TSHAPITA 17

Woho Wa Monga L’ɔngɛnɔngɛnɔ

SHO tshɛ nangaka monga l’ɔngɛnɔngɛnɔ, shi mɛtɛ?. . . Koko anto efula bu mɛtɛ l’ɔngɛnɔngɛnɔ. Onde wɛ mbeyaka lande na?. . . Nɛ dia vɔ haweye sheke y’ɔngɛnɔngɛnɔ. Vɔ fɔnyaka dia monga la diangɔ efula dia l’emunyi ayowasha ɔngɛnɔngɛnɔ. Koko lam’akondjawɔ diangɔ sɔ, ɔngɛnɔngɛnɔ awɔ hawoviya.

Sheke ya woke y’ɔngɛnɔngɛnɔ yɔ nyɛ. Ombetsha a Woke akate ate: ‘Mbisha ndeka nongola ɔngɛnɔngɛnɔ.’ (Etsha 20:35) Lâsɔ ngande wakoka onto monga l’ɔngɛnɔngɛnɔ na?. . . Eelo, ele lo mbisha anto akina diangɔ ndo lo mbasalɛ awui amɔtshi. Onde wɛ mbeyaka dikambo sɔ?. . .

Ɛsɔ tonyomoleka kana yimba lo dikambo sɔ. Onde Yeso akate di’onto lalongola woshasha hatonga l’ɔngɛnɔngɛnɔ?. . . Kema, nde kombuta ngasɔ. Shi wɛ nangaka kondja weshasha?. . . Eelo, onto tshɛ nangaka dikambo sɔ. Sho ngɛnangɛnaka lam’alongolaso diangɔ di’amɛna oma le anto.

Koko Yeso akate di’ɔngɛnɔngɛnɔ mongaka efula etena kashaso anto akina. Ko oko le yɛ, onto akɔna akanayɛ dia nde ambosha anto diangɔ efula oleki anto akina tshɛ?. . . Jehowa Nzambi.

Bible mbutaka dia Nzambi ‘mbishaka anto tshɛ lɔsɛnɔ, lomu ndo diangɔ tshɛ.’ Nde tɔlɔshɛka mvula oma l’olongo ndo toshaka yanyi, woho wa tombatomba mbola ko sho kondja diangɔ dia ndɛ. (Etsha 14:17; 17:25) Diakɔ diele Bible mbetaka Jehowa ɔnɛ: ‘Nzambi k’ɔngɛnɔngɛnɔ.’ (1 Timote 1:11) Mbisha anto akina ekɔ dikambo dimɔtshi diangɛnyangɛnya Nzambi. Ndo lam’ashaso anto, dikambo sɔ koka tosha ndo sho lawɔ ɔngɛnɔngɛnɔ.

Lâsɔ, kakɔna kakokaso mbisha anto akina na? Akanayɛ akokaso mbasha?. . . Mbala mɔtshi woshasha nɔmbaka falanga efula. Naka ekɔ woshasha w’oma lo makashinyi, kete wɛ ayohomba somba woshasha akɔ. Ɔnkɔnɛ, naka wɛ nangaka mbisha onto woho wa woshasha wa ngasɔ, kete ondo wɛ ayohomba momba akuta polo lo wɛ kondja lofulo lakoka somba woshasha akɔ.

Koko aha weshasha tshɛ mbahomba sombama oma lo makashinyi. Ɛnyɛlɔ, lushi la yanyi y’efula, naka wɛ mbisha onto dikɔhɔ di’ashi wa tshitshi, kete nde ayotutsha asolo! Ɔnkɔnɛ, lam’ashayɛ onto lele la mposa k’ashi woshasha ɔsɔ, wɛ koka kondja ɔngɛnɔngɛnɔ waya oma lo mbisha.

Ondo lushi lɔmɔtshi wɛ la mama kayɛ koka mbahɛ ekate kana diangɔ dikina. Dui sɔ mbeyaka nyosha ɔngɛnɔngɛnɔ. Ko kakɔna kakokayɛ sala la diangɔ diokatemi sɔ dia kondja ɔngɛnɔngɛnɔ efula oleki wɛ dilɛ wɛmɛ na?. . . Eelo, wɛ koka mbɔsa diangɔ dimɔtshi diakanyakate sɔ ko disha ɔngɛnyi ayɛ ɔmɔtshi. Onde wɛ ayolanga sala dikambo sɔ mbala kɛmɔtshi?. . .

Ombetsha a Woke ndo apɔstɔlɔ ande tshɛ wakeyaka ɔngɛnɔngɛnɔ waya oma lo mbisha. Onde wɛ mbeyaka kɛnɛ kakawasha anto akina?. . . Vɔ wakasha anto akina ɛngɔ koleki dimɛna tshɛ l’andja w’otondo! Vɔ wakeyaka akambo wa mɛtɛ wendana la Nzambi ndo wakewoya anto akina lokumu l’ɔlɔlɔ lɔsɔ l’ɔngɛnɔngɛnɔ tshɛ. Vɔ wakasale dikambo sɔ aha la mbetawɔ di’onto ɔmɔtshi mbasha akuta l’ɔtɛ wa kɛnɛ kakawawasha.

Lushi lɔmɔtshi ɔpɔstɔlɔ Paulo nde l’ɔngɛnyi ande w’oshika wakawelɛka Luka wakahomana la womoto ɔmɔtshi lakalangaka nde lawɔ monga l’ɔngɛnɔngɛnɔ waya oma lo mbisha. Vɔ wakahomana la nde l’okidi wa lushi lɔmɔtshi. Paulo nde la Luka wakatshu lo dihole sɔ nɛ dia wakoke ɔnɛ ɔsɔ aki dihole dia dɔmbɛlɔ. Ngasɔ mbakidiɔ dikambo lam’akawakome lɛkɔ, vɔ wakatane wamato amɔtshi walɔmba.

