Anto efula hawoyotshɔ l’ɛtɛmwɛlɔ awɔ nɛ dia hawokondja ekeketshelo ndo ekadimwelo lo ambola woleki ohomba wa lo lɔsɛnɔ. Ko lande na kahombayɛ mbɔtɔ lo nsanganya y’Akristo y’Ɛmɛnyi wa Jehowa? Kakɔna kayoyotɛna ndo kayoyotoka lɛkɔ?

Wɛ ayonga l’ɔngɛnɔngɛnɔ waya lo monga l’atei w’anto wokana ngandji ndo wakananɛ. Lo ntambe ka ntondo, Akristo wakakongɛma lo tshumanelo, wakɔtɔka nsanganya dia ntɛmɔla Nzambi, dia mbeka Afundelo ndo dia keketshana lam’asawɔ. (Heberu 10:24, 25) Lo nsangana lo dihole diokanawɔ ngandji, vɔ wakayaokaka dia wekɔ l’atei w’angɛnyi w’eshika, mbuta ate anangɛwɔ la akadiyɛwɔ w’Akristo. (2 Tesalonika 1:3; 3 Joani 14) Sho ndjelaka ɛnyɛlɔ k’Akristo wa lo ntambe ka ntondo ndo sho mongaka l’ɔngɛnɔngɛnɔ akɔ wâmɛ.

Ɛlɔlɔ waya lo mbeya nkamba l’atɔndɔ wa lo Bible. Oko wakadiasalemaka lo nshi yakafundamaka Bible, apami, wamato ndo ana wakasanganaka kâmɛ. Embetsha wele l’akoka kambaka la Bible dia tokimanyiya dia sho nshihodia woho wa nkamba l’atɔndɔ wele lɔkɔ lo lɔsɛnɔ laso la lushi la lushi. (Euhwelu k’Elembe 31:12; Nehemiya 8:8) Onto tshɛ kokaka mbisha kɔmatɛrɛ etena kasalema ɔkɛtshanyelo ndo memba esambo watokimanyiya dia sho kɛnɛmɔla elongamelo kaso k’Akristo.​—Heberu 10:23.

Ɛlɔlɔ waya lo monga la mbetawɔ ka wolo le Nzambi. Ɔpɔstɔlɔ Paulo akatɛ etshumanelo kɛmɔtshi ka lo nshi yande ate: “Dimi latukumbulaka nyena . . . dia shu ndjukikitshana leku dimi la nyu lu mbetawo kasu.” (Romo 1:11, 12) Woho wongaso kâmɛ l’asekaso ambetawudi keketshaka mbetawɔ kaso ndo yɛdikɔ yaso ya nsɛna lo yoho yɔtɔnɛ l’atɔndɔ wa lo Bible.

Lande na kahayetawɔ leeta la ndjɔtɔ lo losanganya la l’etshumanelo kaso layela dia wɛmɛ tɛna awui asɔ tshɛ? Wɛ ayolongɔma la wangasanu tshɛ. Nsanganya tshɛ yekɔ ofele ndo hawɔkɔngɔla ɛkɔngɔ.

• Nsanganya yaso ya l’etshumanelo ndjelaka ɛnyɛlɔ kakɔna?

• Ngande wakokaso nkondja wahɔ lo mbɔtɔka lo nsanganya y’Akristo?

Sho mbɔtɔka lo nsanganya yaso y’Akristo mbala la mbala, oyadi sho pombaka tenyanya ngamba ka mamba, oyadi lo yanyi ya tɛɛ kana olongo wekɔ kɔlɔ. Oyadi ekakatanu wa lɔsɛnɔ kana ɔlɛmbɛlɔ wonga l’ɔkɔngɔ wa nkamba olimu lushi l’otondo, lande na kadja Ɛmɛnyi wa Jehowa welo wa ngasɔ dia monga kâmɛ l’asekawɔ ambetawudi?

