɛnyangɛnya anto na?. . . Ele lo mbaewoya awui wamboyeka lo kɛnɛ kendana la Nzambi.

Mbala kɛmɔtshi, Yeso akakambe la kiɛndakɛnda dia mbisha angɛnyi Ande wetshelo ɔmɔtshi w’ohomba efula. Nde akɔshi ɔn’ɔsɔ ko nde mbêmadja l’atei w’ambeki Ande. Oma lâsɔ, Yeso akate di’epalanga w’anto ɛsɔ wakahombe tshikitanya waonga awɔ ko monga oko kiɛndakɛnda shɔ.

Yeso akandalange nembetshiya lam’akandate dui sɔ na? Onde wɛ mbeyaka woho wakoka opalanga w’onto kana onto lambola yema koma oko kiɛndakɛnda?. . . Ɔna leke kiɛndakɛnda heye awui efula oko opalanga w’onto ndo nde mongaka la nsaki k’efula ka mbeka. Lâsɔ, Yeso akataka dia ambeki ande wakahombe monga la ndjakitshakitsha oko ana w’akɛnda. Lo mɛtɛ, sho tshɛ koka mbeka awui efula oma le anto akina. Ndo sho tshɛ pombaka mbeya dia wetshelo waki Yeso wekɔ ohomba efula ndeka ndo tokanyi taso.​—⁠Mateu 18:​1-5.

Ɔkɔkɔ okina waki Yeso Ombetsha a Woke wa ngasɔ ele nde akeyaka mbuta awui lo yoho yakokawɔ kotola yambalo y’anto. Nde akalembetshiyaka akambo lo yoho ya wɔdu ndo yokɛma hwe. Nde akatɛkɛta dia tofudu, alɛmbɔlɛmbɔ ndo dia diangɔ dikina dieyama dia kimanyiya anto dia vɔ shihodia awui wendana la Nzambi.

Lushi lɔmɔtshi, lam’aki Yeso lo dikona dimɔtshi, anto efula wakaye le nde. Yeso akadjasɛ ndo akawasha sawo kana dako oko wakokayɛ mɛna lo sango nɛ. Vɔ mbelɛka sawo sɔ ɔnɛ Dako dia lo Dikona. Nde akate ate: ‘Nyende tofudu ta lo lowa. Tɔ hatonɛ diangɔ. Tɔ hatombe mbo ya ndɛ lo tokifu. Koko Nzambi lele l’olongo tileshaka. Onde nyu hanyoleki tofudu nɛmɔ?’

Yeso akate nto ate: ‘Nyokondja wetshelo oma le alɛmbɔlɛmbɔ wa l’okonda. Vɔ mbolaka aha la vɔ kamba. Ko ohonyenda woho wewɔ amɛna! Kânga Sɔlɔmɔna laki Nkumekanga k’ɔngɔnyi kɔndɔta ahɔndɔ w’amɛna woleki alɛmbɔlɛmbɔ wa l’okonda. Lâsɔ naka Nzambi kokɛka alɛmbɔlɛmbɔ dia vɔ mbola, onde nde hatonyokokɛ ndo nyu?’​—⁠Mateu 6:​25-33.

Onde wɛ amboka wetshelo wakasha Yeso?. . . Nde konanga dia sho ndjakiyanya dia mbeya lende ayototana mbo ya ndɛ kana ahɔndɔ wa ndɔta. Nzambi mbeyaka dia tekɔ l’ohomba wa diangɔ sɔ tshɛ. Yeso kombuta ɔnɛ sho hatohombe kamba olimu dia tana mbo ya ndɛ kana ahɔndɔ wa ndɔta. Koko nde akate dia sho pombaka mbidja Nzambi lo dihole dia ntondo. Naka sho sala ngasɔ, kete Nzambi ayosala di’aha sho pomba mbo ya ndɛ ndo ahɔndɔ wa ndɔta. Onde wɛ mbetawɔka dui sɔ?. . .