Paulo akatatɛ mbewoya wamato akɔ lokumu l’ɔlɔlɔ lendana la Jehowa ndo la Diolelo diande. Lokombo la womoto ɔmɔtshi l’atei awɔ aki Ludiya, ndo nde akâhokamɛ la yambalo y’efula. L’ɔkɔngɔ wa lâsɔ, Ludiya akalange sala dikambo dimɔtshi dia mɛnya ɔnɛ nde mɛtɛ akangɛnyingɛnyi lokumu l’ɔlɔlɔ lokinde. Ɔnkɔnɛ, nde akalɔmbɛ Paulo nde la Luka ate: “Naka nyu nkanakami nyati: Dimi leko la kolamelu le [Jehowa], nyuyi lakami, nyuyuhangi.” Ko nde akatshu la wɔ lakande.​—⁠Etsha 16:​13-15.

Ludiya akangɛnangɛna dia nongola ekambi waki Nzambi ɛsɔ lakande. Nde aki la ngandji otsha le wɔ nɛ dia vɔ wakokimanyiya dia nde mbeya awui wendana la Jehowa ndo la Yeso ndo dia mbeya woho wakoka anto nsɛna pondjo pondjo. Dui sɔ diakɔngɛnyangɛnya ndo diakawosha diaaso dia mbisha Paulo nde la Luka diangɔ dia ndɛ ndo dihole dia vɔ mumuya. Ɔnkɔnɛ, lokaho laki Ludiya akɔngɛnyangɛnya nɛ dia nde aki mɛtɛ la mposa ka kaha. Ɔsɔ ekɔ dikambo diahombaso mbohɔka. Onto ɔmɔtshi mbeyaka totɛ dia sho pombaka kimɔ woshasha. Koko naka sho mɛtɛ hatolange sala dikambo sɔ, kete lokaho lɔsɔ hatotosha ɔngɛnɔngɛnɔ.

Ɛnyɛlɔ, ayoyosala naka wɛ ekɔ la bɔmbɔ mɔtshi yalangayɛ ndɛ na? Naka dimi kotɛ dia wɛ pombaka mbisha ɔna okina bɔmbɔ mɔtshi, onde wɛ ayɔngɛnangɛna dia sala dikambo sɔ?. . . Ko ayoyosala naka wɛ ekɔ la bɔmbɔ mɔtshi ko wɛ ambohomana l’ɔngɛnyi ayɛ ɔmɔtshi lalangayɛ efula na? Naka wɛmɛ monga la kanyi ya mbisha osekayɛ ɔsɔ bɔmbɔ mɔtshi, onde dikambo sɔ hatokosha ɔngɛnɔngɛnɔ?. . .

Mbala mɔtshi, sho koka monga la ngandji k’efula otsha le onto ɔmɔtshi woho ɔnɛ wele sho nangaka mbosha oseka ɛngɔ tshɛ kele laso ko shamɛ tshikala anyanya. Lam’atafule ngandji kaso otsha le Nzambi, mbatataleke ndo Mbɔ̂sa oko onto lalekaso nanga.

Ombetsha a Woke akeyaka womoto ɔmɔtshi la kanga wola lakokaka Nzambi ngandji efula. Nde akawɛnyi lo tɛmpɛlɔ ka la Jerusalɛma. Womoto ɔsɔ aki paka l’ekenga w’akuta ehende wa totshitshɛ eto. Koko nde akadje ekenga akɔ ehende lo shɛtɛshɛtɛ oko woshasha wa lo tɛmpɛlɔ. Ndoko onto lakotshutshuya la wolo dia sala dikambo sɔ. Efula k’anto waki lawɔ kombeya ndo kɛnɛ kakandasale. Nde akasale dikambo sɔ nɛ dia nde akalange disala ndo nɛ dia nde mɛtɛ akalangaka Jehowa. Dikambo sɔ diakawosha ɔngɛnɔngɛnɔ nɛ dia diɔ diakawosha diaaso dia mɛnya lokaho lande.​—⁠Luka 21:​1-4.

Ekɔ weho efula wakokaso kaha. Onde wɛ koka kanyiya weho ɛmɔtshi?. . . Naka sho kahaka mɛtɛ la lolango laso shamɛ, kete tayonga l’ɔngɛnɔngɛnɔ. Diɔ diakɔ diatotɛ Ombetsha a Woke ate: ‘Nyonge la mbekelo ka kahaka.’ (Luka 6:38) Naka sho sala ngasɔ, kete tayɔngɛnyangɛnya anto akina. Ndo tayonga l’ɔngɛnɔngɛnɔ woleki tshɛ!

Ɛsɔ tadia awui akina lo kɛnɛ kendana la woho washa lokaho ɔngɛnɔngɛnɔ lo Mateu 6:​1-4; Luka 14:​12-14; ndo 2 Koreto 9:⁠7.

[Osato wa lo lɛkɛ 92]

Bonde kele Jehowa ‘Nzambi k’ɔngɛnɔngɛnɔ’?

[Osato wa lo lɛkɛ 93]

Kakɔna kakoka kosha ɔngɛnɔngɛnɔ oleki ndɛ ekate wakayakate wɛmɛ?

[Osato wa lo lɛkɛ 94]

Ludiya atɛnde Paulo nde la Luka?

[Osato wa lo lɛkɛ 94]

Bonde kangɛnangɛna Ludiya dia nongola Paulo nde la Luka?

[Osato wa lo lɛkɛ 96]

Bonde kele womoto la wola ɔnɛ l’ɔngɛnɔngɛnɔ wa kimɔ tshɛ kele lande?