Yɔ yekɔ dikambo di’ɔlɔlɔ aso. Paulo akafunde ate: ‘Nyɛsɔ todjanake yimba,’ lam’akandatɛkɛtaka dikambo di’anto wasangana la so l’etshumanelo. (Heberu 10:24) Etelo kɛsɔ nembetshiyaka “nkana yimba dimɛna,” dia mbeya anto akina. Ɔnkɔnɛ, ɛtɛkɛta waki ɔpɔstɔlɔ Paulo tokeketshaka dia ndjakiyanya dikambo di’anto akina. Naka sho nyanga dia mbeya nkumbo nkina y’Akristo, kete tayɛna dia mɔtshi l’atei ayɔ yakatondoya ekakatanu wele oko waso ndo ɔnɛ vɔ kokaka tokimanyiya dia sho lawɔ ntondoya.

Yɔ keketshaka lɔngɛnyi laso. Lo nsanganya yaso, sho mongaka kâmɛ l’anangɛso ndo l’akadiyɛso wele angɛnyi aso w’eshika, ndo vɔ bu anto weyaso tsho ngango. Lo waaso akina, sho mbetshaka wenya kâmɛ dia nkɔkɔla demba. Naa shɛngiya y’ɔlɔlɔ yele la lɔngɛnyi lɔsɔ le so? Sho mbekaka dia ndeka mandɔna ndo dui sɔ keketshaka dimama diaso dia ngandji. Ndo etena kahomana asekaso l’ekakatanu, sho mongaka suke dia mbakimanyiya nɛ dia takashile mbɔtɔ la wɔ lɔngɛnyi la wolo. (Tukedi 17:17) Lo nsangana kâmɛ l’anto tshɛ wa l’etshumanelo kaso, sho mɛnyaka dia sho ‘ndjakiyanyaka dikambo dia onto la onyande.’​—⁠1 Koreto 12:​25, 26.

Tambokokeketsha dia wɛ nsɔna angɛnyi ayɛ l’atei w’anto wasala lolango laki Nzambi. Wɛ ayotana angɛnyi wa ngasɔ l’atei wa Ɛmɛnyi wa Jehowa. Tetawɔke dia ɛngɔ kɛmɔtshi koshimba dia mbɔtɔ lɔngɛnyi la so.

• Bonde kele ekɔ ohomba efula dia sho sanganaka l’anto akina?

• Lushi lakɔna lakombolayɛ ndjosangana kâmɛ la so?

Lo nsanganya y’Akristo ya lo ntambe ka ntondo, wakembaka esambo, wakasalaka alɔmbɛlɔ, wakadiaka ndo wakakɛtshanyaka Afundelo, koko ndoko sɛlɛmɔnyi kakasalemaka. (1 Koreto 14:26) Wɛ kokaka nongamɛ dia mɛna awui wa ngasɔ lo nsanganya yaso.

Wetshelo tombaka oma lo Bible ndo wekɔ ohomba. Lushi la samalo kana la lomingu, etshumanelo tshɛ sanganaka dia mpokamɛ sawo di’oma lo Bible dia minitɛ 30 diɛnya woho walembetshiya Afundelo awui wendana la nsɛnɔ yaso ndo la tena diasɛnaso. Sho tshɛ keketshamaka dia tayelaka lo Bible yaso. L’ɔkɔngɔ wa sawo, sho ndjelaka Wekelo wa “Tshoto y’Etangelo” wasalema l’edja ka wonya a tango ɔtɔi ndo vɔ nɔmbaka ase etshumanelo dia mbisha kɔmatɛrɛ l’ɔkɛtshanyelo wa sawo dimɔtshi diɔsami oma lo numɛlɔ ka Tshoto y’Etangelo ya wekelo. Ɔkɛtshanyelo ɔsɔ tokimanyiyaka dia sho ndjela ɛlɔmbwɛlɔ kasha Bible lo nsɛnɔ yaso. Sawo diakɔ diâmɛ mbekamaka lo tshumanelo diaso ndekana 100 000 dia l’andja w’otondo.