Lam’akashidiya Yeso la tɛkɛta, ngande wakakanyiya anto na?. . . Bible mbutaka ɔnɛ vɔ wakambe efula lo mɛna woho wakandetshaka. Aki dimɛna efula mbôhokamɛ mɛtɛ. Kɛnɛ kakandate akakimanyiya anto dia vɔ sala kɛnɛ kele ɔlɔlɔ.​—⁠Mateu 7:⁠28.

Ɔnkɔnɛ, ekɔ ohomba efula sho mbetshama oma le Yeso. Onde wɛ mbeyaka woho wakokaso sala dui sɔ?. . . Tekɔ l’ɛtɛkɛta ande wakafundama lo dibuku dimɔtshi. Onde wɛ mbeyaka dibuku diakɔ?. . . Bible k’Ekila mbele dibuku diakɔ. Kɛsɔ mɛnyaka dia sho koka mpokamɛ Yeso lo mbidja yimba l’awui wadiaso lo Bible. Ndo Bible mɛtɛ ekɔ l’ɔkɔndɔ wa dimɛna efula wendana la woho wakatotɛ Nzambi ndamɛ dia sho mpokamɛ Yeso. Ɛsɔ tende kɛnɛ kakatombe.

Lushi lɔmɔtshi, Yeso akadɛ nde l’angɛnyi ande asato lo dikona dimɔtshi. Nkombo yawɔ ko Jakɔbɔ, Joani la Petero. L’ɔkɔngɔ diko, tayeka awui efula wendana l’apami asɔ nɛ dia vɔ akɔ asato waki angɛnyi waki Yeso w’eshika. Koko lo diaaso dia lânde sɔ, elungi kaki Yeso kakatatɛ tondja esase. Ndo ahɔndɔ ande wakahɛtɛ oko osase, oko wakokayɛ mɛna lo sango nɛ.

Oma lâsɔ, Yeso nde l’angɛnyi ande wakoke dui dimɔtshi oma l’olongo diata ɔnɛ: “On’ami la ngandji one, ndi ambongenyangenya; [nyohokame].” (Mateu 17:​1-5) Onde wɛ mbeyaka ɔnɛ laki kanga dui sɔ?. . . Ɔsɔ aki dui diaki Nzambi! Eelo, Nzambi ndamɛ mbakate dia vɔ la dia mpokamɛ Ɔnande.

Ko kayotota dikambo diaso ɛlɔ kɛnɛ na? Onde tayokitanyiya Nzambi ndo mpokamɛ Ɔnande lele Ombetsha a Woke?. . . Kɛsɔ mbahombaso sala sho tshɛ. Onde wɛ mbohɔka nganɛ wakokaso sala dui sɔ?. . .

Eelo, sho koka mpokamɛ Ɔna Nzambi lo mbadiaka ɛkɔndɔ wa lɔsɛnɔ lande wele lo Bible. Ekɔ awui efula w’amɛna wahomba Ombetsha a Woke tewoya. Wɛ ayɔngɛnangɛna dia mbeka awui akɔ wakafundama lo Bible. Ndo dui sɔ diayokela ɔngɛnɔngɛnɔ naka wɛ mbewoya angɛnyi ayɛ awui w’amɛna wekayɛ.

Dia mbeya awui efula w’ɔlɔlɔ wendana l’awui w’amɛna wakondjaso lo mpokamɛ Yeso, fola Bible kayɛ kele adia Joani 3:16; 8:​28-30; ndo Etsha 4:⁠12.

[Osato wa lo lɛkɛ 11]

Lande na kakangɛnangɛnaka ana monga lale Yeso?

[Osato wa lo lɛkɛ 12]

Wetshelo akɔna wakoka ana wambola ndo epalanga kondja oma le kiɛndakɛnda?

[Osato wa lo lɛkɛ 13]

Naa wetshelo wakasha Yeso lam’akandatɛkɛta dikambo dia tofudu la di’alɛmbɔlɛmbɔ?

[Osato wa lo lɛkɛ 14]

“On’ami la ngandji one . . . Nyuwukeli”