Sho kimanyiyamaka dia ndowanya diewo diaso dia mbetsha. Sho sanganaka nto l’atei wa lomingu la dikɔlɔ dia ndjela ekongelo ka tenyi sato. Etenyi ka ntondo ekɔ Wekelo wa Bible wa l’etshumanelo wasalema l’edja ka minitɛ 30. Ɔsɔ ekɔ ɔkɛtshanyelo wa ambola la ekadimwelo watokimanyiya dia sho ndeka nshihodia atɔndɔ wa l’Afundelo ndo prɔfɛsiya ya lo Bible. Etenyi ka hende, ekɔ Kalasa k’olimu wa teokrasi kasalema l’edja ka minitɛ 30. Tɔ tatɛka l’ɔkɛtshanyelo w’etenyi kɛmɔtshi ka lo Bible kakatalɔngɔsɔdi ase etshumanelo la ntondo. Oma lâsɔ, ambeki wakafundja nkombo lo kalasa mbishaka asawo wa tomondo. Ondaki ɔmɔtshi kimanyiyaka ambeki dia vɔ ndowanya wadielo awɔ ndo diewo diawɔ dia ntɛkɛta. (1 Timote 4:13) Etenyi k’ekomelo ekɔ, Losanganya l’olimu lasalema l’edja ka minitɛ 30. L’ekimanyielo k’asawo, wɛnyɛlɔ ndo ɛkɔnya sho mbekaka woho wa mbetsha anto akina Bible.

Etena kayoyɔtɔ lo nsanganya yaso, aha la tâmu wɛ ayâmba l’ɔtɛ wa wetshelo wa dimɛna wa lo Bible wayoyolongola.​—Isaya 54:13.

• Akokayɛ nongamɛ dia toka lo nsanganya y’Ɛmɛnyi wa Jehowa?

• Nsanganya yaso yakɔna ya lo lomingu yayoyolanga mbɔtɔ ntondo?

Onde wɛ akɛnyi esato wele lo biukubuku nyɛ wɛnya woho walɔta Ɛmɛnyi wa Jehowa dimɛna etena kɔtɔwɔ nsanganya yawɔ ya l’etshumanelo? Lande na kadjaso yimba ngasɔ lo ɔlɔtɔ aso ndo l’ɔlɔngɔswɛlɔ aso wa divo?

Dia mɛnya woho walɛmiyaso Nzambi kaso. Ekɔ mɛtɛ dia Nzambi hende tsho paka ɛnamelo kaso. (1 Samuele 16:7) Koko, etena kasanganaso dia mbɔtɛmɔla, tekɔ la nsaki k’oma k’ɛse otema ka mbɔlɛmiya ndo nɛmiya asekaso atɛmɔdi. Naka tambɔlɔmbama dia ntshɔ lo tuminadi la ntondo ka shushi mɔtshi, kete tayodja yimba l’ɛnamelo kaso dia nɛmiya dihole diele la nde. Woho akɔ wâmɛ mbele, ɛnamelo kaso lo nsanganya mɛnyaka woho walɛmiyaso Jehowa Nzambi, ‘Shushi ya nkɛtɛ tshɛ,’ ndo dihole diɔtɛmɔlaso.​—⁠Etatelu 18:25.

Dia mɛnya atɔndɔ wakitanyiyaso lo nsɛnɔ yaso. Bible keketshaka Akristo dia vɔ ndɔta ‘ɔlɔtɔ wele la wɛdimo ndo la ekanelo k’ɔlɔlɔ’ oko anto ‘wamamema Nzambi.’ (1 Timote 2:9, 10) Ndɔta ‘ɔlɔtɔ wele la wɛdimo’ nembetshiyaka mbewɔ ɔlɔtɔ wakotola yambalo y’anto le so, mbuta ate ahɔndɔ wa kawotake, wasanga demba ndo watshika tenyi dia demba l’andja. Ndo nto, monga ‘la ekanelo k’ɔlɔlɔ’ tokimanyiyaka dia sho nsɔna ahɔndɔ w’amɛna, koko aha wa kɔlɔ kana wa kawotake. Atɔndɔ asɔ kimanyiyaka onto dia nde nsala ɛsɔnwɛlɔ ande ndamɛ. Aha la sho ntɛkɛta dui, ɛnamelo kaso k’ɔlɔlɔ ndo ka kɔmba kokaka ‘nɛnga wetshelo waki Nzambi, Oshimbedi aso’ ndo ‘mbotombola.’ (Tito 2:10; 1 Petero 2:12) Woho walɔtaso dimɛna lo nsanganya, mongaka la shɛngiya y’ɔlɔlɔ lo woho wɔsa anto akina ɔtɛmwɛlɔ waki Jehowa.

Tetawɔke pondjo di’ɔlɔtɔ ayɛ koshimba dia wɛ ntshɔ lo Mbalasa ka Diolelo. Aha paka ahɔndɔ aso mbongi oshinga wolo, koko vɔ pombaka monga ahɔndɔ w’amɛna, wa pudipudi ndo wa kɔmba.

• Lande na kele ekɔ ohomba ndɔta dimɛna etena katɛmɔlaso Nzambi?

• Atɔndɔ akɔna watɔlɔmbɔla l’ɛsɔnwɛlɔ wendana la ɔlɔtɔ ndo la ɔlɔngɔswɛlɔ wa divo?

Naka wɛ ekɔ lo mbeka Bible la Ɔmɛnyi wa Jehowa ɔmɔtshi, kete ondo wɛ nɔngɔsɔlaka wekelo tshɛ la ntondo. Dia wɛ ndeka nkondja wahɔ, ekɔ ohomba dia wɛ nsala woho akɔ wâmɛ la ntondo ka mbɔtɔ lo losanganya lɔmɔtshi la l’etshumanelo. Tayokondja etombelo w’amɛna, naka sho monga l’ekongelo ka dimɛna ka nɔngɔsɔlaka nsanganya.

Shikikɛ etena ndo dihole diahombayɛ mbeka. Etena kakɔna kakokayɛ ndeka ndjasha? Onde la pindju k’efula, la ntondo ka wɛ ntatɛ nkamba olimu kana l’otsho l’ɔkɔngɔ w’ana ntshɔ dia tolala? Naka wɛ hakoke mbeka l’etena k’otale, shikikɛ lofulo la wenya wakokayɛ mbeka ndo tetawɔke dia dui dimɔtshi kodjɛ wekamu. Yanga dihole dia ki ndo nya ɛngɔ tshɛ kakoka kekola yimba lo nima aradiyo, televiziɔ ndo telefɔnɛ. Nɔmbaka la ntondo ka wekelo ayokokimanyiya dia wɛ mbohɛ ekiyanu wa lo lushi woho wa wɛ ndjasha l’Ɔtɛkɛta wa Nzambi.​—Filipi 4:6, 7.

Ekɛ eshidi ndo yalɔngɔsɔla dia tosha kɔmatɛrɛ. Ntatɛ nshihodia lokanyi la tshɛ la lo sawo. Kana yimba lo kɛnɛ kendana l’ɔtɛ a dui wa sawo kana wa tshapita, enda woho wɔtɔnɛ ɛtɛ w’awui wahɔnyi la ɔtɛ wa sawo, sɛdingola esato tshɛ ndo vusola ambola watɔtɔmiya awui woleki ohomba. Oma lâsɔ, adia odingɔ tshɛ ndo yanga okadimwelo lo dimbola di’odingɔ. Yanga ndo adia avɛsa woshilami ndo kana yimba woho wasukɛwɔ awui wekayɛ. (Etsha 17:11) Naka wɛ amboshola okadimwelo, kete ekɛ oshidi kana dja djembetelo lo tɔtɛkɛta t’ohomba ndo lo ditelo dia l’odingɔ diayokokimanyiya dia wɛ mbohɔ okadimwelo akɔ. Oma lâsɔ, etena keyɛ lo losanganya, wɛ kokaka memɛ lonya naka wɛ nangaka dia mbisha kɔmatɛrɛ ka lo tshena pe l’ɛtɛkɛta ayɛ hita.

Naka wɛ nɔngɔsɔlaka asawo wakɛtshanyema lomingu tshɛ lo nsanganya, kete wɛ ayokotshaka tokanyi t’eyoyo lo “eumbelu” kayɛ ka ewo ka lo Bible.​—Mateu 13:51, 52.

• Ekongelo kakɔna kahombayɛ monga la tɔ dia nɔngɔsɔlaka nsanganya?

• Ngande wakokayɛ ndjalɔngɔsɔla dia tosha kɔmatɛrɛ lo nsanganya?

Oma ko nshi y’edjedja, Jehowa okokombolaka dia nkumbo tshɛ mbetshaka wenya kâmɛ dia nkeketsha lonyuma ndo diɔtɔnganelo diele lam’asawɔ. (Euhwelu k’Elembe 6:6, 7) Diakɔ diele, Ɛmɛnyi wa Jehowa mbɔsaka dikɔlɔ dimɔtshi lomingu tshɛ dia ntɛmɔla kâmɛ lo nkumbo, mbuta ate dia nkɛtshanya, nkɔkɔla demba ndo nsɛdingola awui wa lo nyuma wɔtɔnɛ l’ehomba awɔ. Oyadi wɛmɛ mbadjasɛ, etena kɛsɔ kokaka monga diaaso di’ɔlɔlɔ dia wɛ nsɛdingola awui wendana la Nzambi lo nsala wekelo wa Bible w’onto ndamɛ.

Ɔsɔ ekɔ etena ka ndeka ndjasukanya la Jehowa. Bible mbutaka ɔnɛ: ‘Nyoyasukanya la Nzambi ko nde ayosukana la nyu.’ (Jakoba 4:8) Sho mbeyaka Jehowa dimɛna etena kekaso awui wendana la lonto ndo la etsha ande lo Bible, Ɔtɛkɛta ande. Yoho ya wɔdu ya ntatɛ ɔtɛmwɛlɔ wa lo nkumbo ele mbetshaka wenya ɛmɔtshi dia mbadiaka Bible kâmɛ la dui dia wolo, ondo lo ndjela ekongelo ka lomingu la lomingu ka Kalasa k’olimu wa teokrasi. Ose nkumbo tshɛ kokaka nongola avɛsa amɔtshi wa mbadia, oma lâsɔ vɔ tshɛ kokaka ndjɔkɛtshanya kɛnɛ kamboweka oma l’Afundelo.

Ɔsɔ ekɔ etena k’ase nkumbo ndeka ndjasukanya lam’asawɔ. Waa wadi la waomi, ndo ambutshi l’ana, keketshaka diɔtɔnganelo dia lam’asawɔ etena kekawɔ Bible lo nkumbo. Wekelo ɔsɔ pombaka monga etena k’ɔngɛnɔngɛnɔ, ka wɔladi ndo koleki ohomba lo lomingu. Lo ndjela ɛnɔnyi wele l’anawɔ, ambutshi kokaka nsɔna awui w’ohomba wakokawɔ nkɛtshanya, ondo lo nkamba l’asawo w’oma lo Tshoto y’Etangelo ndo Réveillez-vous ! Nyu kokaka nkɛtshanya dikambo diendana l’okakatanu ɔmɔtshi wakahomana l’ananyu la kalasa ndo woho wa mbôkandola. Nyu mbeyaka ngɛnangɛna dia mbeka esambo wayembama lo nsanganya ya lo lomingu lakɔ ndo ndɛ yangɔ kâmɛ l’ɔkɔngɔ w’ɔtɛmwɛlɔ wa lo nkumbo.

Etena ka lânde kɛsɔ ketshanyu lomingu tshɛ dia ntɛmɔla Jehowa kâmɛ, ayokimanyiya ose nkumbo tshɛ dia ngɛnangɛna Ɔtɛkɛta wa Nzambi ndo nde ayɔtshɔkɔla welo wadjanyu.​—Osambu 1:1-3.

• Lande na kahombaso ndjatshungwɛ etena dia nsala ɔtɛmwɛlɔ wa lo nkumbo?

• Ngande wakoka ambutshi nsala dia diaaso sɔ monga etena k’ɔngɛnɔngɛnɔ le ose nkumbo tshɛ?

Lande na kele anto anɛ la dungi di’ɔngɛnɔngɛnɔ? Nɛ dia vɔ wekɔ lo losanganya laso lɔmɔtshi la woke. L’ɛnyɛlɔ k’ekambi waki Nzambi wa lo nshi y’edjedja wakawadjangɛ dia sanganaka mbala shato l’ɔnɔnyi, sho kongɛka l’asolo walomɔlomɔ dia nsangana kâmɛ oko olui wa woke. (Euhwelu k’Elembe 16:16) Ɔnɔnyi tshɛ, tekɔ la nsanganya shato ya weke: Losanganya la lânde la lushi ɔtɔi, Losanganya l’otshimbedi la nshi hiende, ndo Losanganya la distrikɛ la nshi shato. Wahɔ akɔna wakondjaso oma lo nsanganya shɔ?

Yɔ keketshaka nkumbo kaso k’Akristo k’onto l’ɔnango. Oko wakangɛnangɛnaka ase Isariyɛlɛ dia ntombola Jehowa “lu ului w’antu,” sho lawɔ ngɛnangɛnaka mbɔtɛmɔla kâmɛ lo waaso wa lânde. (Osambu 26:12; 111:1) Nsanganya shɔ toshaka waaso wa sho monga kâmɛ l’Ɛmɛnyi wa Jehowa w’oma lo tshumanelo kana wedja ekina. La midi, sho ngɛnangɛnaka dia ndɛ yangɔ kâmɛ lo dihole diasalema losanganya la woke dia nkeketsha lɔngɛnyi laso lo waaso wa lo nyuma asɔ. (Etsha 2:42) Lo nsanganya ya weke shɔ, sho mɛnaka ngandji katomamatanya lo ‘nkumbo kaso k’onto l’ɔnango’ ka l’andja w’otondo.​—1 Petero 2:17.

Yɔ tokimanyiyaka dia sho mpama lo nyuma. Ase Isariyɛlɛ wakakondjaka nto wahɔ lo ‘nshihodia awui’ wa l’Afundelo wakawâlembetshiyaka. (Nehemiya 8:8, 12) Sho lawɔ ngɛnangɛnaka alako w’oma lo Bible walongolaso lo nsanganya yaso ya weke. Ɔtɛ a dui wa losanganya tshɛ mbɔsamaka oma l’Afundelo. L’ekimanyielo k’asawo w’amɛna, k’asawo wa tenyi tenyi ndo ka tɔkɛnyɔ ta lo tɔjɛstɛ, sho mbekaka woho wa nsala lolango laki Nzambi lo nsɛnɔ yaso. Sho keketshamaka etena kokaso woho watondoya anto ekakatanu wendana la nsɛna oko Akristo lo nshi ya pâ nyɛ. Lo nsanganya ya distrikɛ, adramɛ walɔtawɔ ɛlɔtɔ wa lo nshi y’edjedja mbetɛka ɛkɔndɔ wa lo Bible dui dia mɛtɛ le so ndo toshaka wetshelo w’ohomba. Lo losanganya la woke tshɛ, vɔ batizaka anto walanga mɛnya ndjakimɔ kawɔ le Nzambi.

• Lande na kele nsanganya ya weke waaso w’ɔngɛnɔngɛnɔ?

• Wahɔ akɔna wakokɛ nkondja lo mbɔtɔ lo losanganya lɔmɔ la woke?

Yema tshitshɛ la ntondo ka nyɔi kande, Yeso akate ate: ‘Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma lâsɔ ekomelo kayoya.’ (Mateu 24:14) Ko ngande wakahombe kambema olimu ɔsɔ l’andja w’otondo? Ele lo ndjela ɛnyɛlɔ kakatshike Yeso etena kakinde la nkɛtɛ.​—Luka 8:1.

Sho salaka la wolo dia nsambisha anto lawakawɔ. Yeso akalowanya ambeki ande dia vɔ nsambisha lokumu l’ɔlɔlɔ la Diolelo lo luudu la luudu. (Mateu 10:11-13; Etsha 5:42; 20:20) Esambisha wa lo ntambe ka ntondo ɛsɔ wakalongola bɛtshi dia nkɛtɛ shikaa diakawahombe nsambisha. (Mateu 10:5, 6; 2 Koreto 10:13) Polo nd’ɛlɔ kɛnɛ, olimu w’esambishelo kongɛma dimɛna ndo etshumanelo tshɛ kakalongola ɛtshi kɛmɔ ka nkɛtɛ ka vɔ sambishaka. Dui sɔ tokimanyiyaka dia sho nkotsha didjango diaki Yeso diata ɔnɛ: ‘Nyosambisha anto dimɛna dimɛna.’​—Etsha 10:42.

Sho salaka la wolo dia nsambisha anto lo dihole tshɛ diakokawɔ ntanema. Yeso akasha nto ɛnyɛlɔ lo nsambisha anto l’ahole wa lo sɛkɛ, ɛnyɛlɔ l’emamu w’ashi kana l’ahole wakatanemaka anto efula. (Mako 4:1; Joani 4:5-15) Sho lawɔ ndjashaka dia nsambisha anto awui w’oma lo Bible l’ahole tshɛ wakokaso mbatana, mbuta ate lo toshinga, l’ahole w’amundji w’okanda, lo waa parkɛ kana lo telefɔnɛ. Sho sambishaka nto asukanyi aso, asekaso wa l’olimu, asekaso wa la kalasa ndo ewotɔ aso etena kakondjaso diaaso di’ɔlɔlɔ. Welo wadjaso ɛsɔ tshɛ wambokimanyiya dia miliyɔ y’anto wa lo nkɛtɛ k’otondo mboka ‘lokumu l’ɔlɔlɔ lasha panda.’​—Osambu 96:2.

Onde wɛ kokaka kanyiya dikambo di’anto amɔtshi wakokayɛ nsambisha lokumu l’ɔlɔlɔ la Diolelo diaki Nzambi ndo mbatɛ ɛtshɔkɔ wayowaela losango lɔsɔ lo nshi yayaye? Tolamake losango lasha elongamelo lo dikambo diayɛ wɛmɛ. Sambishalɔ anto akina aha la ntshimbatshimba!

• ‘Lokumu l’ɔlɔlɔ’ lakɔna lahomba sambishama?

• Ngande wokoya Ɛmɛnyi wa Jehowa toho takasambishaka Yeso?

Mbala efula tshɛkɛta “ombatshi mboka” nembetshiyaka anto wembola bɛtshi dia nkɛtɛ di’eyoyo ntondo ndo wadiholɛ anto akina mboka dia vɔ mbayela. Yeso aki oko ombatshi mboka wakatomama la nkɛtɛ dia ndjokamba olimu washimbɛ nsɛnɔ ndo dia ndjodiholɛ anto mboka k’otsha lo panda. (Mateu 20:28) Ɛlɔ kɛnɛ, ambeki ande mbôkoyaka lo mbetsha wenya efula dia ‘mbetɛ anto ambeki.’ (Mateu 28:19, 20) Amɔtshi wekɔ l’akoka wa nkamba olimu w’ombatshi mboka.

Ombatshi mboka ekɔ onto lasambisha lo tena tshɛ. Ɛmɛnyi wa Jehowa tshɛ wekɔ apandjudi wa lokumu l’ɔlɔlɔ. Koko, amɔ wakakongɛ nsɛnɔ yawɔ dia nkamba oko ambatshi mboka wa pondjo ndo vɔ mbetshaka wenya 70 ngɔndɔ tshɛ l’esambishelo. Dia nkotsha wenya ɛsɔ, anto efula kambaka elimu wa l’emunyi wahawaɔsɛ lushi l’otondo. Akina sɔnamaka dia nkamba oko ambatshi mboka wa lânde l’ahole wele ohomba efula w’esambisha wa Diolelo ndo vɔ mbetshaka wenya 130 kana ndekana l’esambishelo ngɔndɔ tshɛ. Ambatshi mboka ngɛnangɛnaka dia nsɛna lɔsɛnɔ l’ɔsɛlɛngɛ, wele l’eshikikelo ɔnɛ Jehowa ayowakotshɛ ehomba awɔ wa lo lɔsɛnɔ. (Mateu 6:31-33; 1 Timote 6:6-8) Wanɛ wahakoke monga ambatshi mboka wa lo tena tshɛ kambaka oko ambatshi mboka wa tshanda etena kewɔ l’akoka lo nsambisha wenya 30 kana 50 lo ngɔndɔ.

Ngandji kokande Nzambi l’anto mbatshutshuya onto dia monga ombatshi mboka. L’ɛnyɛlɔ ka Yeso, sho mɛnaka di’anto efula wekɔ l’ohomba w’efula wa mbeya awui wendana la Nzambi ndo la sangwelo diande ɛlɔ kɛnɛ. (Mako 6:34) Koko, tekɔ la ewo kakoka mbakimanyiya oma ko kakianɛ ndo mbasha elongamelo k’oshika ka nshi yayaye. Ngandji ka wonyande onto mbatshutshuya ombatshi mboka dia nde nkamba la wenya ndo la wolo ande dia nkimanyiya anto akina dia vɔ mbeya akambo wa mɛtɛ. (Mateu 22:39; 1 Tesalonika 2:8) Etombelo wele la dikambo sɔ ele mbetawɔ kande keketshamaka, nde ndekaka ndjasukanya la Nzambi ndo nde mongaka l’ɔngɛnɔngɛnɔ w’efula.​—Etsha 20:35.

• Onde wɛ kokaka totɛ elɛwɔ ombatshi mboka?

• Kakɔna katshutshuya anto amɔtshi dia nkamba olimu w’ombatshi mboka wa pondjo?

Onde wɛ ayetawɔ ndo ayokoka ntshika nkumbo ndo wodja ayɛ dia tosambisha lokumu l’ɔlɔlɔ lo wodja okina? Nunu di’Ɛmɛnyi wa Jehowa wakasale dikambo sɔ lo mbuta ɔnɛ: “Dim’one, untumi.” (Isaya 6:⁠8) Lo nsala ngasɔ, vɔ wakokoya misiɔnɛrɛ woleki woke, mbuta ate Yeso Kristo.​—Joani 7:29.

Ɔsɔ ekɔ yoho ya nkɛndakɛnda lo wanya wa Yeso. Nzambi akatome Yeso oya la nkɛtɛ dia ndjɔsɛna l’atei w’atshi wa pɛkato. Kânga mbakandɛnaka awui wa wɛngiya la nkɛtɛ, Yeso konyanga dia ntshikitanya awui wa lo tshunda di’anto. Nde akayasha l’ɔkɛndɛ ande wa “nsambisha lukumu l’ololo la diulelu dia [Nzambi],” mbuta ate ehomɔ kakɔ ɔtɔi kayoyokandola ekakatanu w’anto. (Luka 4:43) Waa misiɔnɛrɛ wa mɛtɛ w’Akristo ndjelaka ɛnyɛlɔ kande.

Olimu ɔsɔ wekɔ yoho ya lɔsɛnɔ ya ndjahombia. Misiɔnɛrɛ pombaka monga l’akoka wa ndjaɔtɔnganyiya la yoho ya lɔsɛnɔ tshɛ, mbekelo tshɛ, ahole wa tshitshi kana wa tanyi ndo la mbo ya ndɛ yakoka ntshikitana tshɛ lo tshɛ la yakandalɛka. Mbala efula ekɔ ohomba mbeka ɔtɛkɛta w’oyoyo dia nsawola l’anto wotanyinde. Mbeyaka monga ko anto wa lɛnɛ otshwende mɛmbanaka paka l’akalo dia ntshɔ lo ngelo nkina otshikitanyi la lɛnɛ akinde. Dia monga la yimba ya ndjahombia ya ngasɔ, misiɔnɛrɛ pombaka monga la ngandji ka shikaa k’anto wakambɛwɔ.

Misiɔnɛrɛ pombaka ndowanyema dimɛna. Ɛmɛnyi wa Jehowa efula wakamba olimu wa misiɔnɛrɛ wakɔtɔ lo Kalasa ka Ngiliyadɛ ka Bible ka Ɛmɛnyi wa Jehowa kasalema l’edja ka ngɔndɔ tshanu. Awui wekawɔ keketshaka wɛkamu awɔ le Jehowa, l’Ɔtɛkɛta ande ndo l’okongamelo ande. (Tukedi 3:5, 6) Kalasa kakɔ mbakimanyiyaka dia vɔ nkɛnɛmɔla waonga w’Akristo wayonga ohomba lo lɔsɛnɔ lawɔ la misiɔnɛrɛ ndo akoka wayowakimanyiya dia monga embetsha wa Bible w’eshika. Vɔ ndekaka monga l’akoka wa nsambisha ‘polo ndo l’ahole woleki etale wa lo nkɛtɛ.’​—Etsha 1:8.

• Kakɔna kalɔmbama dia monga misiɔnɛrɛ?

• Naa kalasa ka lânde kakalɔngɔswama dikambo dia waa misiɔnɛrɛ?